ەل پرەزيدەنتى بارلىق باياندامالارى مەن ماقالالارىندا, جولداۋلارى مەن ۇندەۋلەرىندە, سونداي-اق سايلاۋالدى باعدارلاماسىندا دا عىلىمي-تەحنيكالىق جانە يننوۆاتسيالىق قىزمەتتى دامىتۋدى ۇنەمى نازاردا ۇستاپ كەلەدى. عىلىم سالاسىنداعى مەملەكەتتىك ساياساتتى جانە ۇلتتىق عىلىمي جۇيەنى باسقارۋدى جەتىلدىرۋ ماقساتىندا قازاقستان پرەزيدەنتى جانىنداعى عىلىم جانە تەحنولوگيالار جونىندەگى ۇلتتىق كەڭەس قۇرىلدى.
سونىمەن قاتار جاقىندا ەل ۇكىمەتى وتاندىق عىلىمنىڭ باسەكەگە قابىلەتتىلىگىن ارتتىرىپ, ۇلتتىق دەڭگەيدەگى وزەكتى پروبلەمالارىن شەشۋ ءۇشىن جوعارى ءبىلىمدى جانە عىلىمدى دامىتۋدىڭ 2023-2029 جىلدارعا ارنالعان تۇجىرىمداماسىن بەكىتتى. ەندى جوعارى وقۋ ورىندارى ءوز قىزمەتىندە وسىنداي ماقساتتى باعدارلامالار مەن ءنورماتيۆتى قۇجاتتاردى باسشىلىققا الا وتىرىپ, ىزدەنىستەرىن جالعاستىرادى.
قازىرگى ۋاقىت جاڭا تەحنولوگيالاردى ويلاپ تاۋىپ, وندىرىسكە ەنگىزۋدى, يننوۆاتسيالىق ۇدەرىستەر مەن زەرتحانالاردى جانداندىرۋدى, ۋنيۆەرسيتەت عىلىمىن دامىتىپ, عىلىمي ماماندار دايارلاۋدى تالاپ ەتەدى. وسى باعىتتا ۇكىمەت قاۋلىسىمەن زەرتتەۋ ۋنيۆەرسيتەتى مارتەبەسى بەرىلگەن ءال-فارابي اتىنداعى قازۇۋ ەل ەكونوميكاسىنىڭ وركەندەۋىنە اتسالىسىپ, پايدا اكەلەتىن عىلىمي-يننوۆاتسيالىق جوبالاردى جۇزەگە اسىرۋ ءۇشىن الدىنا جاڭا مىندەتتەر قويىپ وتىر. «QS WUR» حالىقارالىق رەيتينگىندە 150-ورىنعا يە قازۇۋ 2022-2026 جىلدارعا ارنالعان دامۋ باعدارلاماسىن ازىرلەگەن بولاتىن. قۇجاتتا جوعارى وقۋ ورنىنىڭ مۇمكىندىكتەرى, مەملەكەتتىك ساياسات جانە ەلىمىزدىڭ جوعارى جانە جوعارى وقۋ ورنىنان كەيىنگى ءبىلىم بەرۋ جۇيەسىندەگى زاماناۋي ترەندتەر ەسكەرىلدى. نەگىزگى ماقسات – الەمدىك دەڭگەيدەگى زەرتتەۋ ۋنيۆەرسيتەتىنە ترانسفورماتسيالانۋ. ال ترانسفورماتسيا كەزىندە ۋنيۆەرسيتەت باستى ءتورت ستراتەگيالىق مىندەتتى ورىندايدى.
بىرىنشىدەن, جوعارى جانە جوعارى وقۋ ورنىنان كەيىنگى ءبىلىم بەرۋدىڭ بارلىق دەڭگەيىندە عىلىمي قىزمەتتى جانە ءبىلىم بەرۋ ۇدەرىسىن ينتەگراتسيالاۋ.
ەكىنشىدەن, ۋنيۆەرسيتەتتە ءبىلىم بەرۋدىڭ پەرسپەكتيۆالى مودەلىن قالىپتاستىرۋ جانە اكادەميالىق كوشباسشىلىقتى قامتاماسىز ەتۋ.
ۇشىنشىدەن, ۋنيۆەرسيتەت عىلىمىنىڭ ەلدىڭ الەۋمەتتىك-ەكونوميكالىق دامۋىنا قوساتىن ۇلەسىن ارتتىرۋ.
تورتىنشىدەن, ۋنيۆەرسيتەتتىڭ ورنىقتى دامۋىن قامتاماسىز ەتۋ ءۇشىن كورپوراتيۆتىك باسقارۋدىڭ ءتيىمدى مودەلىن قۇرۋ.
اتالعان ستراتەگيالىق مىندەتتەردى ورىنداۋ ۇلكەن مۇمكىندىكتەرگە جول اشادى. اتاپ ايتقاندا, وسى كۇنگە دەيىن جوبالارىن ءتۇرلى جاعدايلارعا بايلانىستى وندىرىسكە جەتكىزە الماعان عالىمدار زەرتتەۋلەرىن جەتىلدىرىپ قانا قويماي, ءارى قاراي كوممەرتسيالاندىرا الادى.
جوعارى جانە جوعارى وقۋ ورنىنان كەيىنگى ءبىلىم بەرۋدىڭ بارلىق دەڭگەيىندە عىلىمي قىزمەت پەن ءبىلىم بەرۋ ۇدەرىسىن ينتەگراتسيالاۋ مىندەتى ۇلكەن ماڭىزعا يە. بۇل رەتتە عىلىم, ءبىلىم بەرۋ جانە ءوندىرىس سالاسىنداعى ينتەگراتسيالىق ۇدەرىستەر توعىساتىن ورتاق بۋىن – ۋنيۆەرسيتەت. سوندىقتان زەرتتەۋ باعدارلامالارىن ىسكە اسىرۋ كەزىندە ەڭ الدىمەن وندىرىستىك سالانىڭ تاپسىرىسى بويىنشا عىلىمي-قولدانبالى زەرتتەۋلەر مەن ازىرلەمەلەردى دامىتۋ تالاپ ەتىلەدى. بۇعان قوسا, ءبىلىم بەرۋ, عىلىم جانە ءوندىرىس اراسىن بايلانىستىراتىن يننوۆاتسيالىق ينفراقۇرىلىمدى جەتىلدىرىپ, عىلىمي-يننوۆاتسيالىق ورتالىقتار, تەحنوپاركتەر قۇرۋ, جۇمىستى جانداندىرۋ ءىس-شارالارى جۇرگىزىلەدى. سونداي-اق «عىلىم ورداسى» مەن عىلىمي-زەرتتەۋ ينستيتۋتتارىنىڭ تىعىز ينتەگراتسياسى وقۋ ورنىنىڭ ىنتىماقتاستىق اياسىن كەڭەيتە تۇسپەك.
بۇگىندە ۋنيۆەرسيتەتتە عىلىمي جوبالاردىڭ ينۆەستيتسيالىق تارتىمدىلىعىن ارتتىرۋ ءۇشىن ناقتى سەكتوردىڭ تەحنولوگيالىق مىندەتتەرىن جيناقتاۋ تەتىگى ازىرلەندى. وسى ماقساتتا ءبىز عىلىمي-زەرتتەۋ زەرتحانالارى مەن ۇجىمدىق پايدالانۋ ورتالىقتارىنىڭ بازاسىن كەڭەيتەمىز. وقىتۋشى-پروفەسسورلار قۇرامى مەن ءبىلىم الۋشىلار عىلىمي-زەرتتەۋ قىزمەتىنە جانە عىلىمي جوبالاردى ىسكە اسىرۋعا جان-جاقتى تارتىلادى. الەمدىك عىلىمي كەڭىستىككە ينتەگراتسيانى ارتتىرۋ قازۇۋ عالىمدارىنىڭ الەمدىك جەتەكشى عىلىمي جانە زەرتحانالىق كەشەندەر بازاسىنداعى حالىقارالىق ۇجىمدارعا قاتىسۋى ارقىلى جۇزەگە اسىرىلاتىن بولادى. سونىمەن قاتار حالىقارالىق كوللابوراتسيانى دامىتۋ ماقساتىندا عالىمداردىڭ عىلىمي تاعىلىمدامالارىنىڭ سانى ارتادى. ۋنيۆەرسيتەت نەعۇرلىم وزەكتى باعىتتار بويىنشا عىلىمي جوبالاردى ورىنداۋ ماقساتىندا قازاقستاندىق جانە حالىقارالىق جەتەكشى جوعارى وقۋ ورىندارىمەن جانە عىلىمي-زەرتتەۋ ۇيىمدارىمەن ىنتىماقتاستىقتى كەڭەيتەدى.
ال ۋنيۆەرسيتەتتىڭ زەرتتەۋ الەۋەتى پلازما فيزيكاسى, جوعارى مولەكۋلالىق قوسىلىستار حيمياسى, ماتەماتيكالىق جانە كومپيۋتەرلىك مودەلدەۋ, بيوتەحنولوگيا, مولەكۋلالىق بيولوگيا جانە گەنەتيكا, قوعامدىق دەنساۋلىق ساقتاۋ, تاريح جانە ارحەولوگيا, پسيحولوگيا سىندى عىلىمي مەكتەپتەردى دامىتۋ ارقىلى ارتادى.
ۋنيۆەرسيتەت عىلىمىنىڭ باسىم باعىتتارىن انىقتاۋعا باعىتتالعان پانارالىق زەرتتەۋ توپتارى قۇرىلادى. وسى باعىتتارعا عىلىمي الەۋەت پەن رەسۋرستاردى شوعىرلاندىرا وتىرىپ, عىلىمي زەرتتەۋلەر ناتيجەلەرىنىڭ ينۆەستيتسيالىق تارتىمدىلىعىن, تەحنولوگيالار ترانسفەرتىن جانە كوممەرتسيالاندىرۋدى قامتاماسىز ەتە الامىز.
وقىتۋشىلار مەن ءبىلىم الۋشىلاردىڭ زەرتتەۋشىلىك قۇزىرەتتەرىن ارتتىرۋ ماقساتىندا قازاقستاندىق جانە حالىقارالىق ۇيىمداردىڭ جەتەكشى ساراپشىلارىن تارتا وتىرىپ, عىلىمي زەرتتەۋلەردىڭ كەشەندى ادىستەرىن پايدالانۋ جانە عىلىمي جاريالانىمدار مەن گرانتتارعا وتىنىمدەر دايىنداۋ داعدىلارىنا وقىتۋ بويىنشا ترەنينگتەر ۇيىمداستىرىلاتىن بولادى.
كوممەرتسيالىق الەۋەتى بار, عىلىمدى قاجەت ەتەتىن جانە يننوۆاتسيالىق جوبالاردى ورىنداۋ ءۇشىن ۋنيۆەرسيتەتتىڭ بيۋدجەتتەن تىس قاراجاتى ەسەبىنەن گرانتتىق قولداۋ جۇيەسى ەنگىزىلەدى. ىرگەلى جانە قولدانبالى زەرتتەۋلەردىڭ باسىم باعىتتارى بويىنشا عىلىمي زەرتحانالار مەن ورتالىقتاردى تۇبەگەيلى جاڭارتۋ جۇزەگە اسىرىلادى. وزىق جابدىقتارمەن جانە تسيفرلىق تەحنولوگيالارمەن جابدىقتاۋ قازۇۋ-دىڭ عىلىمي-زياتكەرلىك ورتاسىن قۇرۋعا مۇمكىندىك بەرەدى.
بۇل باعىتتاردا جۇيەلى جۇمىس ىستەۋ ءۇشىن قازىرگى تاڭدا عىلىمي كادرلاردىڭ الەۋەتى جەتكىلىكتى. ۋنيۆەرسيتەتتە ۇعا, كعا-نىڭ 22 اكادەميگى, ۇعا-نىڭ 11 كوررەسپوندەنت-مۇشەسى, عىلىم جانە تەحنيكا سالاسىنداعى مەملەكەتتىك سىيلىقتىڭ 14 لاۋرەاتى, 585 عىلىم دوكتورى, 489 PhD, 801 عىلىم كانديداتى ەڭبەك ەتەدى.
بىلتىردان بەرى عىلىمي ينستيتۋتتارمەن جانە ۇيىمدارمەن ءوزارا ينتەگراتسيا كۇشەيتىلدى. الەمدىك تەندەنتسيالاردى زەردەلەي وتىرىپ, قازۇۋ-دا بالامالى ەنەرگەتيكا, گەندىك ينجەنەريا, «BigData», «DataScience», ترانسلياتسيالىق مەديتسينا, ۋلترا دالدىكتەگى نەيروندىق جۇيەلەر, كيبەرقورعانىس, نەيروبيولوگيا عىلىمي باعىتتارى بويىنشا ءبىلىم بەرۋ باعدارلامالارىن وقۋ ۇدەرىسىنە ەنگىزدىك. بۇل ماماندىقتار قازاقستاننىڭ ەكونوميكالىق تۇراقتىلىعى ءۇشىن ۇلكەن پايدا اكەلەدى دەگەن سەنىمدەمىز.
بۇگىنگى تاڭدا ۋنيۆەرسيتەتىمىز بىرەگەي عىلىمي-يننوۆاتسيالىق ينفراقۇرىلىمى بار ءىرى زياتكەرلىك كورپوراتسياعا اينالدى. 16 فاكۋلتەتتەن, 8 عىلىمي-زەرتتەۋ ينستيتۋتىنان, فيزيكا-حيميالىق زەرتتەۋ جانە تالداۋ ادىستەرى ورتالىعىنان, عىلىمي-تەحنولوگيالىق پاركتەن, اشىق ۇلگىدەگى ۇلتتىق نانوتەحنولوگيالىق زەرتحانادان, 6 ينستيتۋت پەن 12 الەۋمەتتىك-گۋمانيتارلىق بەيىندەگى عىلىمي-زەرتتەۋ ورتالىعىنان, 3 عىلىمي-زەرتتەۋ ورتالىعىنان, زەرتحانالار جانە جاراتىلىستانۋ بەيىندى ينستيتۋتىنان, 97 وندىرىستىك فيليالدان قۇرالادى. جىل سايىن عالىمدار تاراپىنان جالپى سانى 8 ملرد تەڭگەدەن اساتىن 300 عىلىمي-تەحنيكالىق جوبا مەن ءتۇرلى باعدارلاما دايىندالادى.
قازۇۋ عالىمدارىنىڭ عىلىمي يننوۆاتسيا سالاسى بويىنشا دا قوعامعا ايتار جاڭالىعى بار. ماسەلەن, ۋنيۆەرسيتەتتىڭ بيوتەحنولوگيا كافەدراسىنىڭ دوتسەنتى ليۋدميلا يگناتوۆا باكتەريالاردىڭ كومەگىمەن ەكولوگيالىق تازا, سۋدا ەرىگىشتىك جانە ىدىراۋ قاسيەتتەرى بار بيولوگيالىق پلاستيك ويلاپ تاپتى. بيوپلاستيكانى شىعارۋ ءۇشىن بيورەاكتور, ءوسىرۋ ورتاسى جانە شتامم جەتكىلىكتى. ماتەريالدىڭ ءوزىن ونەركاسىپتىك اۋقىمدا وندىرۋگە بولادى. بيوپلاستيك مۇنايدان الىنعان پلاستيكتى الماستىرا الادى. وسىلايشا, جاقىن بولاشاقتا پلاستماسسا ءداۋىرى وتكەنگە اينالۋى مۇمكىن. جاھاندانۋ داۋىرىندە ادامزات ءۇشىن ەكولوگيا مەن ادامداردىڭ دەنساۋلىعىن قولدايتىن پايدالى زاتتار جاساۋ قاجەت. وسى تۇرعىدان قازۇۋ عالىمدارىنىڭ جاڭالىعى قازىرگى زاماننىڭ ەڭ ۇلكەن جەتىستىگى بولۋى مۇمكىن.
سونداي-اق قازۇۋ تەحنولوگيالاردى كوممەرتسيالاندىرۋعا ارنالعان 2 ملرد تەڭگەدەن استام گرانتتىق قاراجاتتى يگەردى. 1400-كە جۋىق ونەرتابىس پاتەنتتەلدى. ۋنيۆەرسيتەتتە 10-نان استام يننوۆاتسيالىق ءوندىرىس جۇمىس ىستەيدى. اتاپ ايتقاندا, شۋنگيت كونتسەنتراتى, پوليەفيرلى شايىر, گازرازريادتى شامدار, دارىلىك زاتتار مەن كومىرتەكتى نانوقۇرىلىمداردى جانە تاعى باسقا يننوۆاتسيالىق ءونىم شىعاراتىن شاعىن تسەحتار ىسكە قوسىلعان. جالپى, ۋنيۆەرسيتەت بويىنشا عالىمدارىمىز ازىرلەگەن 100-دەن استام عىلىمي-زەرتتەۋ جوباسى بار. ستۋدەنتتىك بيزنەس-ينكۋباتور شەڭبەرىندە 70-تەن استام ستۋدەنتتىك يننوۆاتسيالىق جوبا جۇزەگە اسىرىلۋدا.
قازۇۋ-دىڭ عىلىمي-تەحنولوگيالىق پاركى «ترانسنەفت» ورتالىق ازيا عىلىمي-زەرتتەۋ جانە جوبالاۋ ينستيتۋتىمەن بىرلەسىپ «ۇلۋتاس پليتكالارىنا جاعۋعا ارنالعان سۇيىق تۇردەگى كالتسي كاربوناتىنان الىنعان پوليكريستالدى سىنعىش ۇنتاقتى تاۋ جىنىستارىنىڭ بىرلەسكەن ءوندىرىسىن قۇرۋ» يننوۆاتسيالىق جوباسىنىڭ جۇمىس بارىسىن باقىلايدى.
تاعى دا ءبىر يننوۆاتسيالىق جوبا – «مۇناي ۇڭعىمالارىن اسفالت-شايىر-ءپارافيندى جانە گيدراتتى شوگىندىلەردەن تازارتۋ تەحنولوگياسى». عالىمدار ازىرلەگەن مۇناي شوگىندىلەرىن تازارتۋ اۆتوماتتى قوندىرعىسى مۇناي قاعىن تسيكلدىك جانە كۇندەلىكتى ءوندىرىس كەزىندە تازارتادى. مۇنداي ءۇردىس مۇنايدى ۇزدىكسىز وندىرۋگە مۇمكىندىك بەرەدى. بۇل قۇرىلعى وڭايلىقپەن توزبايدى, ونىڭ توزۋعا توزىمدىلىگى وتە جوعارى. قۇرىلعىنى پايدالانۋ قولدانىستاعى تازالاۋعا ارنالعان وپەراتسيالىق شىعىنداردى 80 پايىزعا دەيىن وڭتايلاندىرىپ, تازالاۋ كەزىندە مۇنايدىڭ جوعالۋىنان ساقتايدى. سونداي-اق ونىڭ توگىلۋ قاۋپىن ازايتۋعا مۇمكىندىك بەرىپ, جۇمىس كەزىندە ادامعا تەرىس اسەرىن ازايتادى.
ۋنيۆەرسيتەت عىلىمىنىڭ ناتيجەسى ەل ەكونوميكاسى مەن تۇتاس قوعامعا پايدا اكەلۋى ءتيىس. وسى ماقساتتاعى قازۇۋ-دىڭ دارىلىك وسىمدىكتەردىڭ عىلىمي-زەرتتەۋ ورتالىعى بازاسىندا وسىمدىك شيكىزاتى نەگىزىندە يننوۆاتسيالىق ونىمدەردىڭ از تونناجدى ءوندىرىسى ىسكە قوسىلدى. قازۇۋ پروفەسسورى جانار جەڭىس جەتەكشىلىك ەتەتىن بۇل جوباعا قىتاي حالىق رەسپۋبليكاسى تاراپىنان ارنايى گرانت ءبولىندى. قازىرگى ساتتە ۇزدىكسىز جۇمىس ىستەپ, اسقىنعان رەسپيراتورلىق-ۆيرۋستىق ينفەكتسيالاردىڭ تارالۋىنا قارسى مۋلتي-تابيعي قوسپالار شىعارىلىپ جاتىر.
ال 12 ساۋىردە, ياعني بۇگىن «استانا» حالىقارالىق قارجى ورتالىعىندا وتەتىن تەحنولوگيالاردى كوممەرتسيالاندىرۋ رەاكتورىنا قازۇۋ-دىڭ ءۇش عىلىمي جوباسى ىرىكتەلىپ الىندى. ءىرى بيزنەس وكىلدەرى قاتىساتىن اۋقىمدى جيىندا «NANOQUQIRT» جاڭا پرەپاراتىن ءوندىرۋ جانە قازاقستان نارىعىنا شىعارۋ جوباسىنىڭ جەتەكشىسى, قازۇۋ پروفەسسورى مۇحامبەتقالي بۇركىتباەۆ, «جاقسارتىلعان سيپاتتامالارى بار پوليەفيرلى شايىرلارعا نەگىزدەلگەن بوياۋ ماتەريالدارىن الۋدىڭ جاڭا تەحنولوگياسى» جوباسىنىڭ جەتەكشىسى, قاۋىمداستىرىلعان پروفەسسورىمىز عاليا يرمۇحامەتوۆا, «جەمىس-جيدەك داقىلدارىن تەرەڭ وڭدەۋ ءۇشىن مۇزداتۋ, كەپتىرۋ ۇدەرىسىن پايدالانۋ» جوباسىنىڭ جەتەكشىسى, فيزيكا-حيميالىق تالداۋ ادىستەرى ورتالىعىنىڭ اعا عىلىمي قىزمەتكەرى, PhD ەربول يحسانوۆ ءوز جوبالارىن تانىستىرادى. بۇل عالىمدارعا كوممەرتسيالاندىرۋعا دايىن جوبالارىن بيزنەس-ارىپتەستىك ارقىلى ودان ءارى دامىتۋعا جانە وندىرىسكە كەڭىنەن ەنگىزۋگە مۇمكىندىك بەرەدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي يننوۆاتسيالىق جوبالارى مەن ولاردىڭ زياتكەرلىك مەنشىكتەرى عالىمدار ءۇشىن دە, بيزنەس وكىلدەرى ءۇشىن دە اسا قۇندى اكتيۆ.
زەرتتەۋ ۋنيۆەرسيتەتى مارتەبەسى بىزدەن عىلىمي باعىتتاردى تەرەڭدەتۋدى تالاپ ەتەدى. وسى ورايدا ۋنيۆەرسيتەتتە ستۋدەنتتەر مەن جاس عالىمداردىڭ كاسىبي باعىتىن ارتتىرۋ ماقساتىندا جانە ولاردىڭ بولاشاق ماماندىقتارى بويىنشا عىلىمي-زەرتتەۋ جۇمىستارىن جۇزەگە اسىرۋعا مۇمكىندىكتەر بەرەتىن بىرقاتار ناقتى شارالار قولعا الىنىپ جاتىر. بۇگىندە ءار كافەدرا مەن فاكۋلتەتتىڭ عىلىمي جوبالارىنا تالداۋ جاساۋ ارقىلى ەكونوميكالىق اسەرىن انىقتاپ وتىرمىز. جوبالاردى قالالار مەن جالپى ەلدەگى بەلگىلى ءبىر ماسەلەلەردى شەشۋگە تىكەلەي بايلانىستى وزەكتى تاقىرىپتار بويىنشا ءبولۋ ماڭىزدى. كوممەرتسيالاندىرۋعا الەۋەتتى عىلىمي جوبالار ەكونوميكانىڭ ناقتى سەكتورىنا جۇمىس ىستەۋى كەرەك. جوبالاردىڭ تاقىرىبىن مەملەكەتتىك باعدارلامالارعا نازار اۋدارا وتىرىپ, وندىرىستىك سەكتورمەن بايلانىس ورناتۋ ارقىلى تاڭداۋعا باسىمدىق بەرىلدى.
ۋنيۆەرسيتەتتەگى بارلىق عىلىمي جوبانى سارالاپ, وندىرىسكە قاجەتتىلەرىن ىرىكتەپ, كوممەرتسيالاندىرۋ تەتىكتەرىن جەتىلدىرۋ ءۇشىن قازۇۋ جانىنان «عىلىمدى دامىتۋ كەڭەسى» جاساقتالىپ جاتىر. بۇعان قوسا, الداعى ۋاقىتتا عالىمدارىمىزعا قولداۋ كورسەتۋ, ۋنيۆەرسيتەت عىلىمىن ىلگەرىلەتۋ جانە دامىتۋ ماقساتىندا «عىلىمي يننوۆاتسيالىق بەلدەۋ» قۇرۋدى كوزدەپ وتىرمىز.
جاس عالىمداردىڭ, تالانتتى ستۋدەنتتەردىڭ شىعارماشىلىق, عىلىمي الەۋەتىن دامىتۋدا ۋنيۆەرسيتەت بارلىق قاجەتتى جاعدايدى جاساپ وتىر. ولارمەن ەركىن فورماتتا كەزدەسىپ, عىلىمداعى وزەكتى ماسەلەلەردى تالقىلاپ, جاڭا ۇسىنىس-يدەيالاردى سارالاپ وتىرۋ ءۇشىن «جاس عالىمدار كلۋبى» مەن عىلىمي ازىرلەمەلەردى وندىرىسكە ەنگىزۋگە جول اشاتىن «جاس عالىمدار قورى» قۇرىلماق.
قورىتا ايتقاندا, جاڭا قازاقستاننىڭ قالىپتاسۋى ەلدەگى عىلىم جانە عىلىمدى قاجەت ەتەتىن تەحنولوگيالاردىڭ دامۋىنا تىكەلەي بايلانىستى. ال عىلىمنىڭ ىلگەرىلەۋى عالىمداردىڭ ەڭبەكتەرىمەن جانە ولاردىڭ جاڭالىقتارىنىڭ قۇندىلىعىمەن انىقتالادى. سوندىقتان بۇگىنگى تاڭدا ۋنيۆەرسيتەت عىلىمىن دامىتۋ – بارىمىزگە ورتاق مىندەت.
جانسەيىت تۇيمەباەۆ,
ءال-فارابي اتىنداعى قازۇۋ باسقارما توراعاسى-رەكتور
