بۇگىن تۇركىستان قالاسىنا اتالعان بايقاۋدىڭ جەڭىمپازى اتانعان 15- جۇپتىڭ 14-ءى كەلدى. ءىس شارا بارىسىندا ولاردىڭ نەكەسى قيىلدى. تۇركىستانعا جولداما العان جەڭىمپازدارعا ەكى كۇن بويى قۇرمەت كورسەتىلەدى. ماسەلەن, بۇگىن رومانتيكالىق كەشكى اس, فوتوسەسسيا جانە مادەني باعدارلاما ۇيىمداستىرىلسا, ەرتەڭ قالانىڭ كورىكتى ورىندارى مەن قالا ماڭىنداعى كيەلى جەرلەرگە زيارات ەتۋ جوسپارلانعان.
15 ءساۋىر – قوزى كورپەش پەن بايان سۇلۋ كۇنىنە وراي ۇيىمداستىرىلعان شارانى تۇركىستان وبلىسى مادەنيەت جانە تۋريزم باسقارماسى باسشىسىنىڭ ورىنباسارى ءادىل قونىسبەكوۆ اشىپ بەرىپ, بايقاۋ جەڭىمپازدارىن ماراپاتتادى.
«بيىلعى جىلى رامازان ايىمەن تۇسپا-تۇس كەلىپ وتىرعان «قوزى كورپەش - بايان سۇلۋ» كۇنى قاسيەتتى شاھاردا ەرەكشە فورماتتا اتاپ وتىلۋدە. وسى مەرەكەگە وراي ۇيىمداستىرىلعان «Neke tour» رەسپۋبليكالىق بايقاۋى قوعامنىڭ ەرەكشە قىزىعۋشىلىعىن تۋدىردى. ەل كولەمىندە العاش رەت ۇيىمداستىرىلعان جوباعا 345 جۇپ ءوتىنىم بەرىپ, بايقاۋدىڭ ماڭىزدىلىعىن ارتتىردى», دەدى ول.
تۇركىستان قالاسىنىڭ باس يمامى نەكەلەرىن جاڭا قيعان جانۇيالارعا وتباسىلىق ءومىردىڭ جاۋاپكەرشىلىگى تۋرالى ءتۇسىندىرىپ ءوتتى.
