پرەزيدەنت ءوز سوزىندە ءبىلىم ساپاسىن, اسىرەسە ورتا ءبىلىمنىڭ دەڭگەيىن ارتتىرۋ ءۇشىن باتىل شەشىم قابىلداۋ قاجەت ەكەنىن ايتا كەلىپ: «ماعان كەيبىر تاجىريبەلى ۇستازدار ءتيىستى مينيسترلىك دايىنداعان تاپسىرمالار تىم كۇردەلى دەپ شاعىمداندى. بالكىم, ونى جەڭىلدەتۋ, جەتىلدىرۋ كەرەك شىعار. بۇل سالادا قاتىپ قالعان قاتاڭ ەرەجە بولماۋى كەرەك. بىراق نەگىزى ۇستازدارعا قويىلاتىن تالاپ جوعارى بولۋعا ءتيىس», دەدى.
شىنىندا دا مۇعالىمدەردىڭ بىلىكتىلىك ەمتيحانىندا ارتىق تالاپتار بار ەكەنى راس. ونى ۇزاتپاي رەتتەسە بولادى. الايدا ءبىلىم ساپاسى تىكەلەي ۇستازعا بايلانىستى ەكەنى انىق. ءبىز ءبىلىمدى ۇرپاق دايارلاپ شىعارۋ ءۇشىن مۇعالىمدەردىڭ بىلىمدىلىگىنە, بىلىكتىلىگىنە, ىسكەرلىگىنە باسا نازار اۋدارۋ قاجەت. ماسەلەن, مەكتەپتەردى زاماناۋي قۇرال-جابدىقپەن جاراقتاپ, ماتەريالدىق-تەحنيكالىق بازاسىن قانشا نىعايتقانىمەن, وقۋشىنىڭ ساپالى ءبىلىم الۋى ۇستازدىڭ قولىندا. سونداي-اق وقىتۋشىنىڭ بويىندا بىلىكتىلىگىمەن بىرگە, ۇستازدىق قاسيەتى دە بولۋى قاجەت. ەگەر ول وتە بىلىكتى بولعانىمەن جاڭاعى قاسيەت بويىنان تابىلماسا, وقۋشىعا ءوز دارەجەسىندە ءبىلىم بەرە المايدى. سوندىقتان وسى قاسيەتتى قاتار ۇستانعان ۇستازدىڭ جۇلدىزى جارىق.
سونىمەن بىرگە مەملەكەت باسشىسى مۇعالىم تاپشىلىعىن جەلەۋ ەتىپ, مەكتەپكە كەز كەلگەن ادامدى جۇمىسقا الا بەرۋگە بولمايتىنىن ايتا كەلىپ, مۇعالىم دايارلاۋ ءىسىن جەتىلدىرۋ ءۇشىن ناقتى شارالار قابىلداۋ قاجەت ەكەنىنە ماڭىز بەردى. «بىزدە پرەزيدەنتتىك جاستار كادر رەزەرۆى بار. ءدال سول سياقتى ءبىلىم سالاسىنا وزگەرىس اكەلەتىن 1 مىڭ مامان ارنايى دايىندىقتان وتەتىن بولادى. وسىعان وراي ءتيىستى باعدارلاما قابىلدانادى.كادر ماسەلەسى جوعارى ءبىلىم بەرۋ جۇيەسى ءۇشىن دە وتە وزەكتى», دەدى پرەزيدەنت.
جيىندا كوتەرىلگەن كادر ماسەلەسى دە كوڭىلىمنەن شىقتى. ءوز تاجىريبەمنەن ءبىر مىسال كەلتىرەيىن. ەڭبەك جولىمدى ماتەماتيكا ءپانى مۇعالىمى بولىپ باستاپ, ودان سوڭ مەكتەپ ديرەكتورىنىڭ تاربيە ءىسى جونىندەگى ورىنباسارى, سوسىن وقۋ ءىسى جونىندەگى ورىنباسارى بولدىم. سوسىن مەكتەپ ديرەكتورلىعىنا تاعايىندالدىم. وسىنداي باسپالداقتان وتكەن ماماننىڭ تاجىريبەسى مولايىپ, ءىسى العا باسادى. بۇرىن مەكتەپ ديرەكتورلارى ارنايى كۋرستا وقىپ, بىلىكتى مامانداردىڭ ءدارىسىن تىڭدايتىن. وندا مەكتەپتەگى وقۋ ۇدەرىسى, تاربيە جۇمىسى, ءبارى ايتىلادى. زاڭناما قۇجاتتارىمەن دە تانىستىرادى. مەكتەپ ديرەكتورى بولۋ وڭاي ەمەس. ۇلكەن جاۋاپكەرشىلىكتى جۇكتەيدى.
ەل پرەزيدەنتى قاسىم-جومارت توقاەۆتىڭ VIII سايلانعان پارلامەنتتىڭ العاشقى سەسسياسىندا سويلەگەن ءسوزى دەپۋتاتتارعا ءوز مىندەتتەرىن ساپالى ورىنداۋعا جول سىلتەگەن نۇسقاۋ بولدى دەپ ەسەپتەيمىن.
اياگۇل ميرازوۆا,
قازاقستاننىڭ ەڭبەك ەرى
