قاسىم-جومارت توقاەۆ تاۋار گازى تاپشىلىعى بولماۋ ءۇشىن نارىقتى ءتيىستى دەڭگەيدە قامتاماسىز ەتۋدى جانە گاز تاريفىنە قاتىستى وزگەرىستەر ەنگىزۋدى تاپسىردى.
«بىلتىر تاۋار گازىنىڭ تاپشىلىعىنا تاپ بولدىق. بۇل جاعداي بۇكىل ەلىمىزدىڭ ەنەرگەتيكالىق قاۋىپسىزدىگىنە قاتەر توندىرە جازدادى. مۇنداي كەلەڭسىزدىككە جول بەرمەۋ ءۇشىن نارىقتى گازبەن قامتاماسىز ەتۋ كەرەك. قازاقستاندا گازدىڭ باعاسى كورشى مەملەكەتتەرگە قاراعاندا الدەقايدا ارزان. شەتەلدەگى سياقتى ءارتۇرلى تاريفتەردى بىزگە دە ەنگىزۋ مۇمكىندىگىن قاراستىرعان ءجون.
جالپى تومەن تاريفتەر مەن تومەن باعالار ەكونوميكامىزعا تەرىس ىقپال ەتەدى. بولىنگەن بارلىق سۋبسيديالار كورشى ەلدەرگە بوسقا كەتەدى. قانشالىقتى قيىن بولسا دا, بۇل ماسەلەنى بىرتىندەپ شەشۋ قاجەت. باسقا جول جوق. قازىرگى ۋاقىتتا ءزاۋلىم ۇيلەرىن كۇندىز-ءتۇنى تومەن تاريفپەن جىلىتاتىندار ءۇشىن جاڭا جۇيە بويىنشا گازدىڭ تەكشەمەترى قىمباتىراق بولۋعا ءتيىس. الەۋمەتتىك ادىلدىك دەگەنىمىز – وسى», دەدى پرەزيدەنت.
سونىمەن قاتار قاسىم-جومارت كەمەل ۇلى ۇنەمدەۋدى ۇيرەنۋ كەرەك دەپ قاتاڭ ەسكەرتتى.
«قولدا بار شيكىزاتتى پايدالانۋ تيىمدىلىگىن ارتتىرۋ ماڭىزدى. كۇندەلىكتى تۇرمىستا دا, مەملەكەت دەڭگەيىندە دە ۇنەمدەپ ۇيرەنۋ كەرەك. بۇل – الەمدىك تاجىريبە. ونىڭ وزەكتىلىگى قازىرگى كۇردەلى گەوساياسي احۋال جاعدايىندا كۇشەيە ءتۇستى. وندىرىستە دە, تۇرمىستا دا گازدى ارزان ەكەن دەپ بەي-بەرەكەت جاعا بەرۋگە بولمايدى. مۇنى دوعارۋ كەرەك. ۇكىمەت تاۋار گازىنىڭ ەنەرگەتيكالىق تيىمدىلىگىن ارتتىرۋ جانە ونى ۇنەمدى پايدالانۋ جوسپارىن ازىرلەۋى قاجەت», دەدى ق. توقاەۆ.
