قالىپتى ەمەس تاماق راتسيونى, دۇرىس جولمەن تاماقتانباۋ ءسىزدىڭ جۇمىس ونىمدىلىگىڭىزدىڭ تومەندەۋىنە, تەز شارشاۋىڭىزعا اكەلىپ سوعادى. دارىگەر تاڭعى سارەسىنەن باس تارتپاۋ قاجەتتىگىن باسىپ ايتتى. مايرا سارباسقىزى تاعامدا اعزاعا قاجەتتى دارۋمەندەر مەن مينەرالدار بولماسا, ادام دەنساۋلىعىنا زيان ەكەنىن اتاپ ءوتتى.
«اۋىزاشار كەزىندە تاماق شامادان تىس كوپ بولماۋى كەرەك, تاعامدى ىسىراپ ەتپەڭىز جانە ارتىق تاماقتانباڭىز. تاڭ سەرگەك, جەڭىل بولۋى ءۇشىن ۇيقىعا اۋىرلىق سەزىممەن جاتپاعان دۇرىس. ۇن مەن قۋىرىلعان تاعامداردى شەكتەۋ قاجەت. ۇزاق اشىعۋدان كەيىن قۋىرىلعان تاعام استىڭ دۇرىس قورىتىلماۋىنا جانە اسقازاندى كۇيدىرۋگە اكەپ سوعادى. اقۋىز بەن تالشىققا باي تاعامداردى پايدالانعان دۇرىس. ءوزىڭىزدى ويداعىداي سەزىنۋ ءۇشىن راتسيونعا كوكونىس, ەت, بالىق, داندەر مەن جەمىس-جيدەك قوسىلۋى كەرەك», دەپ اتاپ ءوتتى دارىگەر.
اۋىزاشار ۋاقىتىنان كەيىن دەنەدەگى سۇيىقتىق دەڭگەيىن ۇستاپ تۇرۋ ءۇشىن كوبىرەك سۋ ءىشۋ قاجەت. مايرا سارباسقىزىنىڭ ايتۋىنشا, سۋ بالانسىن ساقتاماساڭىز, دەگيدراتاتسيا كەزىندە جۇرەك اينۋ, باس اينالۋ جانە السىزدىككە تاپ بولۋ قاۋپى تۋىندايدى.
«ورازا ۋاقىتىندا جىلدام كومىرسۋلاردى ۇمىتقان دۇرىس. ولار قانداعى گليۋكوزا مولشەرىن بىردەن ارتتىرىپ, قارنىڭىزدىڭ تەز اشىعۋىنا اكەلەدى. ءتاتتى تاعامدار, كامپيتتەر, كۇشتى دامدەۋىشتەرى قوسىلعان سەكىلدى اعزانى تەز شولدەتەتىن تاعامداردان باس تارتىڭىز», دەدى مايرا رىسپاەۆا.
سونداي-اق تاماقتان كەيىنگى ازداعان بەلسەندىلىك اسقازان-ىشەك جولدارىنىڭ جۇمىسىنا كومەكتەسەتىنىن ەسكە سالامىز.
«كۇنى بويى اسقازان تىنىشتىق جاعدايىندا بولادى. تاعامدى جاقسى ءسىڭىرۋ ءۇشىن سەرۋەندەۋ – ەڭ جاقسى شەشىم. اس ىشكەننەن سوڭ بىردەن ۇيقىعا جاتپاڭىز جانە بەلسەندى دەنە جاتتىعۋىن جاساماعان ءجون, بۇل جۇرەك اينۋى مەن ۇيقىسىزدىققا اكەلۋى مۇمكىن», دەيدى دارىگەر.
ورازا كەزىندە تاماقتانۋ جايلى كەڭەستەر:
1. اۋىزاشاردا نەگىزگى تاعامدى تۇتىنۋدى سورپا مەن سالاتتان كەيىن 1-2 ساعاتتان سوڭ باستاڭىز;
2. از-ازدان ءجيى تاماقتانعان ءجون;
3. پايدالى مايلار تويىمدىلىق سەزىمىن ۇزارتادى. راتسيوندا جاڭعاقتارعا, ءسۇت ونىمدەرىنە جانە ەتكە باسىمدىق بەرىڭىز;
4. سۋدى جيىرەك ءىشىڭىز. تاماقتانۋ رەجيمىنىڭ وزگەرۋىنە بايلانىستى ىشەك پروبلەمالارى پايدا بولۋى مۇمكىن. ولاردىڭ الدىن الۋ ءۇشىن ديەتاعا كوبىرەك كلەتچاتكاعا باي تاعامداردى قوسىڭىز;
5. سارەسىنى جىبەرىپ الماڭىز. تاڭەرتەڭگى تاعامعا ايران, يوگۋرت, جۇمىرتقا, ىرىمشىك جانە ءداندى نان سياقتى جەڭىل تاعامداردى تاڭداۋعا بولادى. سونداي-اق بۇرشاق سورپاسى, يوگۋرت, جەمىستەر, كەپتىرىلگەن جەمىستەر, ەت كەسەكتەرى بار كوكونىس سالاتى بولۋى مۇمكىن;
6. گازدالعان شىرىندار, فاستفۋد سەكىلدى دارۋمەندەر مەن مينەرالسىز تاماقتان باس تارتۋ;
7. تاماق دايىنداۋ ادىسىنە نازار اۋدارىڭىز. قايناتىلعان, پەشتە نەمەسە بۋعا پىسىرىلگەن تاعام ءبىزدىڭ اسقازانىمىزعا اناعۇرلىم پايدالى ەكەنىن ۇمىتپاڭىز;
8. شولدەتەتىن تاعامداردان باس تارتۋ. مىسالى, ۇن ونىمدەرى, ءتاتتى كونديتەرلىك ونىمدەر, ىستالعان, تۇزدالعان, مارينادتالعان ونىمدەر, ت.ب.;
9. راتسيونىڭىزدى كومىرسۋلار, مايلار مەن اقۋىزدارمەن بايىتىلعان تاعامداردان قۇرىڭىز.
