ءىس-شارا ايگىلى كومپوزيتور اسەت بەيسەۋوۆ سازىن جازعان اقىننىڭ «مارالدىم» انىمەن اشىلدى. كەيىننەن اقىنمەن جاقىن ارالاسقان قالامگەرلەردىڭ ەستەلىكتەرى بەينەسيۋجەت ارقىلى كورسەتىلدى. وقىرماندار كونفەرەنتسياسىنا بەينەبايلانىس ارقىلى قوسىلعان قازاقستان رەسپۋبليكاسى ۇلتتىق مۋزەيىنىڭ عىلىمي حاتشىسى, تاريح عىلىمدارىنىڭ كانديداتى سايالبەك عيززاتوۆ ۇلتتىق مۋزەيدىڭ اتىنان مەكتەپ-ليتسەيگە 25 كىتاپ جولدايتىنىن جەتكىزدى.
«قازاق ادەبيەتىنىڭ الىبى, ۇلت پوەزياسىنىڭ شوق جۇلدىزى مۇزافار الىمباەۆتىڭ شىعارمالارىن جاسوسپىرىمدەر قاي كەزدە دە وقىپ ءوسۋى كەرەك. جالپى, بالالاردىڭ قازاقتىڭ كەشەگى جانە بۇگىنگى كوركەم ادەبيەتىمەن ءبىر كىسىدەي تانىس بولۋى ءۇشىن قولدان كەلگەن جۇمىستاردى اتقارىپ جاتىرمىز. مەكتەپتە ادەبي كەشتەردى ءجيى ۇيىمداستىرامىز. سول ارقىلى ولاردىڭ رۋحاني قۇندىلىقتىڭ بۇلاعىنان سۋسىنداپ وسۋىنە دەن قويماقپىز», دەيدى مەكتەپ ديرەكتورى ەربول قايپۇلداەۆ.
تاعىلىمى مول ءىس-شارادا ءسوز العان كىتاپحاناشىلار گۇلبايرا تانىسقوجاەۆا, التىناي الىمبەكوۆا مۇزافار الىمباەۆ شىعارمالارىنىڭ تاربيەلىك ءمانى, پوەتيكالىق قۋاتى تۋرالى جاسوسپىرىمدەرگە مول مالىمەت بەرسە, قازاق ءتىلى مەن ادەبيەتى ءپانىنىڭ مۇعالىمى بازاركۇل توقتاعانوۆا ارناۋ ولەڭىن وقىدى.
وقىرماندار كونفەرەنتسياسىندا ءسوز العاندار مۇزافار الىمباەۆتىڭ شىعارماشىلىعى تۋرالى اڭگىمەلەپ قانا قويماي, بۇگىنگى جاس قالامگەرلەردىڭ تۋىندىلارى تۋرالى پىكىرلەرىن دە ورتاعا سالدى.
جامبىل وبلىسى,
تۇرار رىسقۇلوۆ اۋدانى, لۋگوۆوي اۋىلى
