ءبىزدىڭ ەلدىڭ بارلىق وڭىرىندە دەنەشىنىقتىرۋ مەن سپورتقا ءجىتى كوڭىل بولىنگەن. سولتۇستىك قازاقستان وبلىسى اكىمدىگىنىڭ دەنەشىنىقتىرۋ جانە سپورت باسقارماسى باسشىسىنىڭ ورىنباسارى اسىلبەك ءابدىلمانوۆتىڭ ايتۋىنا قاراعاندا, وبلىس حالقىنىڭ 40 پايىزى, ياعني 215 مىڭنان اسا ادام سپورتپەن تۇراقتى تۇردە اينالىسادى ەكەن.
بۇگىنگى تاڭدا وبلىس ورتالىعىن قوسا ەسەپتەگەندە قىزىلجار ءوڭىرىنىڭ بارلىق ەلدى مەكەنىندە 2 951 سپورت نىسانى, بالالار مەن جاسوسپىرىمدەردىڭ 27 سپورتتىق مەكتەبى, ينتەرنات-كوللەدج, 25 اۋلالىق جانە 9 سپورتتىق كلۋب, سونىمەن قاتار سپورتتىق شەبەرلىكتىڭ ءبىر مەكتەبى مەن وليمپيا رەزەرۆىنە دايىنداۋ ورتالىعى بار.
2022 جىلى جاسوسپىرىمدەردىڭ اراسىندا سپورتقا دەگەن قۇلشىنىستى ارتتىرا ءتۇسۋ ماقساتىمەن جاڭادان 17 سەكتسيا اشىلعان. وتىزدان اسا جەكەمەنشىك زالدارعا تاپسىرىس بەرۋ ارقىلى قوسىمشا 3 200 بالا سپورتپەن اينالىسادى. بۇل ماقساتقا بيىل 423,4 ملن تەڭگە قاراستىرىلىپ وتىر. بىلتىر اۋدان ورتالىقتارى مەن اۋدانداعى ەلدى مەكەندەردە جاڭادان 28 سپورت نىساندارى اشىلدى. اتاپ ايتقاندا, اقجار, قىزىلجار اۋداندارىندا – ءۇش-ۇشتەن, ايىرتاۋ اۋدانىندا – ەكى, شال اقىن, ەسىل, مۇسىرەپوۆ, مامليۋت, تايىنشا اۋداندارىندا ءبىر-بىردەن شاعىن فۋتبول الاڭدارى جاسالدى. ال جۇماباەۆ اۋدانىندا ءبىر حوككەي كورتى, اقجار مەن ەسىل اۋداندارىندا سپورتتىق جانە ستيريتۆوركاۋت (كوشەدەگى) الاڭدارى اشىلدى.
بيىل دەنەشىنىقتىرۋ-ساۋىقتىرۋ كەشەندەرىنىڭ تورتەۋىنىڭ قۇرىلىسى اياقتالادى. بۇل كەشەندەر ايىرتاۋ, ەسىل, جامبىل جانە ع.مۇسىرەپوۆ اۋداندارىنىڭ ورتالىقتارىندا بوي كوتەرمەك. سونىمەن قاتار تايىنشا مەن ايىرتاۋ اۋداندارىنىڭ ورتالىقتارىندا ەكى جابىق حوككەي كورتىنىڭ قۇرىلىسى جالعاسادى. بۇلار اۋدان بيۋدجەتىنىڭ ەسەبىنەن تۇرعىزىلسا, شال اقىن اۋدانىنداعى «اگرو سەۆەر» جشس ءوز قاراجاتىنا پوۆوزوچنىي اۋىلىندا دا وسىنداي كورت تۇرعىزۋدى قولعا العان. سونداي-اق «اۋىل – ەل بەسىگى» باعدارلاماسىنىڭ شەڭبەرىندە بيىل اقجار اۋدانىنىڭ ورتالىعى – تالشىق اۋىلىندا قۇنى 215 ملن تەڭگەلىك جابىق حوككەي كورتىن سالۋ جوسپارلانعان.
قىزىلجار قالاسىندا وتكەن عاسىردىڭ 50-جىلدارى اشىلىپ, ورىس تىلىندە وقىتاتىن باياعى №1 مەكتەپ-ينتەرنات 1997 جىلى سول كەزدەگى ديرەكتورى, ەلىمىزگە بەلگىلى بالۋان جامبىل تاسەمەنوۆتىڭ كۇش سالۋىمەن سپورت ينتەرنات-كوللەدجىنە اينالعان. سودان بەرى بۇل مەكەمەنىڭ قابىرعاسىنان ەلىمىزگە تانىمال سپورتشىلار شىقتى. سونىڭ ىشىندە ۇشەۋى «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» اتاعىن العان. ولار – كيكبوكسينگتەن 2007 جىلى پورتۋگاليادا وتكەن الەم بىرىنشىلىگىنىڭ چەمپيونى, فرانتسيا (2003) جانە گرەكيادا (2009 ج.) وتكەن چەمپيوناتتاردىڭ كۇمىس جۇلدەگەرى ميراس ءبىرىمجانوۆ, ۆەلوسيپەدشى الەكسەي لۋتسەنكو, ەركىن كۇرەس شەبەرى نۇرعوجا قايپانوۆ.
وسى مەكتەپ-ينتەرناتتىڭ عيماراتتارى بارىنشا ەسكىرگەن ەدى. بىلتىردان بەرى ونىڭ جانىنان 244 ورىندىق جاتاقحانا سالىنا باستادى, بيىل ونىڭ قۇرىلىسى اياقتالادى دەپ جوسپارلانعان.
پەتروپاۆل قالاسىنىڭ ورتالىق ستاديونى – «قاراسايدىڭ» فۋتبول الاڭىن UEFA نورامالارى مەن ستاندارتتارىنا سايكەستەندىرۋ دە قولعا الىندى. بۇگىنگى تاڭدا ونى ىسكە اسىراتىن «قازەۋروقۇرىلىس» كومپانياسىمەن 1 ملرد 235 ملن تەڭگەگە كەلىسىمشارت جاسالعان. ال «جاستار» ستاديونى رەسپۋبليكالىق جارىستار وتكىزۋدىڭ ستاندارتتارىنا سايكەستەندىرىلىپ, 117,2 ملن تەڭگەگە جاساندى ءشوپ توسەۋ قولعا الىندى.
ا.ءابدىلمانوۆتىڭ ايتۋىنا قاراعاندا, حالىقتى سپورتقا جۇمىلدىرۋ ماقساتىمەن بىلتىر 230 مىڭ ادامدى قامتىعان 1 200 سپورتتىق-بۇقارالىق شارا وتكىزىلگەن. «سونىڭ ىشىندە حالىق بارىنشا كوپ قاتىسقاندارى حالىقتىق سپورت ويىندارى بولدى. ونىڭ شەڭبەرىندە بەس كەشەندى سپارتاكيادا وتكىزىلدى. ءداستۇرلى تۇردە وتكىزىلەتىن «اق بيداي», «سەۆەر» قىسقى سپورت مەرەكەسى, وبلىستىق «جاستار» سپارتاكيادالارىنا حالىقتىڭ ىنتاسى زور بولدى», دەيدى ول. سونىمەن بىرگە «كورول رينگا» اتتى بوكستان وتكىزىلەتىن وبلىستىق تۋرنير مەن «قىزىلجار بارىسى» اتتى قازاق كۇرەسىنىڭ جارىستارى – حالىق اراسىندا بارىنشا كەڭ تاراپ, تانىمال بولىپ وتىر.
وبلىستا اۋىل شارۋاشىلىعىنىڭ باي قۇرىلىمدارىن سپورت سالاسىنا مەتسەنات بولۋعا تارتۋ جۇمىستارى دا ۇتىمدى جۇرگىزىلۋدە. ماسەلەن, تيميريازەۆ اۋدانىنداعى «قۋانىش» شارۋا قوجالىعىنىڭ باسشىسى قايىربەك حامزين ءوز قاراجاتىنا ۆولەيبول كەشەنىن تۇرعىزىپ, ونىڭ قابىرعاسىندا «قۋانىش» اتتى ايەلدەردىڭ ۆولەيبول كومانداسى جاتتىعادى. بىلتىر وسى كوماندا ازيا چەمپيوناتىندا وڭىرىمىزگە باس جۇلدە الىپ كەلدى. ال ولاردىڭ دەمەۋشىسى قايىربەك حامزين مادەنيەت جانە سپورت مينيسترلىگىنىڭ شەشىمىمەن 2022 جىلعى «ەڭ ۇزدىك مەتسەنات» اتاعىن الدى. ال بيىل ۇلتتىق ليگانىڭ چەمپيوناتىندا كوماندا ەكىنشى ورىن الدى. جۋىردا كوماندانى وبلىس اكىمى ايداربەك ساپاروۆ قۇتتىقتاپ, العىس حات تاپسىردى.
سونداي-اق قىزىلجار ءوڭىرىنىڭ «ەسىل» اتتى ەرلەر ۆولەيبول كومانداسى, «بارىس» اتتى باسكەتبول كومانداسى رەسپۋبليكا بىرىنشىلىگىندە ەكىنشى ورىن العان. وسىنىڭ ءبارى – سپورتقا ءجىتى كوڭىل ءبولۋدىڭ ناتيجەسىندە قول جەتكىزىلىپ وتىرعان تابىستار. سولتۇستىكقازاقستاندىقتاردىڭ الداعى ۋاقىتتا الاتىن اسۋى دا زور دەگەن ۇمىتتەمىز. ەلىمىزدىڭ وليمپيادالىق قۇراما كوماندالارىنىڭ كانديداتتارى قاتارىنا ۆەلوسپورتتان ا.لۋتسەنكو مەن ا.زاحاروۆ, جەڭىل اتلەتيكادان م.ليتۆين, ەركىن كۇرەستەن ن.قايپانوۆ, بوكستان ن.بوگدانوۆا, دزيۋدودان ن.ماراتوۆا, گرەك-ريم كۇرەسىنەن د.كالەنوۆ ەنگەن. شاعىن وبلىس ءۇشىن بۇل از ەمەس.
سولتۇستىك قازاقستان وبلىسى
