جۇرتتىڭ «قارجىڭدى ەسەلەپ بەرەمىز», ء«تيىمدى شارتپەن تاۋار نەمەسە نەسيە الۋعا مۇمكىندىگىڭىز بار» دەگەندە قۇلاي تۇسەتىنىن ءبىلىپ ەلدىڭ تاپقان-تايانعانىن سىپىرىپ الىپ وتىرعانداردىڭ دەنى شەكارانىڭ ارعى جاعىنداعىلار. ودان قالدى پوليتسيا قىزمەتكەرى بولىپ «جاقىنىڭىز قىلمىس جاسادى, مىناداي كولەمدە اقشا بەرسەڭىز, ماسەلەنى ىڭ-شىڭسىز شەشەمىز» دەپ تە تەلەفون شالاتىندار بار.
وبلىستىق پوليتسيا دەپارتامەنتى كريمينالدى پوليتسيا باسقارماسى باستىعىنىڭ ورىنباسارى رۋستام ءسايدىلدينوۆ قازىر ينتەرنەت الاياقتىق الەمدى ابىگەرگە سالىپ وتىرعان ماسەلە ەكەندىگىن ايتادى.
– جىل باسىنان بەرگى الاياقتىق قىلمىستار كورسەتكىشى وتكەن جىلمەن سالىستىرعاندا 64 پايىزعا تومەندەگەن. ەكى ايداعى تىركەلگەن 29 دەرەكتىڭ 23-ءى ينتەرنەت الاياقتىققا قاتىستى بولىپ وتىر. بۇل باعىتتاعى قىلمىس جاساعان جاندى تابۋ قيىن, انىقتالعانمەن دە جەلى ارقىلى جاسالعان شىم-شىتىرىق شىرعالاڭنىڭ شەتىنە شىعۋ وڭاي ەمەس. سوندىقتان دا تەرگەۋ جۇمىستارى ۇزاققا سوزىلادى.
حالىق ينتەرنەتتەگى الاياقتارعا الدانىپ قالماۋى ءۇشىن قارجى نارىعىن رەتتەۋ جانە دامىتۋ اگەنتتىگى ءىىم-ءنىڭ وڭىرلىك دەپارتامەنتتەرىمەن بىرلەسىپ «Fingramota.kz» اتاۋىمەن رەسمي سايت ازىرلەنىپ, كوپشىلىك نازارىنا ۇسىنىپ وتىر. كۇندەلىكتى الەۋمەتتىك جەلىلەردە تۇسىندىرمەلىك ماقالالار مەن پروفيلاكتيكالىق بەينەروليكتەر جاريالايمىز. مۇنداي قىلمىستى بولدىرماۋدىڭ باستى جولى – مۇقياتتىلىق. تۇرعىنداردان جەكە كۋالىك دەرەكتەرىن, تولەم كارتالارى مالىمەتتەرىن پايدالانۋدا اباي بولۋعا شاقىرامىز, – دەيدى ول.
وبلىس بويىنشا جىل باسىنان بەرى تىركەلگەن 29 دەرەكتىڭ ونىنا قاتىستى تەرگەۋ امالدارى اياقتالىپ, سوتقا جولدانىپتى.
ەستەرىڭىزگە سالا كەتەيىك, «Fingramota.kz» اقپاراتتىق-تۇسىندىرمە سايتى – قارجى نارىعىن رەتتەۋ جانە دامىتۋ اگەنتتىگىنىڭ حالىقتىڭ قارجىلىق ساۋاتىن ارتتىرۋ ماقساتىندا ىسكە قوسقان جوبالارىنىڭ ءبىرى. قارجى جاڭالىقتارى, وقىتۋ روليكتەرى, بەينەلى اقپاراتتىق گرافيكاسى جانە قارجىلىق ساۋاتتىلىق بويىنشا باسقا دا اقپاراتى بار بىرەگەي الاڭ قارجىلىق ساۋات دەڭگەيى جانە قارجىلىق مۇمكىندىكتەرى ءارتۇرلى اۋقىمدى اۋديتورياعا ارنالعان.
قىزىلوردا
