پرەزيدەنت بۇگىن تاريحي كۇن ەكەنىن اتاپ ءوتىپ, جاستارعا ريزاشىلىعىن ءبىلدىردى.
«شىن مانىندە, بۇل كۇن ەل ومىرىندە ماڭگى ساقتالادى. ەندى 15 ناۋرىز – كونستيتۋتسيا كۇنى بولىپ بەلگىلەنەدى. بۇل – ەلىمىزدىڭ باستى قۇجاتى. مەن باسقا دا مەملەكەتتەردىڭ كونستيتۋتسيالارىمەن تانىسىپ شىقتىم. ءبىزدىڭ كونستيتۋتسيامىز ەڭ ۇزدىك اتا زاڭداردىڭ قاتارىندا تۇرادى دەپ سەنىممەن ايتا الامىن», دەدى مەملەكەت باسشىسى.
سونىمەن قاتار پرەزيدەنت جاڭا كونستيتۋتسيا, ەڭ الدىمەن, جاستارعا ارنالعانىنا نازار اۋداردى. اتا زاڭعا ۆولونتەرلىك قىزمەت, عىلىم, يننوۆاتسيا جانە جاساندى ينتەللەكت سياقتى ۇعىمدار ەنگىزىلگەنىنە توقتالدى.
«اۋقىمدى ۇگىت-ناسيحات ناۋقانى جۇرگىزىلدى. الدىمىزدا جۇمىس كوپ. ەندى جازدا پارلامەنت سايلاۋى وتەدى. ونى ءبىر ەل بولىپ اتقارۋىمىز كەرەك. بۇل جاستاردىڭ پارلامەنتى بولۋى قاجەت دەپ ويلايمىن», دەدى قاسىم-جومارت توقاەۆ.
كەزدەسۋدە «جاستار رۋحى» جاستار قاناتىنىڭ توراعاسى اقەركە ەسكەندىروۆا, كرەاتيۆتى يندۋستريا وكىلى, كاسىپكەر كاميل بايراموۆ, بەلسەندى جاستار ەرجان حاميتوۆ پەن نۇربول سەرىكباي ءسوز سويلەدى.
جاستار ءبىر اي ىشىندە ءتۇرلى فورماتتا 5 مىڭعا جۋىق كەزدەسۋ وتكىزىپ, وعان 1,5 ميلليوننان اسا ازامات قاتىسقانىن جەتكىزدى. سونداي-اق ەلىمىزدە قولعا الىنعان وزگەرىستەردىڭ بارلىعىن قولدايتىنىن ايتتى.
ايتا كەتەيىك, 15 ناۋرىزدا قازاقستاندا جاڭا كونستيتۋتسيانى قابىلداۋ ماسەلەسىنە ارنالعان رەسپۋبليكالىق رەفەرەندۋم ءوتتى. ەلدىڭ بارلىق وڭىرىندە, سونداي-اق شەتەلدەگى قازاقستان رەسپۋبليكاسىنىڭ ديپلوماتيالىق وكىلدىكتەرىندە داۋىس بەرۋ ۋچاسكەلەرى اشىلدى. قازاقستاندىقتار «كونستيتۋتسيالىق رەفورمانى قولداي ما, الدە قولداماي ما» دەگەن سۇراققا جاۋاپ بەردى.
اۋماقتىق كوميسسيالاردىڭ دەرەكتەرىنە سايكەس, ەلدىڭ بارلىق وڭىرىندە رەفەرەندۋمعا 9 126 850 قازاقستاندىق كەلىپ داۋىس بەرگەن. الدىن الا مالىمەت بويىنشا, رەفەرەندۋمداعى جالپى قاتىسۋ دەڭگەيى 73,24% بولدى.
