پىكىرتالاستارعا قازاقستاننىڭ گەرمانياداعى ەلشىسى نۇرلان ونجانوۆ پەن ەكى ەلدىڭ سىرتقى ساياسي ۆەدومستۆولارى قۇرىلىمدىق بولىمشەلەرىنىڭ ديپلوماتتارى دا قاتىستى.
كونسۋلتاتسيالار بارىسىندا قازاقستاننىڭ كەشەندى ىشكى ساياسي جانە الەۋمەتتىك-ەكونوميكالىق جاڭعىرۋىنىڭ نەگىزگى اسپەكتىلەرىنە ەرەكشە نازار اۋدارىلدى. ر.ۆاسيلەنكو نەمىس ارىپتەستەرىنە قازاقستان پرەزيدەنتى قاسىم-جومارت توقاەۆ باستاماشىلىق ەتكەن رەفورمالار پاكەتتەرىن ىسكە اسىرۋ ناتيجەلەرى تۋرالى, سونداي-اق 19 ناۋرىزدا وتكەن قر پارلامەنتى ءماجىلىسى مەن ءماسليحاتتار دەپۋتاتتارىن سايلاۋ قورىتىندىلارى تۋرالى ەگجەي-تەگجەيلى ايتىپ, وتكەن پارلامەنتتىك سايلاۋدىڭ قوعامداعى وزگەرىستەردى جانە ەلدىڭ ساياسي جۇيەسىن ودان ءارى جاڭعىرتۋعا دەگەن ۇمتىلىستى كورسەتەتىنىن جەتكىزدى.
ءوز تاراپىنان م.ليۋتتەنبەرگ حالىقارالىق بايقاۋشىلاردىڭ وتكەن سايلاۋدى باعالاۋىنا نازار اۋدارىپ, ەلىمىزدەگى قوعامدىق-ساياسي وزگەرىستەردى وڭ سيپاتتادى جانە قازاقستاندى وڭىرلىك كونتەكستتە «ادام قۇقىقتارىن قورعاۋدىڭ كورنەكى ۇلگىسى» جانە «دەموكراتيالىق وزگەرىستەردىڭ درايۆەرى» دەپ اتادى.
تاراپتار ءبىلىم جانە مادەني-گۋمانيتارلىق ىنتىماقتاستىق سالالارىنداعى قازاقستان-گەرمانيا كووپەراتسياسىنىڭ وڭ ديناميكاسىن قولداۋعا بىرلەسكەن كۇش-جىگەر جۇمساۋعا كەلىستى. سونىمەن قاتار ساۋدا-ينۆەستيتسيالىق كورسەتكىشتەردىڭ قارقىندى ءوسۋىن اتاپ ءوتتى.
نەمىس ستاتيستيكاسىنا سايكەس, وتكەن جىلدىڭ قورىتىندىسى بويىنشا قازاقستان العاش رەت گفر-دىڭ 50 جەتەكشى ساۋدا ارىپتەستەرىنىڭ تىزىمىنە ەنىپ, 10,5 ملرد اقش دوللار تاۋار اينالىمىمەن 43-ءشى ورىنعا يە بولدى. ءبىزدىڭ دەرەكتەرگە سايكەس, گەرمانيامەن ساۋدا 2022 جىلى 2,8 ملرد اقش دوللار قۇراپ, 2021 جىلمەن سالىستىرعاندا 26,7%-عا ارتقان.
قازىرگى ۋاقىتتا ەلىمىزدە نەمىس كاپيتالىنىڭ قاتىسۋىمەن «SVEVIND» جانە «Goldbeck Solar» فيرمالارىن قوسا العاندا 600 كاسىپورىن جۇمىس ىستەيدى. ولار قازاقستاننىڭ وڭىرلەرىندە جاسىل سۋتەگى جانە جاڭارتىلاتىن ەنەرگيا ءوندىرىسى سالالارىندا اۋقىمدى جوبالاردى جۇزەگە اسىرۋدا.
سونىمەن قاتار گەرمانيا استاناسىندا ر. ۆاسيلەنكو گفر بۋندەستاگى دەپۋتاتتارى, «گەرمانيا – ورتالىق ازيا» پارلامەنتتىك توبىنىڭ توراعاسى ويگەن شميدتپەن, پەتر بىسترونمەن, مانفرەد گرۋندپەن جانە كريستيان گوركەمەن كەزدەسۋ وتكىزدى. كەزدەسۋ بارىسىندا 19 ناۋرىزدا وتكەن پارلامەنتتىك سايلاۋدىڭ قورىتىندىلارى جانە قازاقستاننىڭ جاڭارتىلعان دەپۋتاتتىق كورپۋسىنىڭ نەمىس تاراپىمەن ءوزارا ءىس-قيمىلى ءۇشىن باسىم باعىتتار تالقىلاندى.
مينيستر ورىنباسارىنىڭ جۇمىس باعدارلاماسىنىڭ جەكەلەگەن تارماقتارى ونىڭ بىرقاتار نەمىس باق وكىلدەرىنە ارنالعان بريفينگى جانە شىعىس ەۋروپا جانە حالىقارالىق زەرتتەۋلەر ورتالىعىنىڭ (ZOiS) اكىمشىلىك ديرەكتورى كريستيان شايحپەن, ZOiS عىلىمي قىزمەتكەرى بەاتە ەشمەنتپەن جانە ورتالىقتىڭ باسقا دا ساياساتتانۋشىلارىمەن جاھاندىق جانە وڭىرلىك كونيۋنكتۋرالار كونتەكستىندەگى قازاقستان-گەرمانيا ارىپتەستىك تاقىرىبىنداعى سۇحباتقا قاتىسۋى بولدى.
