ءدال سول 29 جاستاعى قاپ تاۋىنىڭ قىرانى وسىدان ءتورت جىل بۇرىن ماسكەۋدە جالاۋى جەلبىرەگەن Fight Nights Global 93 جارىسىندا حاميتوۆتى ۇپاي سانىمەن ۇتقان ەدى. جالپى, بۇل سپورتشى ارالاس جەكپە-جەكتى سەرىك ەتكەلى 10 جىلدان اسا ۋاقىت ءوتتى. سول ارالىقتا ابباسوۆ 32 كەزدەسۋ وتكىزىپ, 28 رەت جەڭىسكە جەتتى. 17 باسەكەدە ايقىن باسىمدىق تانىتتى. ول تەك 2014 جىلى يبراگيم تيبيلوۆ (سابميشن) پەن شوتا احۋلاشۆيلي (ۇپايمەن), 2016 جىلى ماگومەدسايگيد اليبەكوۆ (ۇپايمەن) جانە 2022 جىلى يسماەل بونفيمگە (ۇپايمەن) عانا ەسە جىبەردى. اسىرەسە, 2017-2022 جىلدار ناريمان ءۇشىن وتە تابىستى بولدى. سول بەس جىل ارالىعىندا 13 مارتە وكتاگونعا شىققان ازەربايجاندىق سپورتشى بارلىق باسەكەدە جەڭىسكە جەتتى. بىراق ول ءوزىنىڭ كارەراسىنداعى باستى جەكپە-جەگىندە جەڭىلىستىڭ كەرمەك ءدامىن تاتتى. بىلتىر كۇزدە لاس-ۆەگاستا ۇيىمداستىرىلعان Dana White Contented Series تۋرنيرىندە ول برازيليالىق يسماەل ءبونفيمدى ۇتقاندا UFC-مەن كەلىسىمشارتقا وتىراتىن ەدى.
جالپى, ناريمان ابباسوۆتىڭ سپورتتىق مانسابىندا جارقىن جەڭىستەر از بولعان جوق. ول قۋات حاميتوۆتان بولەك, قازاقتىڭ تاعى ءبىر تانىمال سپورتشىسى ءابىل بورانباەۆتان باسىم ءتۇستى. سونداي-اق ازەربايجاننىڭ وكىلىنەن «تاياق جەگەندەر» اراسىندا الەكساندر بۋتەنكو, ۋمار تاگيروۆ, ءشامىل ءامىروۆ, ءشامىل زاۆۋروۆ جانە ماريف پيراەۆ بار. كەزىندە ابباسوۆ Fight Nights Global پروموۋشەنىنىڭ التىن بەلبەۋىن دە يەلەندى.
«نايمانعا» كەلەر بولساق, ونىڭ جاسى – 35-تە. الماتى وبلىسى الاكول اۋدانىنىڭ تۋماسى جاستايىنان گرەك-ريم كۇرەسىن سەرىك ەتتى. قۋات 2011 جىلدان بەرى ارالاس جەكپە-جەكتەن وتكەن جارىستاردا كۇش سىناسىپ ءجۇر. سول كەزدەن بەرى 31 مارتە ايقاس الاڭىنا شىعىپ, 23 رەت جەڭىس تويىن تويلادى. 18 كەزدەسۋدى مەرزىمىنەن بۇرىن اياقتادى.
