ەكونوميكالىق زەرتتەۋلەر ينستيتۋتىنىڭ حابارلاۋىنشا, ەگەر پاندەميا تولقىنى ۇرعان 2020 جىلدى ەسەپكە الماساق, وندا 2017 جىلدان باستاپ ءبىزدىڭ ەل مەن تۇركى مەملەكەتتەرى ۇيىمى اراسىنداعى ساۋدا ءوسىمىنىڭ ورتاشا جىلدىق قارقىنى 31 پايىزدى قۇراپتى. وسى قارقىن ساقتالعان جاعدايدا تاراپتار تۇپكىلىكتى ماقساتقا (23 ملرد دوللارعا جەتكىزۋ – رەد.) الداعى 4-5 جىلدا قولجەتكىزە الادى.
«2010 جىلدان بەرى اسىرەسە, تۇركيا (3,4 ەسە) جانە وزبەكستانمەن (3,2 ەسە) ساۋدا قاتىناسى ءتاۋىر جاقسارعان. قىرعىزستانمەن ەاەو دەيتىن وداقتا بىرگە ەكەنىمىزگە قاراماستان تاۋار اينالىمى 91,8 پايىزعا ءوستى. تومەنگى ءوسىم قارقىنى ازەربايجانمەن ساۋدا قاتىناسىندا بايقالادى. نەبارى 3,9 پايىز», دەپ حابارلايدى ينستيتۋت.
ساۋدا اينالىمىنداعى 12,9 ملرد دوللاردىڭ 74 پايىزى نەمەسە 9,6 ملرد دوللارى – تۇركى كەڭەسى ەلدەرىنە جونەلتىلگەن قازاقستاننىڭ ەكسپورتى. تۇركياعا 4,8 ملرد دوللاردىڭ (50 پايىز), وزبەكستانعا 3,7 ملرد دوللاردىڭ (39 پايىز) تاۋارىن تاسىمالداپپىز. 2022 جىلى قىرعىزستانعا جىبەرىلگەن ەكسپورت كولەمى – 745,3 ملن دوللاردى (8 پايىز), ازەربايجانعا ەكسپورت 375,3 ملن دوللاردى (4 پايىز) قۇرادى. تۇركياعا جىبەرىلگەن ەكسپورت قۇرىلىمىنىڭ 89 پايىزى – مۇناي, كومىر, گاز, مىس, مىرىش, اليۋميني جانە قورعاسىن سياقتى تاۋارلار. سونداي-اق ءبىز ول ەلگە كۇنباعىس مايى, وڭدەلگەن استىق, جارما, مەتالپروكات جەتكىزەمىز. ال وزبەكستانعا ەكسپورت قۇرىلىمى بارىنشا ارتاراپتاندىرىلعان دەۋگە بولادى. قازىر قازاقستان كورشى ەلگە تەلەفون, اۆتوموبيل, تەلەديدار, كومپيۋتەر, مارگارين, كۇنباعىس مايىن, ازىق-ت ۇلىك تاۋارلارىن ساتىپ وتىر. ال شيكىزات پەن قوسىلعان قۇنى تومەن تاۋارلار ۇلەسى 53 پايىزداي. ونىڭ قاتارىندا مىس پەن مىرىش رۋدالارى, مۇناي, لەگيرلەنبەگەن بولاتتان جاسالعان جارتىلاي فابريكاتتار, اليۋميني, اسبەست, بيداي, كۇنباعىس تۇقىمدارى, ارپا بار. قازاقستاننىڭ وزبەكستانعا ەكسپورتىندا وڭدەۋ دارەجەسى جوعارى جارتىلاي فابريكاتتارعا مەتالل پروكاتتارى, ۇن, مەتالل بۇيىمدارى, ەت, قۇبىرلار, ءارتۇرلى ىدىستار جاتادى.
تاۋار اينالىمىنىڭ 26 پايىزى تۇركى مەملەكەتتەرى ۇيىمى ەلدەرىنەن كەلەتىن 3,3 ملرد دوللار كولەمىندەگى يمپورتقا تيەسىلى. قازاقستانعا تاۋار جەتكىزۋشى باستى مەملەكەتتەر – تۇركيا (1,6 ملرد دوللار) مەن وزبەكستان (1,3 ملرد دوللار). سونداي-اق قىرعىزستان 384 ملن دوللاردى, ازەربايجان 87 ملن دوللاردىڭ ءونىمىن جەتكىزگەن.
ماماندار قازاقستان مەن تۇركى ەلدەرى ەكونوميكالىق قارىم-قاتىناسىنىڭ پەرسپەكتيۆالى ەكەنىن ايتادى. قازىردىڭ وزىندە تۇركيا مەن وزبەكستان ءبىزدىڭ باستى ساۋدا-ەكونوميكالىق سەرىكتەسىمىزدىڭ بەستىگىنە كىرەدى (يتاليا, قىتاي جانە رەسەيدەن كەيىن).
