1925 جىلى قىزىلوردا قالاسىندا قازاق تەاترىنىڭ شىمىلدىعى اشىلدى. ەڭ العاشقى قويىلىم قوشكە كەمەڭگەر ۇلىنىڭ «التىن ساقينا» پەساسى نەگىزىندە قويىلدى.
قازىرگى كەزدە قازاقستاندا 65 تەاتر جۇمىس ىستەيدى, ونىڭ 55-ءى مەملەكەت مەنشىگىندە. سونىڭ ىشىندە تورتەۋى ەتنيكالىق تەاتر: ۇيعىر, كورەي, نەمىس جانە وزبەك تەاترى. تاۋەلسىزدىك جىلدارى ەلىمىزدە 21 مەملەكەتتىك تەاتر اشىلىپ, ورال, قاراعاندى, قوستاناي, نۇر-سۇلتان, وسكەمەن, شىمكەنت, تالدىقورعان, تۇركىستان قالالارىندا 11 تەاترعا زاماناۋي جاڭا عيمارات سالىندى. 2020 جىلى نۇر-سۇلتان قالاسىندا مۋزىكالىق جاس كورەرمەندەر تەاترى اشىلسا, قاليبەك قۋانىشباەۆ اتىنداعى مەملەكەتتىك اكادەميالىق مۋزىكالىق-دراما تەاترى رەسپۋبليكالىق دەڭگەيگە ءوتىپ, ۇجىم جاڭا عيماراتقا كوشتى. سونىمەن قاتار 2021 جىلى تۇركى الەمىنىڭ استاناسى رەتىندە رەسمي تۇردە مويىندالعان تۇركىستان قالاسىندا تۇركىستان مۋزىكالىق-دراما تەاترى اشىلىپ, ارنايى سالىنعان جاڭا عيماراتتا ءوز جۇمىسىن باستاعان.
2020 جىلى 5 تەاترعا, م.اۋەزوۆ اتىنداعى قازاق مەملەكەتتىك اكادەميالىق دراما تەاترى, اباي اتىنداعى قازاق مەملەكەتتىك اكادەميالىق وپەرا جانە بالەت تەاترى, م.لەرمونتوۆ اتىنداعى مەملەكەتتىك اكادەميالىق ورىس دراما تەاترلارىنا ۇلتتىق تەاتر مارتەبەسى بەرىلگەن.
