كورمەنى وتكىزۋدەگى ماقسات – بۇگىنگى ەلىمىزدىڭ اكىمشىلىك-اۋماقتىق بىرلىكتەرىن قۇرايتىن اۋماقتار بەينەلەنگەن بىرەگەي, ەرەكشە قۇندى كارتالاردى مادەني-اقپاراتتىق اينالىمعا ەنگىزۋ.
مادەني ءىس-شارانىڭ اشىلۋىندا ءسوز العان ۇلتتىق مۋزەي ديرەكتورىنىڭ مىندەتىن اتقارۋشى ايبەك سىدىقوۆ كورمەنىڭ ماڭىزىنا توقتالا كەلىپ:
«كارتوگرافيا – بىرنەشە سالانى قامتيتىن كۇردەلى عىلىم. وندا تاريح, گەوگرافيا, بەينەلەۋ ونەرى, ادەبيەت پەن مادەنيەت سەكىلدى سالالار ءبىر ارنادا توعىسادى. سوندىقتان كارتوگرافيانىڭ كەڭىنەن ناسيحاتتالۋى حالقىمىزدىڭ تاريحي ساناسىنىڭ جاڭعىرۋىنا ىقپال ەتەدى», دەدى ول.
سونداي-اق پارلامەنت ءماجىلىسىنىڭ دەپۋتاتى, تاريح عىلىمدارىنىڭ دوكتورى, پروفەسسور ەركىن ءابىل تاريحي گەوگرافيا مەن ارحيۆ ءىسىن تەرەڭ زەرتتەۋ مەملەكەت تۇتاستىعىنىڭ ءبىر كەپىلى ەكەنىن ايتتى.
كورمە بەس بولىمنەن تۇرادى. «اتلاستار ءداۋىرى» اتتى ءبىرىنشى بولىمدە XVI-XVII عاسىرلاردا جاسالعان 7 كارتا قويىلعان. اۆتورلارى – اعىلشىن, يتاليان, نيدەرلاند جانە نەمىس كارتوگرافتارى. ەكىنشى ءبولىم – «جاڭا زامان كارتوگرافياسىنداعى قازاق دالاسى». وندا شەتەلدىك عالىمدار قۇراستىرعان 5 كارتا بار. ماسەلەن, دجون كەرري رەسەي يمپەرياسىنىڭ كارتاسىن جاساعاندا قازاقتاردىڭ 1799 جىلعى ەتنوستىق اۋماعىن دا تانىستىرادى. ءۇشىنشى ءبولىم – «ەۋروپالىق كارتوگرافيانىڭ شارىقتاۋ كەزەڭىندەگى قازاق دالاسى» دەپ اتالعان. مۇندا 4 كارتا بار, ىشىندەگى ەڭ قۇندىسى – دجون مارتين راپكيننىڭ «تاۋەلسىز تارتاريا» كارتاسى. بۇل كارتا شامامەن 1846-1851 جىلدارى باسىلسا كەرەك. «XIX عاسىرداعى اسكەري توپوگرافتار جۇمىسىنداعى قازاق دالاسى» دەگەن ءتورتىنشى بولىمدە 8 كارتا ۇسىنىلعان. ولاردى رەسەي يمپەرياسى باس شتابىنىڭ قازاق دالاسىن زەرتتەگەن وفيتسەرلەرى دايىنداعان. ال بەسىنشى بولىمدە «قازاق كسر. 1939 ج» تاريحي كارتاسى بەرىلگەن. بۇل كارتادان ەكىنشى دۇنيەجۇزىلىك سوعىس الدىنداعى قازاق كسر-ءىنىڭ اكىمشىلىك قۇرىلىمىن كورەسىز.
