قۇجاتقا سايكەس, اتالعان گرانت تۇرلەرى كەلەسى ۇلەستەرگە يە بولادى:
- بازالىق گرانتتار – مەملەكەتتىك ءبىلىم بەرۋ تاپسىرىسى كولەمىنىڭ كەمىندە 50 پايىزى.
- «دارىن» گرانتتارى (حالىقارالىق وليمپيادالار, ورىنداۋشىلاردىڭ حالىقارالىق كونكۋرستارى, سپورتتىق جارىستارداعى جەتىستىكتەر ەسكەرىلەدى) – مەملەكەتتىك ءبىلىم بەرۋ تاپسىرىسى كولەمىنىڭ 10 پايىزىنان استام ەمەس.
- «قامقور» گرانتتارى (الەۋمەتتىك مارتەبە مەن عىلىمي (شىعارماشىلىق) جەتىستىكتەر ەسكەرىلەدى) – مەملەكەتتىك ءبىلىم بەرۋ تاپسىرىسى كولەمىنىڭ كەمىندە 30 پايىزى.
ايتا كەتەيىك, بۇعان دەيىن عىلىم جانە جوعارى ءبىلىم ءمينيسترى ساياسات نۇربەك اتالعان گرانت تۇرلەرىنىڭ سوماسى قانشا بولاتىنىن ايتقان ەدى. وعان سايكەس, بازالىق گرانت سوماسى مەملەكەتتىك گرانت سوماسىنا تەڭ (100%) بولسا, «دارىن» گرانتىنىڭ سوماسى مەملەكەتتىك گرانتتىڭ 120 پايىزىنا, ال «قامقور» گرانتى 30-50 پايىزىنا تەڭ بولۋى ءتيىس.
قۇجات جوباسى 21 ساۋىرگە دەيىن جاريا تالقىعا ۇسىنىلعان.
