كوكتەمگى اسكەرگە شاقىرۋ ناۋقانى ناۋرىز ايىنىڭ باسىندا باستالىپ, ءالى دە جالعاسىپ جاتىر. قورعانىس مينيسترلىگىنىڭ مالىمەتى بويىنشا قازىر ۇلتتىق قاۋىپسىزدىك كوميتەتىنىڭ شەكارا قىزمەتى جاساقتالىپ بىتكەن. ناۋقان باستالعانى استانا قالاسى بويىنشا 200 جاس اسكەرگە اتتانعان. وتكەن اپتانىڭ اياعىندا قوناەۆ قالاسىنداعى دەسانتتىق شابۋىلداۋ بريگاداسىنا تاعى 40 ادام جونەلتىلگەن.
«بۇگىنگى تاڭدا ءبىز قورعانىس مينيسترلىگىن جاساقتاۋعا كىرىستىك. استانا قالاسىنان شامامەن 500 ادام شاقىرتىلادى. كەيىن مامىر ايى مەن ماۋسىم ايىنىڭ اياعىنا دەيىن ۇلتتىق ۇلان قاتارىنا شاقىرامىز. سونىمەن كوكتەمگى اسكەرگە شاقىرۋ ناۋقانى بىتەدى. اتاپ وتەتىن جايت, ساربازداردىڭ كوبىسى اۋە-دەسانتتىق اسكەرگە بارعىسى كەلەدى. الايدا ولارعا تالاپ بىردەي, قاي قارۋلى كۇشتەرگە بارسا دا, وتان الدىنداعى بورىشىن وتەپ كەلەدى», دەدى استانا قالاسى قورعانىس ىستەرى جونىندەگى دەپارتامەنت باستىعى مەدەت تۇرىسكەلديەۆ.
وتكەن سەنبى كۇنى ەركەعالي راحماديەۆ اتىنداعى مەملەكەتتىك اكادەميالىق فيلارمونيادا اسكەر قاتارىنا الىنعان ەلوردالىق ءبىر توپ ساربازعا ارنالىپ «ەل قورعاۋ – ناعىز ەرلەر ءىسى» سالتاناتتى جيىنى ءوتتى. ءىس-شاراعا استانا قالاسى اكىمىنىڭ ورىنباسارى ەسەت بايكەن, قارۋلى كۇشتەردىڭ ارداگەرلەرى, گارنيزون اسكەري بولىمدەرىنىڭ مەرزىمدى قىزمەتتەگى ساربازدارى, اسكەري كوللەدجدىڭ ۇلاندارى, «جاس سارباز» بالالار-جاسوسپىرىمدەر اسكەري-پاتريوتتىق قوزعالىسىنىڭ تاربيەلەنۋشىلەرى – بارلىعى 1,5 مىڭعا جۋىق ادام قاتىستى.
قورعانىس ءمينيسترىنىڭ ورىنباسارى, گەنەرال-لەيتەنانت سۇلتان قامالەتدينوۆ جيىندا وتان قورعاۋشى ميسسياسىنىڭ ماڭىزىن اتاپ ءوتتى. ول سونداي-اق جاستارعا وسى ابىرويلى مىندەتتىڭ ارتىقشىلىعىن دا ايتتى.
«قارۋلى كۇشتەر, باسقا دا اسكەرلەر مەن اسكەري قۇرالىمدار قاتارىندا اسكەري قىزمەت ەتۋ جاستارعا كوپ مۇمكىندىك بەرەدى. ءبىر جىل ىشىندە سارباز اسكەري مامان اتانادى. سودان كەيىن ول كەلىسىمشارت بويىنشا قىزمەتىن جالعاستىرىپ, اسكەري كوللەدجگە ءتۇسىپ, سەرجانتتان قارۋلى كۇشتەردىڭ باس سەرجانتىنا دەيىنگى لاۋازىمداردا قىزمەت اتقارا الادى. جوعارى اسكەري وقۋ ورنىنىڭ كۋرسانتى بولىپ, لەيتەنانتتان گەنەرالعا دەيىن مانساپتىق جولمەن وسۋگە دە بولادى», دەدى ءمينيستردىڭ ورىنباسارى.
اسكەرگە شاقىرىلعانداردى استانا قالاسى اكىمىنىڭ ورىنباسارى ەسەت بايكەن, «قارۋلى كۇشتەر ارداگەرلەرى» قوعامدىق بىرلەستىگى توراعاسىنىڭ ورىنباسارى, وتستاۆكاداعى گەنەرال-مايور مارات ناعۇمانوۆ تا قۇتتىقتادى. سالتاناتتى ءىس-شارادا «امانات» ءراسىمى ۇيىمداستىرىلدى. زاپاسقا شىعارىلعان اسكەري قىزمەتشىلەر اسكەرگە شاقىرىلعاندارعا ابىرويمەن قىزمەت ەتۋدى, انتقا ادال بولۋدى امانات ەتتى. نەگىزى مۇنداي ءراسىم بۇكىل وتان قورعاۋشى ۇرپاقتارىنىڭ بىرلىگى مەن ساباقتاستىعىن بىلدىرەدى. اكتسياعا قاتىسۋشىلارعا ەلوردالىق دەسانتتىق-شابۋىلداۋ بريگاداسى اسكەري قىزمەتشىلەرىنىڭ قويىلىمدارى, سونداي-اق اسكەري تەحنيكا, قارۋ-جاراق جانە اسكەري كيىمدەردىڭ كورمەسى ۇيىمداستىرىلدى.
كوكتەمگى اسكەرگە شاقىرۋ ناۋقانى 30 ماۋسىمعا دەيىن جالعاسادى.
