بۇگىندە جۇكتى كونتەينەرمەن تاسىمالداۋ كولەمى ءسات سايىن ارتىپ كەلەدى. وتكەن جىلدىڭ وزىندە «قازاقستان تەمىر جولى» ۇلتتىق كومپانياسى جەلىسى بويىنشا تاسىمالداناتىن ەكسپورتتىق جۇكتەردىڭ جالپى كولەمىندەگى كونتەينەرلىك تاسىمالدىڭ ۇلەسى 4,4 پايىزدى, ياعني 3,5 ملن توننا جۇكتى قۇراعان.
«قازاقستان تەمىر جولى» ۇك» اق-نىڭ لوگيستيكا جونىندەگى باسقارۋشى ديرەكتورى ەرلان قويشىباەۆ: «كونتەينەرلەندىرۋ – تەمىرجول لوگيستيكاسىنىڭ بولاشاعى زور ەڭ پەرسپەكتيۆالىسى. سونىمەن بىرگە ەڭ كۇردەلى اسپەكتىسى. سونداي-اق الەمدەگى ەپيدەميالار مەن گەوساياسي داعدارىستارعا قاراماستان بىرقالىپتى جۇمىس ىستەي الاتىن جىلدام ءارى سەنىمدى كولىك ءتۇرى», دەگەندى شەگەلەپ ايتادى.
قولداعى مالىمەتتەرگە مويىن بۇرساق, مۇناي ونىمدەرى, تىڭايتقىشتار, ءتۇستى رۋدالار, قۇرىلىس جۇكتەرى, قارا مەتالدار سياقتى, تاعى باسقا دا جۇك تۇرلەرى بويىنشا ەكسپورتتىق تاسىمالدارداعى كونتەينەرلىك تاسىمالداۋ كولەمىنىڭ ارتىپ كەلە جاتقانى انىق بايقالادى. مىسالى, وتكەن جىلى كونتەينەردەگى ەكسپورت كولەمى 30 پايىزعا وسكەن. ونىڭ ىشىندە استىق ونىمدەرى بار 49 مىڭنان استام جفە شەتەلدەرگە شىعارىلعان. بۇل كورسەتكىش بۇرناعى جىلمەن سالىستىرعاندا 4,2 ەسە جوعارى بولىپ وتىر. جۇك قىتايدىڭ الاشاڭقاي, ءۇرىمشى, سيان, چۋنتسين ستانسالارىنا, سونداي-اق Tرانسكاسپي حالىقارالىق كولىك باعدارى ارقىلى تۇركيانىڭ مەرسين پورتى باعىتىنا جونەلتىلىپ تۇردى.
بۇلارمەن بىرگە ەكسپورتقا باعىتتالعان كونتەينەردەگى مۇناي ونىمدەرى 14,4 ەسە, ۇنتاقتاۋ ونىمدەرى, ياعني كەبەك, قۇراماجەم, بيداي ۇنى 6,3 ەسە ارتقان. جۇكتىڭ باسىم بولىگى قىتايعا قاراي جول تارتىپ جاتىر.
ءداندى داقىلداردان بولەك, باسقا دا كوپتەگەن نومەنكلاتۋرالار كونتەينەرمەن جونەلتۋگە جارامدى جۇكتەرگە جاتادى. مىسالى, وتكەن جىلدىڭ قاراشا ايىندا Ydd Corporation قاراعاندى فەرروقورىتپا زاۋىتىنان تۇركياعا فەرروسيليتسي تيەلگەن پيلوتتىق كونتەينەرلىك پويىز جونەلتىلسە, تامىز ايىندا تاجىكستاننىڭ التىن ءوندىرۋ سالاسىنداعى ءىرى كاسىپورىندارىنىڭ ءبىرى – «زارافشون» بك جشق-دان سپيتامەن – دوستىق باعىتى بويىنشا ءتۇستى مەتالدار كەنى بار العاشقى كونتەينەرلىك پويىز جولعا شىققان.
وعان قوسا جىتىقارا ستانساسىنان ۆەتنامنىڭ يەن ۆە ستانساسىنا كونتەينەر ارقىلى «قوستاناي مينەرالدارى» تاۋ-كەن ءوندىرۋ كومپانياسىنىڭ اسبەست ونىمدەرى جونەلتىلىپ ءجۇر. سونداي-اق فلەكسيتەنكتەردە قازاقستاندىق وسىمدىك مايى قىتايدىڭ شانحاي, سيان جانە نانتۋن قالالارىنا تۇراقتى تۇردە جىبەرىلىپ كەلەدى. ال ءتۇستى مەتالداردى – كونتەينەرلەردە TMTM ارقىلى تۇركيا مەن گرۋزيا باعىتىندا جونەلتۋ ۇيىمداستىرىلعان.
قازىرگى كەزدە كونتەينەرلىك ەكسپورتتىق جۇكتەردىڭ الەۋەتى شامامەن 22 ملن توننانى نەمەسە تاسىمالداناتىن ەكسپورتتىق جۇكتەردىڭ جالپى كولەمىنىڭ 28 پايىزىن قۇراپ وتىر.
