ادام قۇقىعىن قورعاۋ ماسەلەسى ەلىمىز ەل بولعالى, تاۋەلسىزدىك العالى ايتىلىپ كەلە جاتىر. بىراق بۇرىنعى جۇيەدە, ەسكى قازاقستاندا كوپ وزگەرىس بولمادى. قازىرگى جاعدايدا ەلىمىزدە زاڭنىڭ داعدارىسى شارىقتاۋ شەگىندە تۇر. سوندىقتان ءدال قازىر بىزگە ناقتى قادام, تۇبەگەيلى وزگەرىس كەرەك.
ءبىز قولدانىپ جۇرگەن كەز كەلگەن زاڭ – جەر قاتىناستارىن, قۇرىلىس سالاسىن رەتتەيتىن, سالىقتى رەتتەيتىن, قىلمىستىق, ازاماتتىق زاڭدار – بۇلاردىڭ قاي-قايسىسىن الىپ قاراساق تا كەمشىلىكتەر بار. زاڭنىڭ ءبىر بابى ەكىنشى بابىنا قارسى كەلىپ جاتادى نەمەسە ءبىر زاڭنىڭ ءبىر نورماسى ەكىنشى نورماعا قايشى. ونى كەشەگى سوزىندە پرەزيدەنت تە ايتتى. «زاڭنامانىڭ جەكەلەگەن نورمالارى اتا زاڭعا قايشى. كونستيتۋتسيالىق سوتتىڭ شەشىمدەرى كەيبىر شاعىمداردىڭ ورىندى ەكەنىن كورسەتىپ وتىر», دەدى. شىن مانىندە سولاي.
زاڭ سالاسىندا جۇرگەنىمە 30 جىلعا تايادى. سول ۋاقىت ىشىندە بايقاعانىم, ءبىزدىڭ زاڭداردىڭ كوبى دامىعان باتىس ەلدەرى – فرانتسيا, گەرمانيا, ۇلىبريتانيا سياقتى مەملەكەتتەردەن كوشىرىلىپ الىنعان. ارينە, ول زاڭ جاقسى شىعار, وعان داۋىم جوق. بىراق ول زاڭ ءبىزدىڭ داستۇرىمىزگە, سالت-سانامىزعا, وي-ورىسىمىزگە, مەنتاليتەتىمىزگە, ەڭ اياعى ءبىزدىڭ الەۋمەتتىك جاعدايىمىز بەن تۇرمىس-تىرشىلىگىمىزگە سايكەس كەلمەي جاتادى. شىنىن ايتقاندا, ءبىز ول زاڭمەن جۇرەتىندەي دەڭگەيگە جەتە قويعان جوقپىز. باتىس ءۇشىن جاقسى زاڭ بىزگە وعاش, وراشولاق زاڭعا اينالىپ, ءومىرىمىزدى جاقسارتۋدىڭ ورنىنا, قيىنداتاتىن قۇرالعا اينالعان.
تاعى ءبىر ماسەلە بار. ادەتتە زاڭنىڭ ورىندالۋىن وعان سايكەس ەرەجەلەر, نۇسقاۋلىقتار, ۇكىمەت قاۋلىلارى, سانيتارلىق, قۇرىلىس سەكىلدى تولىپ جاتقان نورمالار, قۇقىقتىق اكتىلەر رەتتەپ وتىرادى. بىراق ءبىزدىڭ قۇرىلىس, سانيتارلىق-ەپيدەميالىق سالالارداعى نورمانىڭ بارلىعى دەرلىك كەڭەستىك ەسكى جۇيەدەن كەلە جاتقان نورمالار. مەنىڭ پايىمداۋىمشا, 90 پايىزدايى سولاي. تەك تاقىرىبى وزگەرگەن.
الايدا ۋاقىت ءبىر ورىندا تۇرمايدى. ءبىز قازىر مۇلدەم جاڭا زاماندا, تەحنولوگيا كەزەڭىندە ءومىر ءسۇرىپ جاتىرمىز. زاڭدارىمىز وزىمىزدەن وزىپ كەتكەن, ال بۇل زاڭداردى جۇزەگە اسىراتىن قۇقىقتىق اكتىلەرىمىز كونە زاماندا قالىپ قويعان. سول سەبەپتى قوعامدا, زاڭ سالاسىندا قايشىلىق, تۇسىنبەستىك ءجيى تۋىندايدى. اينالىپ كەلگەندە زاڭدارىمىز بەن قۇقىقتىق اكتىلەرىمىز حالىقتىڭ الەۋمەتتىك جاعدايىن جاقسارتىپ, ەكونوميكانى تۇزەپ, جاعدايىمىزدى جەڭىلدەتۋدىڭ ورنىنا ودان سايىن قيىنداتىپ جىبەرگەن.
ەلىمىزدەگى زاڭ شىعارۋ ورىندارىنىڭ, ۇكىمەتتىڭ, بيلىك ورىندارىنىڭ ەڭ الدىمەن اينالىساتىن ماسەلەسى – وسى ولقىلىقتى جويۋ.
پرەزيدەنتىمىزدىڭ پارلامەنت دەپۋتاتتارى الدىندا وسى ماسەلەنى كوتەرىپ, ەرەكشە نازار اۋدارۋى كوڭىلگە ۇلكەن ءۇمىت ۇيالاتادى. مەملەكەت باسشىسى كونستيتۋتسياعا قايشى نورمالاردى جارامسىز دەپ تانىپ, وسىنداي ەرەجەلەرگە سۇيەنىپ قابىلدانعان سوتتىڭ جانە باسقا مەملەكەتتىك ورگانداردىڭ شەشىمدەرىن قايتا قاراۋدى تاپسىردى. حالىقتىڭ كۇتىپ وتىرعانى دا وسى.
ءمادي مىرزاعاراەۆ,
باتىس قازاقستان وبلىستىق ادۆوكاتتار القاسىنىڭ مۇشەسى
