ەكىباستۇز قالالىق «وتارقا» گازەتىنىڭ جۇلدەسى ءۇشىن جىل سايىن توعىزقۇمالاقتان تۋرنير ۇيىمداستىرىلادى. ايتسە دە, بيىلعى جارىستىڭ ءجونى بولەك. قازاقستاننىڭ قۇرمەتتى ءجۋرناليسى, ەكىباستۇز قالالىق «وتارقا» گازەتىنىڭ العاشقى رەداكتورى امانكەلدى قاڭتارباەۆتىڭ تۋعانىنا 80 جىل تولۋىنا ورايلاستىرىلعان دودادا پاۆلودار, ەكىباستۇز قالالارىنان, ەرتىس, باياناۋىل, شارباقتى, ماي, اققۋلى جانە ۋسپەن اۋداندارىنان 100-دەن استام جاس ويىنشى باق سىنادى.
«ەكىباستۇز داۋىسى» – اقپاراتتىق ورتالىعى» جشس «وتارقا» گازەتىنىڭ قىزمەتكەرى, جۋرناليست جاسسەرىك جالەل ۇلى ومىردەن وتكەن ۇستازى امانكەلدى اعانىڭ قوعامعا سىڭىرگەن ەڭبەگى, قايراتكەرلىگى جايلى ەستەلىك ايتىپ, تۇلعا سوناۋ 1990-شى جىلدارى گازەت جۇلدەسى ءۇشىن تۋرنير ۇيىمداستىرۋعا باستاماشى بولعانىن اتاپ ءوتتى. سودان بەرى اتالعان ءتۋرنيردى №1 بجسم جىل سايىن وتكىزىپ ءجۇر. بۇل جولعى جارىسقا قاڭتارباەۆتار اۋلەتى مەن «ەكىباستۇز داۋىسى» – اقپاراتتىق ورتالىعى» جشس دەمەۋشى بولىپ وتىر.
ءبىر قىزىعى, ءداستۇرلى دودانىڭ العاشقى جىلدارعى تۋرنيرلەرىنە وقۋشى شاعىندا قاتىسقان ارداق قاناپاشەۆ پەن اقان فايزوللا بۇگىندە ەسەيگەن, جارىسقا تورەشىلىك ەتىپ ءجۇر. ەكىباستۇزداعى №1 بجسم-دە توعىزقۇمالاق جاتتىقتىرۋشىسى رەتىندە شاكىرتتەرىن دايارلاپ جاتىر. ا.قاناپاشەۆتىڭ شاكىرتى ءجاميلا بايالداشەۆا بىلتىر الەم چەمپيوناتىندا راپيدتەن چەمپيون اتانىپ, بۇل ءۇشىن ۇستازىنا قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى اتاعى بەرىلدى.
پاۆلودار وبلىستىق توعىزقۇمالاق فەدەراتسياسىنىڭ ۆيتسە-پرەزيدەنتى ارىستان قاپاەۆ ۇلتتىق ويىننىڭ سەرپىندى دامۋىنا مۇنداي تۋرنيرلەردىڭ زور ۇلەس قوساتىنىن اتاپ ءوتىپ, باسەكەنى وبلىستىق جارىسقا اينالدىرۋعا قولداۋ كورسەتەتىنىن ايتتى.
دودا 9, 11 جانە 13 جاستاعى ۇلدار مەن قىزدار اراسىندا راپيد تۇرىنەن ۇيىمداستىرىلىپ, ءار جەردەن كەلگەن مىقتىلار جارىستىڭ كورىگىن قىزدىردى. ۇلدار اراسىندا ەكى- باستۇزدىقتار ءاسانالى سەرىكوۆ پەن ءامىر ناۋرىزعالي جانە پاۆلودار قالاسىنان كەلگەن ارنات قايريدەنوۆ جەڭىمپاز اتانسا, قىزداردان ەكىباستۇزدىق ياسمينا مادانياتوۆا مەن ءمادينا سەيىتقازينوۆانىڭ, تاعى ءبىر پاۆلودارلىق ياسمينا قاپسالياموۆانىڭ باعى جاندى.
پاۆلودار وبلىسى,
ەكىباستۇز قالاسى
