كۇنى كەشە زەرەندى سەلوسىنداعى جىلۋ جۇيەسىندە اپات ورىن الدى. ات توبەلىندەي اۋىلدىڭ 400-دەن استامى تۇرعىن ءۇيى مەن 6 بىردەي الەۋمەتتىك نىسان جىلۋسىز قالدى. وقىس وقيعا ورىن العان كەزدە ورتالىق كوشەنىڭ بىرىندە ۇزىندىعى 200 مەتردەن اساتىن جىلۋ قۇبىرى قۇلاپ قالعان. قازىرگى كۇنى ماماندار اپاتتىڭ ناقتى سەبەپتەرىن انىقتاۋ ۇستىندە. ءبىر ايتا كەتەرلىگى, زەرەندىدەگى جاڭا قازاندىق وسىدان ەكى جىل بۇرىن عانا ورناتىلىپ, جەلى تارتىلعان. الايدا دۇرىس جۇمىس ىستەمەي, تۇرعىندار تاراپىنان وكپە-رەنىش ءجيى ايتىلاتىن.
– جىلۋ بەرۋ جۇيەسىنە بىلتىر جۇك كولىگى سوعىلىپ, زالال كەلتىرگەن, – دەيدى زەرەندى اۋدانى اكىمىنىڭ ورىنباسارى ەسىمحان بايعابىلوۆ, – كەيىن ءبارى جەدەل رەتكە كەلتىرىلدى. بۇل جولعى جاعداي بۇرىن-سوڭدى ورىن الماعاندىقتان, ءدال قازىر سەبەبىن قولمەن قويعانداي ەتىپ ايتۋ قيىن. اپات نەلىكتەن ورىن العاندىعى تۇبەگەيلى زەرتتەلگەننەن كەيىن بەلگىلى بولادى. قالاي بولعاندا دا جىلۋ جۇيەسىن تارتقان ۇيىمدار جاۋاپقا تارتىلۋى مۇمكىن.
اۋدان اكىمىنىڭ پىكىرىنشە, تۇرعىندارعا ورتالىق قازاندىق ارقىلى جىلۋ بەرۋ كەشىكتىرىلمەيتىن سىڭايلى. كوكشەگە كوكتەم كەلدى دەگەنىمەن, تۇسكە دەيىن ءمۇيىز, تۇستەن كەيىن كيىز بولىپ تۇر. جەرگىلىكتى تۇرعىنداردىڭ ايتۋىنا قاراعاندا, ۇيلەرى سۋىپ كەتكەن. ادەتتە ءبىزدىڭ وڭىردە جىلۋ ءساۋىر ايىنىڭ سوڭىنا دەيىن بەرىلەدى.
– جىلۋ ءالى بەرىلگەن جوق, – دەيدى سەلو تۇرعىنى مارات شاميعانوۆ, – ءۇيدىڭ ءىشى ىلعالدانىپ, سالقىنداپ كەتتى. ءبىز شىدار ەدىك, توسەك تارتىپ جاتقان ادامدارعا قيىن بولىپ تۇر. كولدەنەڭ كوزگە كەمشىلىك كورىنىپ تۇرادى ەمەس پە, وسى جىلۋ قۇبىرى اۋەل باستا دۇرىس ورناتىلماعان سياقتى. ايتپەسە, سۋ جاڭا ەمەس پە؟ بالكىم, قۇبىردى دالادان وتكىزبەي, جەردىڭ استىمەن جىبەرۋ كەرەك پە ەدى؟
بۇگىنگى تاڭدا جىلۋ قۇبىرىنىڭ قۇلاعان بولىگىن قايتادان قالپىنا كەلتىرۋ جۇمىستارىن مەردىگەر ۇيىم شارتتىق مىندەتتەمەلەر شەڭبەرىندە جۇرگىزۋدە. ماماندار جىلۋ جەلىسىن جوندەۋ مامىر ايىنىڭ سوڭىنا دەيىن سوزىلۋى مۇمكىن دەيدى.
الداعى ۋاقىتتا جالعىز زەرەندىنىڭ عانا ەمەس, وڭىردەگى بارلىق ينفراقۇرىلىمداردىڭ جاعدايىن سۇزگىدەن وتكىزىپ, مۇقيات تەكسەرگەندە عانا مۇنداي وقىس وقيعا ورىن الماۋى ىقتيمال.
اقمولا وبلىسى,
زەرەندى اۋدانى
