كەشە استانادا تاۋەلسىز مەملەكەتتەر دوستاستىعىنا قاتىسۋشى مەملەكەتتەر قورعانىس مينيسترلەرى كەڭەسىنىڭ (تمد قمك) كەزەكتى وتىرىسى ءوتتى. ونىڭ جۇمىسىنا ازەربايجان, ارمەنيا, بەلارۋس, قازاقستان, قىرعىزستان, رەسەي, تاجىكستان, وزبەكستان قورعانىس ۆەدومستۆولارىنىڭ دەلەگاتسيالارى قاتىستى.
دوستاستىق شەڭبەرىندەگى اسكەري ىنتىماقتاستىقتىڭ كوپبەيىندى سيپاتىن ەسكەرە وتىرىپ, كەڭەس مۇشەلەرى ءوزارا ءىس-قيمىلدىڭ جالپى پەرسپەكتيۆالارىن جانە ونىڭ باسىم باعىتتارىن ايقىنداۋدىڭ تۇجىرىمدامالىق كوزقاراستارىن تالقىلادى.
وتىرىستا كۇن تارتىبىنە سايكەس, دوستاستىق مەملەكەتتەرى قورعانىس ۆەدومستۆولارى كوپجاقتى اسكەري ىنتىماقتاستىعىنىڭ ءتۇرلى اسپەكتىلەرى بويىنشا 20-عا جۋىق ماسەلە قارالدى. قورعانىس مينيسترلەرى, اتاپ ايتقاندا, ينجەنەرلىك اسكەرلەر اسكەري قىزمەتشىلەرىنىڭ گۋمانيتارلىق ميناسىزداندىرۋ مىندەتتەرىن ورىنداۋ كەزەڭىندەگى مارتەبەسىنە, رادياتسيالىق, حيميالىق جانە بيولوگيالىق احۋالدى باقىلاۋ جانە باعالاۋ جۇيەسىن دامىتۋعا, اسكەري ماقساتتاعى سپۋتنيكتىك بايلانىس جۇيەلەرىن پايدالانۋعا, دوستاستىق ەلدەرى قارۋلى كۇشتەرىندەگى ۇشۋلار قاۋىپسىزدىگىنە قاتىستى قۇجاتتاردى قارادى.
سونىمەن بىرگە, اسكەري ىنتىماقتاستىقتى تەرەڭدەتۋ اياسىندا اۋە شابۋىلىنا قارسى قورعانىس, اسكەري ءبىلىم, اسكەري-قولدانبالى سپورت تۇرلەرى, سونداي-اق, كادرلىق جانە قارجىلىق قامتاماسىز ەتۋ سالالارىنداعى باسىمدىق بەرىلگەن زەرتتەۋلەردى جۇزەگە اسىرۋ ماسەلەلەرى قارالدى.
وتىرىستىڭ قورىتىندىسى بويىنشا اسكەري-تەحنيكالىق, الەۋمەتتىك-قۇقىقتىق جانە گۋمانيتارلىق سالالارداعى ءوزارا ءىس-قيمىلدى ءارى قاراي نىعايتۋ جونىندەگى قۇجاتتار قابىلداندى.
* * *
قازاقستان رەسپۋبليكاسىنىڭ قورعانىس ءمينيسترى سەرىك احمەتوۆ تمد-عا قاتىسۋشى مەملەكەتتەر قورعانىس مينيسترلەرى كەڭەسىنىڭ وتىرىسى شەڭبەرىندە رەسەي قورعانىس ۆەدومستۆوسىنىڭ باسشىسى سەرگەي شويگۋمەن كەزدەستى. كەزدەسۋ بارىسىندا قازاقستان مەن رەسەي اراسىنداعى اسكەري جانە اسكەري-تەحنيكالىق سالالاردا ءارى قاراي ءوزارا ءىس-قيمىل جاساۋ ماسەلەلەرى بويىنشا پىكىر الماسىلدى.
تاراپتار تمد پىشىنىندە كوپجاقتى اسكەري ىنتىماقتاستىق جۇيەسىن جەتىلدىرۋدىڭ, اسكەري سالاداعى ينتەگراتسيالىق ۇدەرىستەردى دامىتۋدىڭ ماڭىزدىلىعىن اتاپ ءوتتى.
كەزدەسۋ سوڭىندا قر قم مەن رف قم اراسىنداعى 1994 جىلعى 19 قازانداعى قر قك مەن رف قك اسكەري اەرودرومدارىندا قابىلداۋدى ۇيىمداستىرۋ, اەرودرومدىق-تەحنيكالىق قامتاماسىز ەتۋ جانە اسكەري اۋە كەمەسىن كۇزەتۋ تۋرالى كەلىسىمگە وزگەرتۋلەر ەنگىزۋ تۋرالى حاتتاماعا قول قويىلدى.
جاقسىباي سامرات, «ەگەمەن قازاقستان».
