قاداعالاۋشى ورگان تاراتقان مالىمەت بويىنشا, قالا پروكۋراتۋراسى جەر زاڭناماسىنىڭ قولدانىلۋىن تالداۋ بارىسىندا كوممەرتسيالىق ماقساتتا جەر بەرۋ كەزىندە جەرگىلىكتى اتقارۋشى ورگاندار تاراپىنان ورەسكەل بۇزۋشىلىقتاردى انىقتادى.
ماسەلەن, قوسشى اۋىلدىق وكرۋگى اكىمىنىڭ وكىمىمەن 2016 جىلعى تامىزدا جاۋاپكەرشىلىگى شەكتەۋلى سەرىكتەستىككە اۋدانى 3,2778 گەكتار جەر ۋچاسكەسىنە ۋاقىتشا وتەۋلى جەر پايدالانۋ قۇقىعىن بەردى. وسى وكىمنىڭ نەگىزىندە جشس مەن تسەلينوگراد اۋدانىنىڭ جەر قاتىناستارى ءبولىمى اراسىندا جەر ۋچاسكەسىنە ۋاقىتشا وتەۋلى جەر پايدالانۋ تۋرالى شارت جاسالدى.
جالداۋ مەرزىمى بىرنەشە رەت ۇزارتىلدى. الايدا 2016 جىلدان باستاپ كاسىپورىن جەر ۋچاسكەسىن نىسانالى ماقساتى بويىنشا پايدالانۋعا باعىتتالعان بىرىڭعاي ءىس-قيمىل جاساعان جوق. ال قۇجاتتارعا سايكەس, جشس تۇرعىن ءۇي كەشەنىن سالۋدى كوزدەگەن.
«كاداسترلىق قۇنى 65 ملن تەڭگە بولاتىن بۇل جەر ۋچاسكەسى قوسشى قالاسىنىڭ ورتالىعىندا ورنالاسقان جانە جوعارى ينۆەستيتسيالىق تارتىمدىلىققا يە. مۇنداي تۇجىرىمدى 2021 جىلى جشس باسقا زاڭدى تۇلعاعا جالداۋ قۇقىعىن 120 ملن تەڭگەگە ساتقانىنان عانا جاساۋعا بولادى», دەپ حابارلادى اقمولا وبلىسىنىڭ پروكۋراتۋراسى.
الايدا قاداعالاۋ ورگانى جەر ۋچاسكەسى قر جەر كودەكسىنىڭ 48-بابىنىڭ نورمالارىن بۇزا وتىرىپ, اتاپ ايتقاندا, ساۋدا-ساتتىق (كونكۋرستار, اۋكتسيوندار) وتكىزىلمەي بەرىلگەنىن انىقتادى.
«اقمولا وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ 2022 جىلعى 7 قاراشاداعى شەشىمىمەن دەپارتامەنتتىڭ تالاپ-ارىز تالاپتارى جەردى مەملەكەتكە قايتارۋمەن تولىق كولەمدە قاناعاتتاندىرىلدى. بۇل شەشىم 2023 جىلعى 16 اقپاندا زاڭدى كۇشىنە ەندى», دەلىنگەن حابارلامادا.
قوسشى قالاسى اكىمدىگىنىڭ مالىمەتتەرى بويىنشا وسى جەر ۋچاسكەسىندە «جايلى مەكتەپ» ۇلتتىق جوباسىن ىسكە اسىرۋ شەڭبەرىندە مەكتەپ سالۋ جوسپارلانىپ وتىر.
