كونفەرەنتسيادا قازاقستان, قىرعىزستان, تاجىكستان, تۇرىكمەنستان, وزبەكستان ەلدەرىنىڭ ساۋدا, تسيفرلىق دامۋ جانە اقپاراتتىق قاۋىپسىزدىك مينيسترلىكتەرىنىڭ وكىلدەرى بيزنەس ءۇشىن كيبەرقاۋىپسىزدىك مۇمكىندىكتەرىن تالقىلادى. بۇل بيزنەستەگى باسەكەلەستىكتىڭ ارتىقشىلىقتارىنىڭ ءبىرى رەتىندە قاراستىرىلىپ وتىر.
اقش ىشكى قاۋىپسىزدىك دەپارتامەنتى حالىقارالىق كيبەر ساياسات جونىندەگى ديرەكتورىنىڭ ورىنباسارى يان حانسەن, زاڭگەر كەڭەسشى كريستەن باۋەر اقش ساۋدا مينيسترلىگىنىڭ باعدارلاماسى تۋرالى ايتتى. «CLDP باعدارلاماسى 2021 جىلدىڭ قاراشاسىندا اقش پەن ورتالىق ازيانىڭ تسيفرلىق ساۋدا جونىندەگى جۇمىس توبىن ىسكە قوستى. بۇل باعدارلاما ورتالىق ازيا ەلدەرىندە جانە الەمنىڭ باسقا ەلدەرىمەن ءارى وڭىرلەرىمەن ساۋدا جانە ەكونوميكالىق بايلانىستاردى ىلگەرىلەتۋ ءۇشىن قۇرىلعان», دەدى كريستەن باۋەر.
جۇمىس توبى وزىق حالىقارالىق تاجىريبەنى ىلگەرىلەتۋمەن, تسيفرلىق ساۋدا ءۇشىن كەدەرگىلەردى جويۋ, وڭىردە تسيفرلىق ساۋدانىڭ دامۋى مەن وركەندەۋىنە مۇمكىندىك بەرەتىن قاجەتتى نورماتيۆتىك-قۇقىقتىق بازانى قۇرۋمەن اينالىسادى. جۇمىس توبى ەلەكتروندى تولەمدەر, قولتاڭبالار, ترانزاكتسيالار سالاسىنداعى نورماتيۆتىك-قۇقىقتىق رەفورمالارمەن, ترانسشەكارالىق دەرەكتەر اعىندارىمەن, اقپاراتتىق قاۋىپسىزدىكپەن, دەرەكتەردى قورعاۋ جانە قۇپيالىلىقپەن, تۇتىنۋشىلاردى قورعاۋ جانە تسيفرلىق سالىقتارمەن اينالىسادى.
اقش پەن ورتالىق ازيانىڭ تسيفرلىق ساۋدا جونىندەگى جۇمىس توبىنىڭ مۇشەسى, الماتى ىسكەر ايەلدەر كەڭەسىنىڭ توراعاسى اقەركىن ەراليەۆا وڭىرلىك ينتەگراتسيا شەڭبەرىندەگى اقپاراتتىق قاۋىپسىزدىكتىڭ ماڭىزدىلىعىنا توقتالدى. ء«بىز CLDP باعدارلاماسىن ەكى جىلدان بەرى جۇرگىزىپ كەلەمىز. بيىل شاعىن جانە ورتا كاسىپكەرلىك پەن IT وكىلدەرىنە ارنالعان «Cyber Readiness Institute» وقۋ باعدارلاماسىن ىسكە قوسامىز. سونىمەن قاتار CLDP باعدارلاماسى كيبەرقاۋىپسىزدىك بويىنشا وڭىرلىك وقۋ سەمينارىن ۇيىمداستىردى», دەدى اقەركىن ەراليەۆا.
سپيكەرلەر سەنىمدى جەتكىزۋ تىزبەگىن قۇرۋ جانە تسيفرلىق ساۋدانىڭ ۇلتتىق/وڭىرلىك ماقساتتارىن ىلگەرىلەتۋ جولدارىن قاراستىردى. Satu.kz باس ديرەكتورى ماكسيم مەلنيك ەلدەگى تسيفرلىق ساۋدانى جاي-جاپسارىن جەتكىزدى.
ال بولەك سەسسيالار كيبەرقاۋىپسىزدىكتىڭ ءتيىمدى ادىستەرىن ازىرلەۋ جانە تسيفرلىق ساۋدانىڭ ءوسۋىن قولداۋ ءۇشىن قاجەتتى قۇقىقتىق رەفورمانى ەنگىزۋگە ارنالدى. نەگىزگى پلەنارلىق وتىرىستا كيبەرقاۋىپسىزدىكتىڭ نەگىزدەرى مەن نەگىزدەمەلىك قاعيداتتارىنا شولۋ جاسالىپ, بيزنەس, تۇتىنۋشىلارمەن, ينۆەستورلارمەن سەنىمدى نىعايتۋ ماسەلەلەرى, تسيفرلىق ساۋدا مەن ينۆەستيتسيالارداعى كەدەرگىلەر, كيبەرقاۋىپسىزدىكتى بيزنەس ءۇشىن باسەكەلەستىك ارتىقشىلىق رەتىندە پايدالانۋ جانە جاھاندىق جەتكىزۋ تىزبەكتەرىمەن بايلانىستى ماسەلەلەرى قارالدى.
– اقپاراتتىق جۇيەلەر مۇمكىندىكتەرىنىڭ ارتۋىمەن قاتار كيبەرقاۋىپسىزدىك ماسەلەلەرى دە وزەكتى بولىپ وتىر. ءبىز كيبەرقاۋىپسىزدىك تۋرالى حاباردارلىقتى ارتتىرۋ ماسەلەلەرىن جانە ونىڭ ساۋدا مەن ينۆەستيتسياعا قالاي اسەر ەتەتىنىن, ستراتەگيالىق ماڭىزدى جۇيەلەر مەن قۇپيا اقپاراتتى كيبەرقاۋىپتەردەن قالاي قورعاۋعا بولاتىنىن تالقىلادىق. اقپاراتتىق قاۋىپسىزدىكتى كۇشەيتۋ ارقىلى تسيفرلىق تەحنولوگيالاردى پايدالانۋدىڭ جاڭا دەڭگەيىنە وتۋگە بولادى, – دەدى اقەركىن ەراليەۆا.
كونفەرەنتسيا سوڭىندا CLDP باعدارلاماسىنىڭ وكىلدەرى «cyber Champions» ايماقتىق جەلىسىنىڭ ىسكە قوسىلعانىن جانە ورتالىق ازيا ءوڭىرى ءۇشىن «cyber Readiness» ينستيتۋتىنىڭ كيبەرقاۋىپسىزدىك بويىنشا تەگىن وقۋ باعدارلاماسى ىسكە قوسىلعانىن حابارلادى. سونىمەن قاتار الماتىدا كيبەر چەمپيوندار قوعامداستىعىنىڭ قۇرىلعانى ءمالىم بولدى.
الماتى
