ناۋرىز تويى مەن دومبىرا ءمۇسىنىنىڭ اشىلۋىنا حالىق قاھارمانى, تۇڭعىش عارىشكەر توقتار اۋباكىروۆ قاتىسىپ, ءسوز سويلەدى. قازاقتىڭ قارا دومبىراسى مەن ۇلتتىق قۇندىلىقتاردىڭ قاي-قايسىنا بولسىن قامقورلىقپەن قاراۋ كەرەگىن قاپەرلەدى ول سوزىندە. « ۇلىس وڭ بولىپ, ۇرپاق ساناسى جەتىلە ءتۇسۋى ءۇشىن مۇنداي باستامالار جەردە قالماۋى ءتيىس» دەيدى ول.
كوپشىلىك الدىندا ءسوز سويلەگەن حالىق قاھارمانى ت.اۋباكىروۆتىڭ يىعىنا وقالى شاپان جابىلدى. عارىشكەر بولسا حالىقتىڭ بۇل جورالعىسىنا العىسىن ءبىلدىرىپ, ونى استانا قالاسى الماتى اۋدانىنىڭ اكىمى ماقسات سامات ۇلىنىڭ يىعىنا كومكەردى. اۋدان اكىمى جيىلعان كوپشىلىكتى مەرەكەمەن قۇتتىقتاپ, جىلى لەبىزىن ءبىلدىردى.
استانا قالاسى الماتى اۋدانىنىڭ اكىمدىگى, «ۇلتتىق مۇددە كەڭەسى» قوعامدىق بىرلەستىگى جانە «كۇي اناسى» رەسپۋبليكالىق قورى ۇيىمداستىرعان ءدۇبىرلى دۋماندا كۇيشى-كومپوزيتورلار الاڭىنا كيىز ۇيلەر تىگىلىپ, قازان كوتەرىلدى. كوپشىلىك ناۋرىزكوجەدەن ءدام تاتتى. كۇي تارتىلىپ, كوپشىلىككە باتا بەرىلدى. كۇيشى دينا نۇرپەيىسوۆانىڭ ەسكەرتكىشىنە گۇل شوقتارى قويىلدى. باستى جاڭالىق – تۇعىرىمەن ەسەپتەگەندە 5 مەتر بولاتىن دومبىرا ءمۇسىنىنىڭ اشىلعانى دەر ەدىك.
«استانا قالاسى اكىمدىگىنىڭ قولداۋىمەن دينا ەسكەرتكىشى ماڭىندا مۋزىكالىق سۋبۇرقاق ورناتۋ جوسپاردا بار. بۇل جەر دەمالىس ايماعىنا اينالماق. تاۋلىك بويى قازاق كومپوزيتورلارىنىڭ كۇيلەرى مەن اندەرى ورىندالاتىن بولادى. ءار ادام ءوزىن قازاق ەلىنىڭ ازاماتى ەكەنىن سەزىنۋى ءۇشىن وسىنداي ىستەر قولعا الىنىپ جاتىر. ونەر ۇجىمدارىنىڭ كۇي تارتۋىنا ارنالعان اشىق ساحنا الاڭىن سالۋ كوزدەلىپ وتىر. يگى باستامانى قولداعان سىزدەرگە كوپ راقمەت», دەدى «كۇي اناسى» رەسپۋبليكالىق قورىنىڭ جەتەكشىسى تولەگەن قۋانىشەۆ.
قوعام قايراتكەرى, جۋرناليست سەرىك ەرعالي جىل باسى ناۋرىز مەيرامىنىڭ ەرەكشەلىگىنە توقتالىپ, ۇلتتىڭ ءتول ونەرىن جاس ۇرپاق ساناسىنا سىڭىرۋگە بارشامىز مۇددەلى بولۋىمىز كەرەگىن ايتتى.
قازاقستاننىڭ ەڭبەك سىڭىرگەن قايراتكەرى, پروفەسسور, كۇيشى ورىنباي دۇيسەن دينانىڭ «تويباستارىن» تارتىپ, تىڭدارمانداردىڭ ىستىق ىقىلاسىنا بولەندى.
