قاسىم-جومارت كەمەل ۇلى قازاقستاندا عىلىم سالاسى كەنجەلەپ قالعانىن اتاپ ءوتتى.
«وكىنىشكە قاراي, ەلىمىزدە ۇزاق جىل بويى وعان باسا نازار اۋدارىلعان جوق. سوعان بايلانىستى شەشىمىن تاپپاي جاتقان ماسەلەلەر از ەمەس. ءتىپتى, بۇل سالا ارتتا قالدى دەۋگە بولادى. ءبىز وركەنيەتتى ەل بولامىز دەسەك, وسى ولقىلىقتىڭ ورنىن تولتىرۋىمىز كەرەك. سول سەبەپتى مەنىڭ جارلىعىممەن عىلىم جانە تەحنولوگيالار جونىندەگى ۇلتتىق كەڭەس قۇرىلدى. وعان پرەزيدەنت جانىنداعى كەڭەس مارتەبەسى بەرىلدى», دەدى پرەزيدەنت.
مەملەكەت باسشىسى ءوز سوزىندە پرەزيدەنت جانىنداعى كەڭەستىڭ ماڭىزىنا توقتالدى.
«بۇل – مەملەكەتتىڭ عىلىم سالاسىنداعى باسىمدىقتارىنا قاتىستى ۇسىنىم ازىرلەيتىن نەگىزگى قۇرىلىم. ءبىز كەڭەستى جاساقتاعان كەزدە ونىڭ قۇرامىنا ايرىقشا ءمان بەردىك. قازاق عىلىمىنا زور ەڭبەك سىڭىرگەن اعا بۋىن وكىلدەرىن جانە شەتەل عالىمدارىن شاقىردىق. الەمگە ايگىلى عىلىمي ورتالىقتاردا جۇمىس ىستەپ جۇرگەن جاس عالىمدارىمىز دا كەڭەستىڭ قۇرامىنا قوسىلدى.
بىزگە الدىڭعى تولقىننىڭ مول تاجىريبەسى, كەيىنگى تولقىننىڭ وزىق ءبىلىمى جانە تىڭ يدەيالارى اسا قاجەت. ولار ءوزارا ۇيلەسىم تاۋىپ, ەلىمىزدىڭ كادەسىنە جارايدى دەپ سەنەمىن», دەدى قاسىم-جومارت توقاەۆ.
