الماتى وبلىسى ءىىد بۇرىنعى باسشىسى سەرىك كۇدەباەۆتىڭ زاڭسىز مەملەكەتتىك شەكارادان ءوتۋى بويىنشا ۇلتتىق قاۋىپسىزدىك ورگاندارىمەن ءىس قوزعالعان ەدى. بىراق ءىستىڭ ماڭىزىن ەسكەرە وتىرىپ بۇل ءىستى باس پروكۋراتۋرا ءوزىنىڭ وندىرىسىنە قابىلداپ الدى. بۇل ءىس بويىنشا جەدەل تەرگەۋ توبى قۇرىلدى. ونىڭ قۇرامىنا بارلىق قۇقىق قورعاۋ ورگانىنىڭ ەڭ مىقتى, تاجىريبەلى تەرگەۋشىلەرى مەن جەدەل وكىلدەرى قوسىلدى. بۇل تۋرالى ءماجىلىس كۋلۋارىندا قر باس پروكۋروردىڭ ورىنباسارى جاندوس ومىراليەۆ ايتتى.
«قىرعىزستانعا كەتتى دەگەن مالىمەت بولعاندىقتان وسى ەلگە ءتيىستى ساۋال جولدادىق. وعان جاۋاپ الدىق. قىرعىز رەسپۋبليكاسى قۇقىق قورعاۋ ورگاندارىمەن بىرلەسىپ, بىرگە جۇمىس ىستەۋگە مۇمكىندىك الدىق. قازىر جۇمىس ءجۇرىپ جاتىر. قىرعىز رەسپۋبليكاسىنداعى ارىپتەستەرىمىزدىڭ مالىمەتىنە ساي كۇدەباەۆ قىرعىزستانعا بارعاننان كەيىن, ماناس اۋەجايى ارقىلى ىستانبۇل قالاسىنا ۇشىپ كەتتى دەگەن مالىمەت بەردى», دەدى جاندوس ومىراليەۆ.
جۋرناليستەر ودان «تۇركيا ەلىنە سۇرانىس نەگە جىبەرىلمەدى؟», دەپ سۇرادى.
«تۇركيامەن ەكى جاقتى كەلىسىمگە قول قويىلعان. ەكى جاقتى كەلىسىم ناتيجەسىندە تۇركياداعى قۇقىق قورعاۋ ورگاندارىمەن جۇمىسىمىزدى باستاپ كەتتىك. وسى ءىس بويىنشا بۇكىل مالىمەتتى, ناتيجەنى ايتقىم كەلمەيدى. سەبەبى بۇل مالىمەتتى ءبىز عانا ەمەس, سىزدەر عانا ەمەس, بۇكىل باق ءبىلىپ, ونىڭ ءوزى جانە جاقتاستارى دا ءبىلىپ, ءبىزدىڭ ىزدەستىرۋ امالدارىمىزعا كەدەرگىسىن تيگىزۋى مۇمكىن. سول سەبەپتى نە ءۇشىن بارلىق مالىمەتتى ايتپاي وتىرعانىمدى تۇسىنەسىزدەر عوي», دەپ جاۋاپ بەردى ول.
