قازۇۋ قۇرىلىسىنىڭ باستالۋىنا وراي ەستەلىك كاپسۋلانى قوندىرۋ شاراسىنا عىلىم جانە جوعارى ءبىلىم ءمينيسترى ساياسات نۇربەك, الماتى قالاسى اكىمىنىڭ ورىنباسارى الىشەر ابدىقادىروۆ, قازۇۋ-دىڭ باسقارما توراعاسى-رەكتور جانسەيىت تۇيمەباەۆ, بيزنەس جانە عىلىم وكىلدەرى, ەلىمىزدەگى جوعارى وقۋ ورىندارىنىڭ رەكتورلارى, ءىرى كومپانيا باسشىلارى قاتىستى.
جيىندا عىلىم جانە جوعارى ءبىلىم ءمينيسترى ساياسات نۇربەك «قازۇۋ-دىڭ تاريحى تەرەڭدە جاتىر. وقۋ ورداسى العاش اكادەميالىق قالاشىق مودەلىمەن سالىنعان بولاتىن. 1974-75 جىلداردان كەيىن ۋنيۆەرسيتەتكە كەڭ كولەمدە ينۆەستيتسيا قۇيىلماعان. سوندىقتان بۇگىنگى شارانىڭ ماڭىزى وتە جوعارى. جوسپاردى مەملەكەت باسشىسى قاسىم-جومارت كەمەل ۇلى قولداپ وتىر. قارا شاڭىراق قازۇۋ-دىڭ ەكىنشى تىنىسى اشىلدى دەۋگە بولادى», دەدى مينيستر.
شارا بارىسىندا الماتى قالاسى اكىمىنىڭ ورىنباسارى الىشەر ابدىقادىروۆ ءسوز سويلەپ, قازۇۋ ۇجىمى مەن ءبىلىم الۋشى جاستارىن ايتۋلى كۇنمەن قۇتتىقتادى.
ءوز كەزەگىندە ۋنيۆەرسيتەت رەكتورى جانسەيىت تۇيمەباەۆ قازۇۋ قۇرىلىسىنىڭ ءىى كەزەڭىن جۇزەگە اسىرۋ ستۋدەنتتەر ءۇشىن جاسالىپ جاتقان باستاما ەكەنىن جەتكىزىپ, «قازۇۋ ەلىمىزدەگى ىرگەلى, كوشباسشى وقۋ ورنى رەتىندە الەمگە تانىمال. ەلىمىزدىڭ جانە شەتەلدىڭ كوپتەگەن جاستارى زامانعا ساي ءبىلىم الۋ ءۇشىن قازاق ۇلتتىق ۋنيۆەرسيتەتىن تاڭدايدى. بۇگىندە وقۋ ورداسىندا 24 مىڭنان استام ستۋدەنت ءبىلىم الىپ جاتىر. ونىڭ ىشىندە 50-گە جۋىق مەملەكەتتەن كەلگەن 3 مىڭنان استام شەتەلدىك ستۋدەنت بار. قازۇۋ QS WUR الەمدىك رەيتينگىندە 150-ورىنعا كوتەرىلدى. مەملەكەت باسشىسى بۇل جوسپاردى وتكەن جىلى ۋنيۆەرسيتەتىمىزگە جۇمىس ساپارىمەن كەلگەندە كورىپ, بارلىق باستامالارىمىزعا قولداۋ كورسەتتى. بۇگىننەن باستاپ پرەزيدەنت بەكىتكەن جوسپار بويىنشا قازۇۋ قالاشىعىنىڭ ءىى كەزەڭىن ىسكە اسىرۋ جۇمىستارى باستالادى», دەپ اتاپ ءوتتى.
ايتۋلى شارا بارىسىندا كەلەشەك ۇرپاققا جولداۋ جازىلعان حات ارنايى كاپسۋلاعا سالىندى. بولاشاققا جازىلعان حاتتا: ء«بىز قازۇۋ-دى جاڭعىرتۋدىڭ جاڭا ءداۋىرى قارساڭىندا تۇرمىز. بۇل – ۋنيۆەرسيتەت ءۇشىن تاريحي ءسات. مىنە, بۇگىن قۇرىلىسى باستالعالى تۇرعان ستۋدەنتتەر قالاشىعىن جاڭعىرتۋدىڭ ءىى كەزەڭىندە جاسالاتىن جۇمىستىڭ ءبارى سىزدەردىڭ يگىلىكتەرىڭىز ءۇشىن. وسى جاتاقحانادا تۇرىپ, وقۋ كورپۋستارىندا بىلىممەن قارۋلانىپ, ەرتەڭگى كۇنى ەلگە قىزمەت ەتەدى دەگەن ۇلكەن ءۇمىتىمىز, زور سەنىمىمىز بار. ويتكەنى ەل بولاشاعى سىزدەردىڭ قولدارىڭىزدا» دەلىنگەن.
ءال-فارابي اتىنداعى قازۇۋ ءباسپاسوز قىزمەتىنىڭ مالىمەتىنشە, الداعى جوسپاردا قالاشىقتا 14 700 ورىندىق وقۋ عيماراتتارى, 12 مىڭ شارشى مەتر اكىمشىلىك كورپۋستار, 35 000 شارشى مەتر ەمحانا, 3000 شارشى مەتر سپورتتىق-ساۋىقتىرۋ ورتالىعى, قىزمەتكەرلەرگە ارنالعان تۇرعىن ءۇي, يننوۆاتسيالىق ورتالىق, عىلىمي-زەرتتەۋ ورتالىعى, تەحنوپارك جانە ستۋدەنتتەر مەن ماگيسترلارعا, دوكتورانتتارعا ءۇش گەكتار جەرگە 12 مىڭ توسەك-ورىنعا ارنالعان جاتاقحانالار بوي كوتەرەتىن بولادى. سونداي-اق قولدانىستاعى جاتاقحانالار, وقۋ كورپۋستارى مەن اكىمشىلىك عيماراتتار كۇردەلى جوندەۋدەن وتەدى.
