وسىلايشا, قازاقستان نوتارياتتىق ءىس-قيمىلدىڭ وسى ءتۇرىن تسيفرلىق فورماتقا اۋدارعان الەمدەگى العاشقى مەملەكەتتەردىڭ ءبىرى بولدى. بۇگىنگى تاڭدا سەنىمحاتتىڭ نوتاريالدى كۋالاندىرۋى تەك فرانتسيا مەن ليتۆادا ونلاين رەجىمدە قولجەتىمدى ەكەن.
ادىلەت ءمينيسترى ازامات ەسقاراەۆ جوبانىڭ مەملەكەت باسشىسىنىڭ تاپسىرماسى بويىنشا ۇكىمەتتىڭ «تسيفرلىق» باستامالارى شەڭبەرىندە (ونىڭ ىشىندە «Digital Justice» جوبالار پورتفەلى اياسىندا) ادىلەت, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى رەسپۋبليكالىق نوتارياتتىق پالاتامەن بىرلەسىپ ىسكە اسىرىلعانىن اتاپ ءوتتى.
– ەگەر بۇرىن سەنىمحاتتى رەسىمدەۋ ءۇشىن قۇجاتقا قول قويۋ جانە نوتاريۋس كۋالاندىرۋ ءۇشىن كليەنتتىڭ جەكە قاتىسۋى تالاپ ەتىلسە, ەندى نوتارياتتىق سەنىمحات ازاماتتارعا «eGov Mobile» ارقىلى قولجەتىمدى. ال بولاشاقتا ول بىرقاتار بانكتىك قوسىمشادا دا پايدا بولادى. «تسيفرلىق سەنىمحات» ونلاين رەجىمدە كليەنتتىڭ نوتاريۋسپەن بەينە بايلانىسى ارقىلى راسىمدەلەدى, – دەپ ناقتىلادى ازامات ەسقاراەۆ.
تسيفرلىق سەنىمحاتتى راسىمدەۋ ءۇشىن الدىمەن «eGov Mobile» قوسىمشاسىنا كىرۋ قاجەت. ودان كەيىن ءوتىنىمدى تولتىرىپ, وعان ەلەكتروندى تسيفرلىق قولتاڭبا (ەتسق) كومەگىمەن قول قويۋى كەرەك. ارتىنشا جەكە باسىن راستاۋ ءۇشىن قوسىمشانىڭ كومەگىمەن نوتاريۋسقا بەينە قوڭىراۋ شالادى. بەلگىلەنگەن تاريف بويىنشا نوتاريۋستىڭ قىزمەتتەرىنە اقى تولەيدى. سوڭىندا «تسيفرلىق قۇجاتتار» بولىمىندە تسيفرلىق سەنىمحات دايىن تۇرادى.
بۇل قىزمەتتى كەز كەلگەن نوتاريۋس ءوتىنىش بەرگەن ساتتە ەركىن كورسەتە الادى. «تسيفرلىق سەنىمحاتتى» مەملەكەتتىك ورگانداردىڭ بارلىعىندا نەمەسە تالاپ ەتۋ ورنى بويىنشا قاعاز تۇرىندەگى بالاماسىمەن تەڭەستىرۋگە بولادى. بۇل رەتتە, قاۋىپسىزدىكتى قامتاماسىز ەتۋ ماقساتىندا «eGov Mobile» قوسىمشاسىندا اۆتوريزاتسيالاۋ كەزىندە دە, وتىنىمگە قول قويۋ كەزىندە دە پايدالانۋشىنىڭ بيومەتريالىق دەرەكتەرىن قولدانا وتىرىپ ەلەكتروندى تسيفرلىق قولتاڭبا پايدالانىلادى.
– ءبىر جولى شەتەلدە كەزەكتى ءىس-ساپاردا جۇرگەن كەزدە مىناداي ماسەلەمەن بەتپە-بەت كەلدىم: بالامدى اتاسىمەن بىرگە باسقا قالاعا جىبەرۋ قاجەت ەدى. بىراق سەنىمحات راسىمدەي المادىم. مۇنداي جاعدايلار كوبىمىزگە تانىس دەپ ويلايمىن. ەندى ونىڭ شەشىمى بار. سەنىمحاتتى ونلاين رەجىمدە راسىمدەۋگە بولادى. «تسيفرلىق نوتاريات» «eGovMobile» ۇيالى قوسىمشاسى ارقىلى نوتاريالدى تۇردە كۋالاندىرىلاتىن سەنىمحاتتاردى ونلاين فورماتقا اۋىستىرۋعا مۇمكىندىك بەرەدى. ونى شەتەلدە جۇرگەن ازاماتتار دا پايدالانا الادى. مەملەكەت باسشىسى قاسىم-جومارت توقاەۆ سايلاۋالدى باعدارلاماسىندا «eGovMobile» ءموبيلدى قوسىمشاسىنىڭ بازاسىندا مەملەكەت حالىقپەن جانە بيزنەسپەن ءوزارا ءىس-قيمىل جاساۋى ءۇشىن ءتيىستى تسيفرلىق ينفراقۇرىلىم قۇرۋ كەرەكتىگى تۋرالى ايتقان بولاتىن. «تسيفرلىق نوتاريات» – وسى باعىتتاعى جۇمىستاردىڭ ءبىرى. الداعى ۋاقىتتا دا مەملەكەتتىك ورگاندارمەن بىرلەسىپ قازاقستاندىقتاردىڭ ءومىرىن جەڭىلدەتۋگە ارنالعان پايدالى جوبالاردى جالعاستىرامىز, – دەيدى تسيفرلىق دامۋ ءمينيسترى باعدات مۋسين.
نوتارياتتىق قىزمەتتى ونلاين فورماتقا اۋىستىرۋ – ۋاقىتتىڭ تالابى. ويتكەنى ەلىمىزدە بۇل قىزمەت تۇرىنە دەگەن سۇرانىس جوعارى. ماسەلەن, 2022 جىلى ەل تۇرعىندارىنان سەنىمحاتتى نوتاريالدى تۇردە راستاۋعا 2 ميلليونان استام ءوتىنىش كەلىپ تۇسكەن.
بۇگىندە ەلەكتروندى ۇكىمەت 600-دەن استام مەملەكەتتىك قىزمەت پەن سەرۆيستەردى ۇسىنادى. 12 ملن قولدانۋشى ءموبيلدى قوسىمشاعا تىركەلگەن.
