«KAZsport» ارناسىنا – 1 جىل

جاقىندا استانادا «KAZsport» تەلەارناسىنىڭ اشىلعانىنا ءبىر جىل تولۋىنا بايلانىستى مەرەكەلىك شارا ءوتتى. وعان گرەك-ريم كۇرەسىنەن وليم­پيادا جانە الەم چەمپيونى جاقسىلىق ۇشكەمپىروۆ, اتى اڭىزعا اينالعان گيمناسشى, وليمپيا ويىندارىنىڭ بەس دۇركىن چەمپيونى نەللي كيم, وليمپيادانىڭ ەكى دۇركىن جانە الەمنىڭ ءۇش دۇركىن چەمپيونى, قازاقستاننىڭ ەڭبەك سىڭىرگەن سپورت شەبەرى يليا يلين جانە باسقا دا تانىمال سپورتشىلار قاتىسىپ, «KAZsport» تەلەارناسىن «تۋعان كۇنىمەن» قۇتتىقتادى. وسى كۇنى «قازاقستان» رترك مەن سپورت جانە دەنەشىنىقتىرۋ ىستەرى اگەنتتىگى اراسىندا ىنتىماقتاستىق تۋرالى مەموراندۋمعا قول قويىلدى. قۇجاتقا «قازاقستان» رترك اتىنان باسقارما ءتورايىمى نۇرجان مۇحامەدجانوۆا, اگەنتتىك تاراپىنان ۆەدومستۆو توراعاسىنىڭ ورىنباسارى ەلسيار قاناعاتوۆ قول قويدى. ەندى مەموراندۋمعا سايكەس ەلىمىزدىڭ سپورتتىق ءومىرى جونىندە حابارلار تاراتۋ, سپورت تۇرلەرى مەن سالاماتتى ءومىر سالتىن كەڭىنەن ناسيحاتتاۋ, تەلەارنانىڭ تەلەونىمدەرىن ارتتىرۋ باعىتىندا ىنتىماقتاستىق بايلانىس ورناتپاق. وسىدان تۋرا ءبىر جىل بۇرىن, 2013 جىلدىڭ 1 شىلدەسىندە «قا­زاق­ستان» رەسپۋبليكالىق تەلە­را­ديو­كورپوراتسياسىنىڭ نەگى­زىندە ەلىمىزدە تاۋلىگىنە 21 ساعات حابار تاراتاتىن تۇڭعىش «KAZsport» تەلەارناسى جۇمىس ىستەي باستادى. ارنايى مامانداندىرىلعان تەلەارنا ەلباسى ن.نازارباەۆتىڭ تاپسىرىسى بويىنشا قۇرىلدى. «KAZsport» – ەۋروپانىڭ «Eurosport», «سپورت 1», «سپورت پليۋس» تەلەارنالارىمەن تەڭ دارەجەدە حابار تاراتاتىن ورتالىق ازيادا تەڭدەسى جوق سپورت تەلەارناسى. ءبىر جىل ىشىندە «KAZsport» تەلەارناسىنىڭ كورەرمەندەرى تىكەلەي ەفيردەن سپورت تۇرلەرىنەن 2000-عا جۋىق ترانسلياتسيالاردى تاماشالادى. شەتەلدەردىڭ بارلىق سپورت شارالارىندا تەلەارنانىڭ ءتۇسىرىلىم توپتارى جۇمىس ىستەدى. 12 اي ىشىندە «KAZsport» اتى اڭىزعا اينالعان سپورت قاھار­ماندارى, سپورت تۇرلەرى بويىنشا كوماندالار جايىندا 36 دەرەكتى فيلم ءتۇسىردى. «گدە ۆى, چەمپيونى؟» تسيكلى شەڭبەرىندە 87 باعدارلاما ءتۇسىرىلىپ, ەفيرگە بەرىلدى. مۇنىڭ بارلىعى كۇن سايىن ەفيرگە شىعاتىن جاڭالىقتار مەن ارنايى رەپورتاجدارمەن تولىعىپ وتىردى. «KAZsport» سونىمەن قاتار, الەمدىك تاجىريبەنى دە ەنگىزۋدە. العاش رەت وتاندىق تەلەديدار تاريحىندا «KAZsport» تەلەارناسىنىڭ كوممەنتاتورلارى وقيعا ورنىندا – برازيليادا فۋتبولدان الەم چەمپيوناتى ءوتىپ جاتقان ستاديونداردا جۇمىس ىستەۋدە. اتالمىش تاجىريبە بولاشاقتا دا جالعاسىن تابادى. بيىلعى تەلەماۋسىمدا تەلەارنا انگليانىڭ پرەمەر-ليگاسىن, جازعى ازيا ويىندارىن, جاسوسپىرىمدەر اراسىنداعى وليمپيادانى, الماتى­دا وتەتىن اۋىر اتلەتيكادان الەم چەمپيوناتىن جانە تاعى دا باسقا سپورت شارالارىن كورسەتۋدى جوسپارلاپ وتىر. «KAZsport» تەلەارناسىنىڭ تۋعان كۇنىنە وراي بىرنەشە ءىرى جوبا ازىرلەندى. سونىڭ بىرەۋى – اتى اڭىزعا اينالعان گيمناسشى, وليمپيا ويىندارىنىڭ بەس دۇركىن چەمپيونى تۋرالى تۇسىرىلگەن «ناشا نەللي كيم» دەرەكتى ءفيلمى. «KAZsport» تەلەارناسى وتاندىق تەلەديدار تاريحىندا العاش بولىپ اتاقتى چەمپيون تۋرالى ومىرباياندىق فيلم ءتۇسىردى. ارنايى ءتۇسىرىلىم توبى اقش-تا, ونىڭ شىمكەنتتەگى العاشقى سپورت مەكتەبى مەن الماتى قالاسىندا بولىپ قايتتى. ن.كيمنىڭ قاتىسۋىمەن دەرەكتى ءفيلمنىڭ تۇساۋكەسەرى 1 شىلدە كۇنى «Kinopark 7IMAX 3D» («كەرۋەن» ساۋدا ورتالىعى) ءوتتى. داستان كەنجالين, «ەگەمەن قازاقستان».