سونىڭ ءبىرى – «CPG International» كومپانياسىنىڭ وكىلدەرىمەن كەزدەسكەن الماتى وبلىسىنىڭ اكىمى مارات سۇلتانعازيەۆ ساۋلەت-قۇرىلىس جوبالاۋ سونداي-اق, ءبىلىم بەرۋ جانە دەنساۋلىق ساقتاۋ سالاسىنداعى جوبالاردى ىسكە اسىرۋ جانە ىنتىماقتاستىقتى ارتتىرۋ ماقساتىندا مەموراندۋمعا قول قويدى.
وڭىرگە العاش رەت كەلىپ وتىرعان سينگاپۋرلىق كومپانيا وكىلدەرىمەن جۇزدەسكەن مارات ەلەۋسىز ۇلى قالانىڭ 53 جىلدىق تاريحى بارىن ايتىپ, ەندىگى كەزەكتە جاڭا شاھاردىڭ قۇرىلىسىنا دەن قوياتىندىقتارىن جەتكىزدى.
– 1970 جىلى سالىنعان قالانىڭ ينفراقۇرىلىمدىق الەۋەتىن جاقسارتۋ قاجەت. بۇگىنگى تاڭدا وبلىس ورتالىعىنىڭ دامۋ جوسپارى جاساقتالدى. بىزدە ەڭ باستى ەكى جوبا بار. ولار: G4 City مەن قوناەۆ قالاسى, – دەدى وبلىس اكىمى.
سونىمەن قاتار, ءوڭىر باسشىسى كەلەلى كەزدەسۋدىڭ وتۋىنە وتكەن ايدا ايماق اتىنان سينگاپۋرعا ساپار شەككەن دەلەگاتسيا جۇمىسىنىڭ قورىتىندىسى مۇرىندىق بولعانىن اشىپ ايتتى.
ال قازاقستانعا تۇڭعىش رەت كەلىپ تۇرعان سينگاپۋرلىقتار وبلىستا اتقارىلار تالاي ءىس بار ەكەنىن باعامداپ ۇلگەرگەندىكتەرىن, الداعى 25 جىلدا ويعا العان جوسپارلاردى ورىنداۋدا ءوز تاراپتارىنان قانداي ۇلەس قوسۋعا مۇمكىندىكتەر بارىن تىزبەكتەپ شىققاندىعىن تىلگە تيەك ەتتى.
– «CPG International» – ازياداعى ەڭ ءىرى ينجەنەرلىك كومپانيالاردىڭ ءبىرى. اقش, ۇلىبريتانيا, قىتاي, ءۇندىستان جانە تاعى باسقا مەملەكەتتەردى قوسا العاندا, الەمنىڭ 20-دان استام ەلىندە فيليالدارى بار. كومپانيا اۋەجايلار, كوپىرلەر, تەمىرجولدار, تۋننەلدەر, ساۋدا ورتالىقتارى سياقتى ازاماتتىق جانە ونەركاسىپتىك نىسانداردى جوبالاۋعا جانە سالۋعا ماماندانعان. مىسالعا الاتىن بولساق, حالىقارالىق ۆەتنامداعى «دانانگ» اۋەجايى, «تان توك سەنگ» اۋرۋحاناسى جانە سينگاپۋرداعى «چانگي» اۋەجايى ءبىزدىڭ ىقپالىمىزبەن بوي كوتەرگەن, – دەدى كومپانيانىڭ باس اتقارۋشى ديرەكتورى ۆينسەنت لو.
الماتى وبلىسىنا ات ءىزىن سالعان «CPG International» كادرلاردى دايارلاۋمەن جانە دامىتۋمەن اينالىسادى جانە بۇكىل الەم بويىنشا بىرنەشە ۋنيۆەرسيتەت پەن عىلىمي ينستيتۋتتىڭ سەرىكتەسى بولىپ تابىلادى.
ءوز كەزەگىندە مارات ەلەۋسىز ۇلى وبلىستىڭ ايشىقتى الەۋەتىنە توقتالا كەلە:
– وبلىس اگرارلى ايماق بولىپ تابىلادى. الايدا الماتى سىندى الىپ قالا مەن جاقىن شەتەلدەرمەن شەكارالاس ورنالاسقاندىقتان لوگيستيكا, تاۋار اينالىمىن دامىتۋعا قولايلى جەر. سونداي-اق قانداي دا ءبىر قۇرىلىس جۇرگىزۋ ءۇشىن دە جەر جەتكىلىكتى. ماسەلەن, ءبىر عانا G4 City قۇرىلىسىنا 111 مىڭ گا جەر بولىنگەن ەدى. سول سەبەپتى ءبىزدىڭ ايماقتا ءتۇرلى ۇتىمدى جوبالاردى جۇزەگە اسىرۋعا مۇمكىندىك كوپ, – دەدى.
قوس تاراپ ءوزارا پىكىر الماسقان سوڭ, الداعى وزىق جوبالاردى ىسكە اسىرماققا ىنتىماقتاستىق تۋرالى مەموراندۋمعا قول قويدى.
دەلەگاتسيا وكىلدەرىن قابىلدادى
وسى كۇنى الماتى وبلىسىنىڭ ورتالىعى قوناەۆ قالاسىنا نيدەرلاند كورولدىگىنىڭ دەلەگاتسياسى جۇمىس ساپارىمەن كەلدى, دەپ حابارلايدى وڭىرلىك ءباسپاسوز قىزمەتى.
وبلىستىڭ اۋىل شارۋاشىلىعى سالاسىنداعى الەۋەتىمەن تانىسىپ, تاياۋ بولاشاقتا ەكى جاقتى ىنتىماقتاستىقتا جۇمىس ىستەۋدى كوزدەپ كەلگەن نيدەرلاندى كورولدىگىنىڭ وكىلدەرى الدىمەن وبلىس ورتالىعىنىڭ باس جوسپارىمەن تانىستى.
– الماتى وبلىسىنىڭ جەر كولەمى 105 مىڭ شارشى مەتر, ال تۇرعىن سانى 1,5 ملن ادامدى قۇرايدى. ءبىزدىڭ ولكە اگرارلى ايماق, مۇندا 30 مىڭ اۋىل شارۋاشىلىعى قوجالىعى بار, – دەدى وبلىس اكىمى م.سۇلتانعازيەۆ.
وبلىس اكىمىنىڭ سوزىنە سۇيەنسەك, اۋىل شارۋاشىلىعى جەرىنىڭ كولەمى 4,1 ملن گەكتاردى الىپ جاتىر, ونىڭ ىشىندە 466 مىڭ گەكتارى ەگىستىككە ارنالسا, 3,5 ملن گا جايىلىم جەر.
وسى كۇنى وبلىستا 74 جىلىجاي كەشەنى ىستەپ تۇر. ونىڭ 22-ءسى وندىرىسكە باعىتتالعان. سونداي-اق ايماق كارتوپ ءوسىرۋ بويىنشا رەسپۋبليكادا ەكىنشى ورىندى الادى. ال ەل بويىنشا قۇس ەتى ءوندىرىسىنىڭ 30 پايىزى – وبلىس ەنشىسىندە.
سونداي-اق ايماق باسشىسى 55 تاۋارلى-ءسۇت فەرماسى جۇمىس ىستەپ تۇرعانىن, جىلىنا 625 مىڭ توننا ءسۇت وندىرىلەتىنىن جانە قۇرعاق تۇيە ءسۇتى ەكسپورتقا شىعارىلاتىنىن دا تىلگە تيەك ەتتى.
– بىزدە وتكەن جىلى 47 توننا قۇرعاق تۇيە ءسۇتى قحر-عا ەكسپورتتالدى. الداعى ۋاقىتتا بۇل كورسەتكىشتى 95 تونناعا دەيىن جەتكىزۋ كوزدەلگەن, – دەدى مارات ەلەۋسىز ۇلى.
ءوز كەزەگىندە ۋەستلاند مۋنيتسيپاليتەتىنىڭ مەرى باۋكە ارەندس وبلىستىڭ دامۋ جوسپارى ەرەكشە ۇناعانىن جاسىرمادى.
– سىزدەردىڭ ايماققا العاش رەت كەلىپ تۇرمىز. ەلدىڭ قوناقجايلىلىعى ءبىزدى ءتانتى ەتتى. جاڭا عانا تانىستىرعان ءوڭىردىڭ دامۋ جوسپارى دا تاڭداي قاقتىردى. ويتكەنى قالا سالۋ مىڭ جىلدا ءبىر رەت بولاتىن جايت, – دەگەن باۋكە ارەندس وزدەرىنىڭ وزىق تاجىريبەلەرىمەن بولىسۋگە جانە اۋىل شارۋاشىلىعى سالاسىندا بىرلەسە جۇمىس جاساۋعا ءازىر ەكەندەرىن اتاپ ايتتى. كەزدەسۋدەن كەيىن قوناقتار وبلىس اۋماعىندا ورنالاسقان جىلىجاي كەشەنىنە جانە «Fruit Art» زاۋىتى مەن «بايسەركە-اگرو» اوك-نە بارىپ, تىنىس-تىرشىلىگىمەن تانىستى.
الماتى وبلىسى
