تۇركىستان وبلىسى پوليتسيا دەپارتامەنتىنە لەڭگىر قالاسىنىڭ تۇرعىنى ارىزداندى. جابىرلەنۋشىنىڭ ايتۋىنشا, ونى بەلگىسىز بىرەۋلەر پىشاقپەن قورقىتىپ, كۇش قولدانىپ, 5 ميلليون تەڭگە بوپسالاعان.
پوليتسەيلەر اتالعان جايتتى قر قك-ءنىڭ 194-بابى 3-بولىگى بويىنشا تىركەپ, كۇدىكتىلەردى انىقتاۋعا كىرىستى.
قىلمىستىڭ بەتىن اشىپ, كۇدىكتىلەردى ۇستاۋعا تۇركىستان وبلىسى پد ۇيىمداسقان قىلمىسقا قارسى كۇرەس باسقارماسىنىڭ تاجىريبەلى قىزمەتكەرلەرى مەن جەدەل-تەرگەۋ توبى جۇمىلدىرىلدى.
تولەبي اۋدانىنىڭ اۋماعىندا جەدەل-ىزدەستىرۋ ءىس-شارالارىن جۇرگىزگەن پوليتسەيلەر 5 ملن تەڭگە كولەمىندەگى اقشانى الىپ تۇرعان جەرىنەن 2 جىگىتتى ۇستادى. ولاردىڭ بىرەۋى بۇرىن سوتتى بولعان تولەبي اۋدانىنىڭ تۇرعىنى بولىپ شىقتى.
ءتىنتۋ شارالارىن جۇرگىزۋ كەزىندە كۇدىكتىلەردەن جابىرلەنۋشىنىڭ قاراجاتى تاركىلەندى. سونداي-اق كۇدىكتىلەردىڭ ءبىرىنىڭ ءۇيىن ءتىنتۋ كەزىندە التى وق تابىلدى. ءتيىستى ساراپتاما تاعايىندالدى.
قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر. بولعان وقيعانىڭ تولىق ءمان-جايى مەن كۇدىكتىلەردىڭ باسقا دا قىلمىستارعا قاتىستىلىعى انىقتالۋدا.
