ء«بىز ونى 8 ناۋرىزدا SDN تىزىمىنەن شىعاردىق. قازىر كورسەتكىشتەرى جاقسى, كاپيتال جەتكىلىكتىلىگى – 10 پايىز. بانكتىڭ اكتسيونەرى بولىپ سانالاتىن «بايتەرەك» Bereke Bank-ءتى ساتۋ ءۇشىن ينۆەستور ىزدەۋ جۇمىستارىن باستادى. بانكتى قولداۋ ءۇشىن بيۋدجەت قارجىسى پايدالانىلعان جوق. مەملەكەتتىك قولداۋ دا كورسەتىلمەدى. ازىرگە بانكتى ساتىپ الۋعا دايىن الەۋەتتى ساتىپ الۋشى جوق», دەدى ءمادينا ابىلقاسىموۆا.
«سبەربانككە» اقش سانكتسياسى 2022 جىلى 24 اقپاندا سالىندى جانە بانك SWIFT حالىقارالىق تولەم جۇيەسىنەن اجىراتىلدى. مۇنداي شەكتەۋلەر بانكتىڭ ەنشىلەس ۇيىمدارىنا, ياعني قازاقستانداعى بانكىنە دە اسەر ەتتى.
ايتا كەتەيىك, 2023 جىلدىڭ 8 ناۋرىزىندا اقش قارجى مينيسترلىگىنىڭ شەتەل اكتيۆتەرىن باقىلاۋ جونىندەگى باسقارماسى (OFAC) قارجى ينستيتۋتىن Specially Designated Nationals (SDN) سانكتسيالىق تىزىمىنەن جانە سەكتورلىق سانكتسيالار تىزىمىنەن (SSI) شىعاردى. سانكتسيالاردى الىپ تاستاۋعا اكتسيونەردىڭ جانە بانك اتاۋىنىڭ وزگەرۋى ىقپال ەتكەن. بانك سانكتسيا تۇزاعىنا تۇسكەننەن كەيىن وعان «بايتەرەك» حولدينگى 2022 جىلدىڭ قىركۇيەگىنەن باستاپ يەلىك ەتكەن ەدى.
«بۇل – ەلىمىزدىڭ قارجى نارىعىندا بولعان تاريحي ءسات. Bereke Bank-ءتى سانكتسيالىق تىزىمنەن شىعارۋ ءۇشىن اكتسيونەردىڭ, ۇلتتىق بانكتىڭ, رەتتەۋشى ورگاننىڭ تاراپىنان كوپ كۇش جۇمسالدى. سونداي-اق ءىىم جانە اقش-تاعى ەلشىلىك ۇلكەن قولداۋ كورسەتتى. ايتا كەتەرلىگى, بانك بارلىق قيىندىقتى ەڭسەرىپ قانا قويمادى, ول ءوزىنىڭ كليەنتتەرى مەن سەرىكتەستەرىنىڭ الدىنداعى بارلىق مىندەتتەمەلەرىن ورىنداۋدى توقتاتپادى ءارى ەلىمىزدەگى ون ۇزدىك ەكىنشى دەڭگەيلى بانك (ەدب) قاتارىندا قالدى. بۇل قارجى ينستيتۋتىنىڭ قىزمەتكەرلەرىنىڭ كاسىبيلىگى مەن سەنىمدىلىگىنىڭ تاعى ءبىر دالەلى بولدى», دەدى جاعدايعا وراي پىكىر بىلدىرگەن بانكتىڭ باسقارما توراعاسى اندرەي تيمچەنكو.
رەسمي حابارلاماعا سۇيەنسەك, بانك سانكتسيالار كەزىندە ءوز قىزمەتىن توقتاتقان جوق جانە حالىق پەن بيزنەسكە ۇزبەي قىزمەت كورسەتتى. شەكتەۋلەر كوبىنەسە ۆاليۋتالىق وپەراتسيالارمەن, اتاپ ايتقاندا, اقش دوللارىندا, ەۋرودا جاسالاتىن وپەراتسيالارمەن, سونداي-اق كوررەسپوندەنتتىك بانكتىك قاتىناستارمەن جانە شەتەلدىك سەرۆيستەرمەن بايلانىستى بولعان.
اندرەي تيمچەنكونىڭ ايتۋىنشا, سانكتسيالاردىڭ الىپ تاستالۋىمەن بايلانىستى بانكتى ساپالى دامىتۋ جانە نىعايتۋ بويىنشا العا ۇلكەن جوسپارلار قويىلدى.
بۇگىندە Bereke Bank شوتتاردان اقشا شەشۋ جانە ولاردى تولىقتىرۋ وپەراتسيالارىنىڭ سپەكترىن, بولشەك كليەنتتەر, سونداي-اق كورپوراتيۆتىك بيزنەستىڭ بارلىق سەگمەنتتەرى ءۇشىن قارجى ونىمدەرى مەن سەرۆيستەرىن, تاۋارلار مەن قىزمەت اقىسىن تولەۋ وپەراتسيالارىن, ۇلتتىق جانە شەتەل ۆاليۋتاسىندا (دوللار مەن ەۋرونى قوسپاعاندا) جاسالاتىن اقشا اۋدارىمدارىن جانە بانكوماتتار ارقىلى جۇرگىزىلەتىن وپەراتسيالاردى ۇسىنادى. قىزمەتتەر «B-Bank» (جەكە تۇلعالارعا) جانە «B-Business» (زاڭدى تۇلعالارعا) ءموبيلدى قوسىمشالارىندا, سونداي-اق بارلىق بولىمشەلەردە قولجەتىمدى.
