قاسىم-جومارت توقاەۆقا كەن ورىندارىنا جۇرگىزىلگەن تەكسەرۋ جۇمىستارىنىڭ قورىتىندىسى تۋرالى ەسەپ بەرىلدى. مارات قاراباەۆتىڭ ايتۋىنشا, زاڭبۇزۋشىلىقتارعا بايلانىستى قاتتى پايدالى قازبالاردى يگەرۋگە بەرىلگەن 200-دەن استام كەلىسىمشارت پەن ليتسەنزيا قايتارىپ الىندى.
كەزدەسۋ بارىسىندا مينيستر 800-دەن استام جوبادان تۇراتىن جاڭا يندۋستريالىق ينۆەستيتسيالىق جوبالار توپتاماسىنىڭ ىسكە اسىرىلۋى تۋرالى باياندادى.
بۇدان بولەك, مەملەكەت باسشىسىنا كولىك ينفراقۇرىلىمىنىڭ دامۋى جونىندە اقپارات بەرىلدى. ءتيىستى تاپسىرما بويىنشا ۇكىمەت ەلىمىزدىڭ كولىك-لوگيستيكالىق الەۋەتىن دامىتۋدىڭ 2030 جىلعا دەيىنگى تۇجىرىمداماسىن بەكىتتى. سونداي-اق ترانزيتتىك الەۋەتتى ارتتىرۋ ءۇشىن ۆاگون پاركى تاپشىلىعىنا قاتىستى ماسەلە شەشىلىپ جاتىر. «Stadler», «Alstom» جانە «Wabtec» كومپانيالارىنىڭ قاتىسۋىمەن وتاندىق زاۋىتتاردا ۆاگون مەن لوكوموتيۆ ءوندىرىسى باستالادى.
پرەزيدەنتتىڭ 2029 جىلعا دەيىنگى سايلاۋالدى باعدارلاماسىن ىسكە اسىرۋ اياسىندا حالىقارالىق اۆتوموبيل دالىزدەرىن دامىتۋ, سونىڭ ىشىندە رەسپۋبليكالىق ماڭىزى بار 8 مىڭ شاقىرىم اۆتوجول سالۋ جانە قايتا جوندەۋ جۇمىستارى جۇرگىزىلىپ جاتىر.
قاسىم-جومارت توقاەۆقا ازاماتتىق اۆياتسيا سالاسىنداعى تۇراقتى ءوسىم تۋرالى دا باياندالدى. 2022 جىلى پاندەمياعا دەيىنگى كورسەتكىشكە قول جەتكىزىلدى, ياعني قازاقستان اۆياكومپانيالارى 11 ميلليونعا جۋىق جولاۋشى تاسىمالدادى. «اشىق اسپان» رەجيمى ەنگىزىلدى. ۇشۋ گەوگرافياسى كەڭەيىپ كەلەدى. 2025 جىلعا دەيىن توكيو, سينگاپۋر, شانحاي جانە نيۋ-يورك باعىتتارىنا رەيستەر اشىلادى دەپ جوسپارلانىپ وتىر.
قاسىم-جومارت توقاەۆ ورتا بيزنەستى دامىتۋ جانە شيكىزات سەكتورىنا, تاۋ-كەن ونەركاسىبى مەن گەولوگيالىق بارلاۋ سالالارىنا ينۆەستيتسيا تارتۋ جۇمىستارىن كۇشەيتۋدى تاپسىردى.
سونىمەن قاتار پرەزيدەنت جول بويىنداعى, سونداي-اق الەۋمەتتىك, ينجەنەرلىك جانە كوممۋنالدىق ينفراقۇرىلىمداردى جاڭعىرتۋعا ەرەكشە نازار اۋدارۋدى, وندىرىستەگى وتاندىق ۇلەستى ارتتىرۋ جۇمىسىن كۇشەيتۋدى جانە قالا قۇرىلىسى كودەكسىن ازىرلەۋدى جەدەلدەتۋدى تالاپ ەتتى.
