اتالعان تۋرنيردە قايرات احمەتوۆ تە ونەر كورسەتەدى. ءار جەڭىسىنەن كەيىن «قارا جورعا» بيلەيتىن قازاق جىگىتىن جانكۇيەرلەر جاقسى بىلەدى. 35 جاستاعى قانداسىمىز وسى سپورت ءتۇرىن سەرىك ەتكەلى 13 جىلعا جۋىقتادى. سول ارالىقتا 31 كەزدەسۋ وتكىزىپ, 29 جەڭىسكە جەتتى. 18 قارسىلاسىن ەسىنەن تاندىردى. 2015 جىلى ول بەيجىڭدە برازيليالىق ادريانو موراەستەن باسىم ءتۇسىپ, اتالعان نۇسقانىڭ چەمپيوندىق بەلبەۋىن يەلەندى. ارادا ەكى جىل وتكەن سوڭ ءدال سول سپورتشىدان جەڭىلىپ, اتاعىنان ايىرىلدى. 2018 جىلى فيليپپيندىك دجەحە ەۋستاكيوعا ەسە جىبەردى. سودان كەيىنگى بەس كەزدەسۋدە احمەتوۆتىڭ ۇستەمدىگى ەش كۇمان تۋعىزعان جوق.
قايراتتىڭ قارسىلاسى – ريس ماكلارەن. 31 جاستاعى اۋستراليانىڭ فايتەرى وكتاگونعا 26 مارتە شىعىپ, 16 رەت جەڭىسكە جەتتى. 13 باسەكەنى مەرزىمىنەن بۇرىن اياقتادى. بۇل سپورتشىلار وسىدان ءتورت جىل بۇرىن كۇش سىناسقان ەدى. ول كەزدە احمەتوۆ ۇپاي سانىمەن جەڭىس تويىن تويلادى.
اقش-تاعى جارىستىڭ باستى جەكپە-جەگىندە كەزىندە UFC-ءدىڭ ەڭ بەلدى فايتەرلەرىنىڭ ءبىرى بولعان امەريكالىق دەمەتريۋس دجونسون مەن «ONE Championship» نۇسقاسىنىڭ قازىرگى چەمپيونى ادريانو موراەس ايقاسادى.
