2022 جىلى ەلدەر اراسىنداعى تاۋار اينالىمى 1,8 ملرد دوللاردى قۇرادى. بۇل 2021 جىلعى كورسەتكىشتەن 58,5 پايىزعا جوعارى (1,2 ملرد دوللار). ال 2010 جىلعى كورسەتكىشتەن 13 پايىزعا تومەن (2,1 ملرد دوللار). اتالعان مەرزىمدە ءبىزدىڭ ەلدىڭ ساۋدا اينالىمىنداعى ۇلىبريتانيا ۇلەسى 2,3-تەن 1,4 پايىزعا ازايىپ كەتكەن.
بىلتىر قازاقستاننان ۇلىبريتانياعا ەكسپورت 2021 جىلمەن سالىستىرعاندا 70,9 پايىزعا ءوسىپ, 1,5 ملرد دوللاردى قۇراعان. ۇلىبريتانياعا ەكسپورتتىق ءوسىم نەگىزىنەن شيكى مۇناي (643,1 ملن دوللار), مىس جانە مىس كاتودتارى (45,3 ملن دوللار), وڭدەلمەگەن اليۋميني (43,9 ملن دوللار) سياقتى باستى تاۋارلار ەسەبىنەن جۇزەگە اسىپ وتىر.
ۇلىبريتانيادان قازاقستانعا يمپورت 2022 جىلى قاڭتار-جەلتوقساندا 24,3 پايىزعا ءوسىپ, 384,0 ملن دوللارعا جەتتى. ءبىز كورولدىكتەن نەگىزىنەن جەڭىل اۆتوموبيل (44,6 ملن دوللار), كرۋيزدىك كەمەلەر, پارومدار جانە جولاۋشىلاردى تاسىمالداۋعا ارنالعان باسقا دا قۇرالدار (24,4 ملن دوللار), ۇشۋ اپپاراتتارى ءۇشىن ستارتتىق قۇرىلعىلار, پالۋبالىق تەجەۋ نەمەسە ۇقساس قۇرىلعىلار, جەرۇستى ۇشۋ ترەناجەرلارى (8,3 ملن دوللار), جول جانە قۇرىلىس تەحنيكالارىن (5,5 ملن دوللار), ءسپيرتتى بەرىك ىشىمدىكتەر (5,9 ملن دوللار) تاسىمالداپپىز.
ال بريتانيالىق ينۆەستورلار ەلىمىزدەگى وڭدەۋشى ونەركاسىپتە, قارجى سەكتورىندا, ترانسپورت سەكتورىندا, ساۋدا, عىلىمي-تەحنيكالىق سالالاردا كوبىرەك جۇمىس ىستەيدى. 2005 جىلدان 2022 جىلدىڭ 3-توقسانىنا دەيىنگى ارالىقتا ۇلىبريتانيادان قازاقستانعا تىكەلەي شەتەلدىك ينۆەستيتسيانىڭ جالپى اعىنى 16,4 ملرد دوللاردى قۇرادى. 2022 جىلدىڭ قورىتىندىسى بويىنشا ەل ەكونوميكاسىنداعى نەگىزگى ينۆەستورلار اراسىندا ۇلىبريتانيا التىنشى ورىندا تۇر.
