بۇگىندە ۋنيۆەرسيتەتتە 24 مىڭنان استام ستۋدەنت ءبىلىم الىپ جاتىر. ونىڭ 12 مىڭى جاتاقحاناعا مۇقتاج. سوندىقتان ستۋدەنتتەر ءۇيى ۋنيۆەرسيتەت تاريحىنداعى ەڭ اۋقىمدى جوبالاردىڭ بىرىنە اينالىپ وتىر. قازىرگى كەزدە ستۋدەنتتەر قالاشىعىندا 3 گەكتار اۋماقتا 12 مىڭ ورىندىق جاتاقحانا قۇرىلىسىنا دايىندىق ءجۇرىپ جاتىر. «جوندەۋ كەزىندە عيماراتتاردىڭ قاسبەتى جاڭارتىلىپ, بارلىق بولمەنىڭ قابىرعالارى قايتا سىلانىپ, ارلەندى. ەسىك-تەرەزە, ەدەن توسەنىشتەرى مەن جيھازدار ساتىپ الىندى. سونىمەن قاتار ەلەكتر جۇيەسى جاڭارتىلدى. جاتاقحانالارداعى ءار سەكتسياعا زاماناۋي دۋش كابينالارى قويىلىپ, سانتەحنيكالىق جابدىقتار اۋىستىرىلدى», دەدى ۋنيۆەرسيتەتتىڭ باسشىسى جانسەيىت تۇيمەباەۆ.
بۇدان كەيىن مەيماندار ۋنيۆەرسيتەتتىڭ جاعداياتتىق باسقارۋ ورتالىعىنىڭ قىزمەتىمەن تانىستى. وندا قاۋىپسىزدىك جانە باقىلاۋ جۇيەسى, ۋنيۆەرسيتەتتىڭ اقپاراتتىق باعدارلامالارى مەن بايلانىس ورتالىعى ورنالاسقان.
وقۋ ورداسىنىڭ پروتسەستىك يننوۆاتسيالار ورتالىعى, ينجينيرينگ جانە جوعارى تەحنولوگيالار كلاستەرى مەن جەردى قاشىقتان زوندتاۋ ورتالىقتارىنىڭ جۇمىستارى دا بۇگىندە زاماناۋي عىلىمدى يگەرۋمەن ۇشتاساتىن ورتالىقتار رەتىندە دامىپ كەلەدى. وسى ورايدا عالىمداردىڭ عىلىمي كورمەسىنە قاتىسقان مەيماندارعا نانوماتەريالدار نەگىزىندەگى داتچيكتەر, ەنەرگيانى ۇنەمدەيتىن شامدار, قان تامىرلارى پاتولوگياسىنىڭ الدىن الۋ جانە ەمدەۋ, تۋريستىك تسيفرلىق كونتەنتتى جاڭعىرتۋعا ارنالعان ءموبيلدى قوسىمشالار, پانورامالىق 3D تۋرلار, ينتەراكتيۆتى كارتالار جانە QR كودتار, نانوماتەريالدار نەگىزىندەگى سۋپەركوندەنساتورلار, دەپرەسسيانىڭ پسيحوفيزيولوگيالىق ماركەرلەرى جانە باسقا دا يننوۆاتسيالىق جوبالار تانىستىرىلدى.
دارىلىك وسىمدىكتەردى عىلىمي-زەرتتەۋ ورتالىعىنىڭ ديرەكتورى جانار جەڭىس مەكەمەنىڭ نەگىزگى ماقساتى ەلىمىزدە وسەتىن دارىلىك وسىمدىكتەردى زەرتتەۋ ەكەنىن ايتىپ, اتقارىلىپ جاتقان جۇمىستار جايلى باياندادى. عالىمنىڭ ايتۋىنشا, بۇگىندە ورتالىق سوڭعى ۇلگىدەگى قۇرىلعىلارمەن جابدىقتالعان. قازىرگى تاڭدا وندىرىستە تۇماۋ مەن باۋىر اۋرۋلارىنىڭ الدىن الاتىن, يممۋنيتەتتى كوتەرەتىن, كوروناۆيرۋس ينفەكتسياسىنا قارسى بيولوگيالىق بەلسەندى قوسپالار دايىندالادى. قانت ديابەتىن تومەندەتەتىن, قان قىسىمىن رەتتەيتىن, اسقازان-ىشەك جۇيەسىنىڭ جۇمىسىن جاقسارتاتىن, يممۋنيتەتتى كوتەرەتىن فيتوشايلار وندىرىلەدى.
عىلىمدى وندىرىسپەن ۇشتاستىرىپ وتىرعان عالىمدار جۇمىسىمەن تانىسقان التاي كولگىنوۆ ۇجىمعا ساتتىلىك تىلەپ, ءوندىرىستى دامىتۋدىڭ ماڭىزىنا توقتالدى.
