«باق پەن الەۋمەتتىك جەلىلەردىڭ مەملەكەتتىك يدەولوگيانى قالىپتاستىرۋداعى ورنى» دەگەن تاقىرىپتا وتكەن باسقوسۋعا الەۋمەتتىك-مادەنيدامۋ جانە عىلىم كوميتەتىنىڭ توراعاسى نۇرتورە ءجۇسىپ, كوميتەت مۇشەلەرى تالعات ءجۇنىسوۆ, ءلاززات قالتاەۆا, ايگۇل قاپباروۆا, رۋسلان رۇستەموۆ, اقپارات جانە قوعامدىق دامۋ ۆيتسە-ءمينيسترى قانات ىسقاقوۆ, اقپارات كوميتەتىنىڭ توراعا ورىنباسارى نۇرلىبەك جەڭىسبەك ۇلى جانە «قازاق گازەتتەرى» جشس باس ديرەكتورى ديحان قامزابەك ۇلى باستاعان «Egemen Qazaqstan» مەن «كازاحستانسكايا پراۆدا» گازەتتەرىنىڭ شىعارماشىلىق ۇجىمى قاتىستى.
سەنات دەپۋتاتتارى اۋەلى «Egemen Qazaqstan»گازەتىنىڭ جۇمىسىمەن تانىسىپ, رەداكتسيانى ارالاپ كوردى. باسقوسۋ بارىسىندا بۇقارالىق اقپارات قۇرالدارىنىڭ قازىرگى جاعدايى, باق پەن الەۋمەتتىك جەلىلەردىڭ مەملەكەتتىك يدەولوگيانى ناسيحاتتاۋداعى ءرولى جايلى پىكىرلەستى.
سەرىكتەستىك باسشىسى ديحان قامزابەك ۇلى قايتا قۇرىلىمدالعان سەرىكتەستىكتىڭ قازىرگى باعىت-باعدارى, باسىلىمداردىڭ احۋالى جايلى اڭگىمەلەدى.
«مىسالى, شەت مەملەكەتتەردە, ونىڭ ىشىندە جاپونيا, ۇلىبريتانيا, گەرمانيادا ءداستۇرلى باسىلىمعا جازىلۋ 58 پايىزدى قۇرايدى. ال, ەلىمىزدە ەكونوميكالىق قيىندىقتارعا, پاندەمياعا بايلانىستى باسىلىمدارعا جازىلۋ تومەندەپ كەتتى. الەۋمەتتانۋشىلاردىڭ زەرتتەۋىنە سايكەس, قازىر گازەتتىڭ كۇندەلىكتى وقىرمانى 13 پايىزدى عانا قۇراپ وتىر. ال سيرەك وقيتىندار - 43 پايىز, مۇلدە وقىمايتىندار - 23 پايىزدى قۇرادى», دەدى د.قامزابەك ۇلى. 
سونداي-اق كەزدەسۋ بارىسىندا جۋرناليستەردىڭ الەۋمەتتىك جاعدايىن جاقسارتۋ, جالاقى مەن قالاماقى كولەمىن ارتتىرۋ ماسەلەسى دە ايتىلدى.
«گازەت – وي تاستار, قوعامدىق سانا قالعىپ كەتپەس ءۇشىن جۇمىس ىستەيتىن بىردەن-ءبىر قۇرال. بىراق نارىققا, جارناماعا بايلانىستى كوپ ماسەلەلەر بار. مىسالى, قاعاز باعاسىنىڭ قىمبات بولۋى. بۇل ماسەلەنى مەملەكەتارالىق ۇلكەن جيىنداردا قاراستىرۋ قاجەت», دەدى نۇرتورە ءجۇسىپ.
كەزدەسۋ سوڭىندا دەپۋتاتتار تاياۋدا اقپارات قۇرالدارىنىڭ ءتۇيىندى ماسەلەلەرىن پارلامەنتتە تالقىلايتىنىن, وعان مىندەتتى تۇردە گازەت-جۋرنالدار قىزمەتكەرلەرى شاقىرىلاتىنىن, بۇگىنگى كەزدەسۋدە ايتىلعان وزەكتى ماسەلەلەرگە نازار اۋدارىلاتىنىن ايتتى.
