ەلىمىز ازيا-تىنىق مۇحيتى ءوڭىرى مەن پارسى شىعاناعى نارىعىنا تىكەلەي شىعا الادى

استانا. 2 شىلدە. ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىن ىسكە اسىرۋ بويىنشا ۇكىمەت ەسەبىمەن تانىسۋى بارىسىندا مەملەكەت باسشىسى ەلىمىز ازيا-تىنىق مۇحيتى ءوڭىرى مەن پارسى شىعاناعى مەملەكەتتەرى نارىعىنا تىكەلەي شىعا الاتىن بىرەگەي دەرجاۆاعا اينالادى دەپ مالىمدەدى. بۇل تۋرالى «قازاقپارات» حابارلادى. پرەزيدەنت: «تەرمينال سالۋدامىز. تىنىق مۇحيتىنداعى ليانيۋنگان پورتىنان قازاقستانعا قاراي, باتىسقا تاۋار تاسىمالداۋدامىز. بۇل قىتايدان انتۆەرپەنگە دەيىنگى تەڭىز جولىن 35 تاۋلىكتەن 2 اپتاعا قىسقارتادى. ياعني, قازىردىڭ وزىندە كەلىسىمشارت جاسالىپ, وسى جەلى ارقىلى 250 مىڭ كونتەينەر وتەتىن بولادى. بۇل بىزگە دە جاقسى, لوگيستيكا ءۇشىن دە جاقسى. 2020 جىلعا قاراي وسى تەرمينالدىڭ قۋاتى 2 ەسەگە ارتاتىندىعى بولجانۋدا. سونىڭ ارقاسىندا ءبىزدىڭ ەلىمىز ورتالىق ازياداعى ازيا-تىنىق مۇحيتى ءوڭىرى مەن پارسى شىعاناعى مەملەكەتتەرى نارىعىنا تىكەلەي شىعا الاتىن بىرەگەي دەرجاۆاعا اينالادى», – دەدى. جولدىباي بازار. دەرەككوز: «قازاقپارات». فوتو: «قازاقپارات».