شاعىن جانە ورتا بيزنەستى دامىتۋ, كاسىپكەرلەرگە قولداۋ ءبىلدىرۋ, اسىرەسە نەسيەلەندىرۋ جاعدايىن وڭتايلاندىرۋ ماسەلەلەرىنە ايرىقشا نازار اۋدارىلدى. شالعايداعى اۋىل تۇرعىندارىنا ءتيىستى يگىلىكتىڭ ءبارى قولجەتىمدى بولاتىنى, ول ءۇشىن مەملەكەت كورسەتەتىن قىزمەتتەر تۋرالى زاڭدارعا وزگەرتۋلەر ەنگىزىلەتىنىن اتاپ ايتتى.
راسىندا, ەلدىڭ كۇنكورىس كوزىنە اينالعان شاعىن جانە ورتا بيزنەستى دامىتۋ كۇن تارتىبىندە تۇرعان ماسەلە. وسى سالانى كەڭەيتۋ ارقىلى الەۋمەتتىك وسال توپتاعى ازاماتتاردى قولداپ, ولاردىڭ ءوز ءناسىبىن كاسىبىنەن تابۋدىڭ مۇمكىندىگى مولايا تۇسەرى ءسوزسىز. جاسىراتىنى جوق, ەلىمىزدە مۇمكىندىگى شەكتەۋلى جانداردىڭ قاتارى وسپەسە, كەمىپ وتىرعان جوق. ولاردىڭ اراسىندا مەملەكەتتىك قولداۋعا مۇقتاجدارى دا جوق ەمەس. سونداي-اق سپورتتىق نىسانداردى جاڭعىرتۋ جايى نازاردان تىس قالمادى. قاراپ وتىرساڭىز, بارلىعى دا ادامنىڭ جايلى ورتادا قالىپتى ءومىر سۇرۋىنە جاسالعان نىق قادامدار دەۋگە بولادى.
پرەزيدەنتتىڭ «اۋىل – التىن بەسىگىم», «اۋىل اماناتى» اتتى باعدارلامالاردى ىسكە اسىرۋدا مەملەكەت تاراپىنان قارجىلاي قولداۋ كورسەتىلەتىندىگى, جەر, سۋ ماسەلەسىندە دە وتە ماڭىزدى جايتتاردىڭ كوتەرىلۋى شىن مانىندە الەۋمەتتىڭ الەۋەتىن كۇيتتەگەن قادامدار دەپ قابىلدادىم. ادامي كاپيتالدى دامىتۋ, كادرلاردى دايارلاۋ, ءبىلىم ساپاسىن ارتتىرۋ, مەكتەپتەردىڭ تەحنيكالىق بازاسىن نىعايتۋ مەن شەكارالى ايماقتارداعى 65 اۋىلدىڭ تۇرمىستىق جاعدايىن جاقسارتۋ جايى بۇگىنگى كۇننىڭ ەڭ وزەكتى ماسەلەلەرى ەكەندىگىن اڭعارتادى. سونىمەن قاتار «قازاقستان – 2050» ستراتەگيالىق باعدارلاماسىن تۇبەگەيلى قايتا قاراۋ قاجەتتىگى دە ەلەڭ ەتكىزدى.
ەل اماناتىن ارقالاعان ماجىلىسمەندەر مەن ءار دەڭگەيلى ءماسليحات دەپۋتاتتارى بىرلەسە جۇمىس ىستەگەندە عانا «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت قالىپتاسادى» دەگەن سەنىممەن ءسوزىن اياقتادى. بۇگىنگى سەسسيا جۇمىسى قوعام الدىندا زور مىندەتتەر تۇرعانىن, ونى جۇزەگە اسىرۋ ارقىلى حالىقتىڭ الەۋمەتتىك-ەكونوميكالىق احۋالى الدەقايدا جاقسارا تۇسەدى دەگەن ۇمىتتەمىن.
ءنايلا ۇمبەتوۆا,
قۇرمەت وردەنىنىڭ يەگەرى
الماتى وبلىسى
