بۇگىندە اتالعان وقۋ ورنىنىڭ عىلىمي وندىرىسپەن ساباقتاستىعى بەلسەندى دامۋ جولىنا تۇسكەن. ۋنيۆەرسيتەت عالىمدارى وندىرۋشىلەرمەن بىرلەسىپ, 3D پرينتەر شىعارۋدىڭ يننوۆاتسيالىق تەحنولوگياسىن قولدانۋعا نيەت تانىتىپ وتىر. ءوندىرىس «ENU-Lab» عىلىمي-وندىرىستىك ورتالىعىنىڭ بازاسىندا قۇرىلادى.
– 3D پرينتەرلەرىن شىعارۋ باستاپقىدا قۇرىلىس جانە باسقا سالالار ءۇشىن كەرەك. بولاشاقتا «ENU-Lab» عىلىمي-وندىرىستىك ورتالىعىنىڭ بازاسىندا 3D پرينتەردى گەوپوليمەر نەگىزىندەگى جاڭا قۇرىلىس ماتەريالدارىن شىعارۋ ءۇشىن پايدالانىپ, ودان ءارى كوممەرتسيالاندىرۋ جوبامىز دا بار. وسى سەگمەنتتەگى جاڭا تەحنولوگيالار قولدانىلاتىنىن ەسكەرسەك, بۇل ءوندىرىس ەلىمىزدە ءبىرىنشى رەت ىسكە قوسىلادى, – دەپ ءتۇسىندىردى ۇلتتىق ۋنيۆەرسيتەتتىڭ يننوۆاتسيالاردى دامىتۋ دەپارتامەنتىنىڭ ديرەكتورى اسەل جەكسەمباەۆا.
شىعارىلاتىن تاۋارعا نەگىزگى تاپسىرىس بەرۋشىلەر ەلىمىزدەگى جانە شەت مەملەكەتتەردىڭ تەحنوپاركتەرى, ءبىلىم بەرۋ مەن عىلىمي مەكەمەلەر جانە يندۋستريالىق كاسىپورىندار بولماق. ءونىمدى ەكسپورتتاۋ مۇمكىندىگى دە بار.
– قازىر ەل اۋماعىندا جەتكىزۋ جانە تەحنيكالىق قولداۋ تەحنولوگياسىن ازىرلەيمىز. سودان كەيىن سىرتقى نارىققا شىعۋدى جوسپارلاپ وتىرمىز. قازىردىڭ وزىندە 3D پرينتەرىن ساتىپ الۋعا دايىن وزبەكستان جانە قىرعىزستانمەن بايلانىس ورناتتىق, – دەدى «SpaceLab» جشس ديرەكتورى ارمان بەكەمباەۆ.
جوباعا ۋنيۆەرسيتەت ستۋدەنتتەرى دە قاتىسىپ, پراكتيكالىق تاجىريبەلەرىن شىڭداپ, عىلىمي زەرتتەۋ جۇرگىزۋگە مۇمكىندىك الماق.
