ەنەرگەتيكا ءمينيسترى الماسادام ساتقاليەۆتىڭ مالىمەتىنشە, بۇگىنگى تاڭدا رەسپۋبليكانىڭ ەلەكتر ستانتسيالارىنا تەحنيكالىق اۋديت اياقتالدى. بۇل جۇمىسقا حالىقارالىق كونسۋلتانتتار تارتىلعان. ناتيجەسىندە توزۋ, نەگىزگى جابدىقتاردىڭ جارامدىلىق مەرزىمى, وتىن شىعىنى, تەحنولوگيالىق بۇزۋشىلىقتار جانە ت.ب. كورسەتكىشتەر بويىنشا رەيتينگ قالىپتاستىرىلدى.
«قازىرگى ۋاقىتتا ودان ءارى ءىس-قيمىل جوسپارلارى دايىندالىپ جاتىر. سونىمەن قاتار بارلىق 37 جەو بويىنشا اكىمدىكتەرمەن بىرلەسىپ, الداعى جىلۋ بەرۋ ماۋسىمىنا دايىندىق ءۇشىن جول كارتالارى جاسالىپ جاتىر», دەدى مينيستر.
يندۋستريا جانە ينفراقۇرىلىمدىق دامۋ ءمينيسترى مۇرات قاراباەۆتىڭ ايتۋىنشا, رەسپۋبليكاداعى جىلۋمەن جابدىقتاۋ جەلىلەرىنىڭ جالپى ۇزىندىعى شامامەن 14 مىڭ شاقىرىم.
«ەل بويىنشا جەلىلەردىڭ 54%-ى ورتاشا دەڭگەيدە توزعان. 7,5 مىڭ شاقىرىم جەلىنى اۋىستىرۋ قاجەت. ەڭ جوعارى توزۋ دەڭگەيى اباي, شىعىس قازاقستان, قاراعاندى, پاۆلودار جانە سولتۇستىك قازاقستان وبلىستارىندا. 2023 جىلى بيۋدجەتتەن توزۋ كورسەتكىشى 75%-دان اساتىن كوممۋنيكاتسيالار بويىنشا 47 جوبانى ىسكە اسىرۋعا 69,4 ملرد تەڭگە ءبولىندى. بۇل قاراجاتقا شامامەن 107 شاقىرىم جىلۋ جەلىلەرىن قايتا جاڭارتۋ جوسپارلانىپ وتىر», دەپ باياندادى مينيستر.
جالپى 2029 جىلعا قاراي جىلۋ قۇبىرلارىنىڭ توزۋىن 43%-عا دەيىن تومەندەتۋ مىندەتى تۇر.
