فەستيۆالدە بالالار ۆوكال باعىتىندا «جۇرەك جىلۋى» اتالىمىندا ونەر كورسەتتى. «تاڭشولپان» بالالار ءۇيىنىڭ تاربيەلەنۋشىسى سەرگەي كاسيانوۆ كىشكەنتايلار اراسىندا وزا شاۋىپ, بايگە السا, ال ورتا جاس ساناتىندا ەكىنشى ورىندى تاتيانا كاسيانوۆا جەڭىپ الدى. تاتيانا دا «تاڭشولپان» بالالار ءۇيىنىڭ تاربيەلەنۋشىسى. «SOS تەمىرتاۋ بالالار اۋىلى» توبىنىڭ مۇشەسى انگەلينا ۆوستريكوۆا دا جوعارى جاس ساناتىندا كۇمىس جۇلدەگەر اتاندى.
– سەرگەي فەستيۆالدە ءبىرىنشى رەت ونەر كورسەتتى. تاتيانا كوپتەگەن وبلىستىق جانە قالالىق بايقاۋلاردىڭ لاۋرەاتى. بالالار 2 جىلدان بەرى انگە دەن قويىپ كەلەدى. جالپى, ءبىزدىڭ ورتالىقتا 25 ۇيىرمە جۇمىس ىستەيدى. ۆوكالدان باسقا, بي, فۋتبول, قازاقشا كۇرەس, دومبىرا جانە تاعى دا وزگە ۇيىرمەلەر بار, – دەيدى «تاڭشولپان» بالالار ءۇيى ديرەكتورىنىڭ تاربيە جۇمىسى جونىندەگى ورىنباسارى ايان كارىم.
سونداي-اق «ريزامىن حالقىما!» تەاترالدى نوميناتسيادا «جاس ورىنداۋشى» اتاعى وساكاروۆ اۋدانىنىڭ پيونەر بالالار ءۇيىنىڭ تاربيەلەنۋشىسى يرينا جاروۆاعا بەرىلدى.
فەستيۆال «ريزاشىلىق – مەيىرىمدىلىك بۇلاعى» ۇلتتىق مادەني-اعارتۋ جوباسى اياسىندا وتكەنىن اتاعان ءجون.
قاراعاندى
