اسا قىزىقتى باسەكە جارتىلاي جەڭىل سالماقتاعى نۇرسۇلتان قاسىمحانوۆ پەن يراندىق مورتەزا رەزاي (6-2) اراسىندا ءوتتى. 31 جاستاعى جەتىسۋ وبلىسى الاكول اۋدانىنىڭ تۋماسى بۇعان دەيىن قازاق كۇرەسىمەن اينالىسقان. 2014 جىلدان بەرى ارالاس جەكپە-جەككە مىقتاپ دەن قويىپ, الماتىدا ىرگەتاسى قالانعان «الاش پرايد» كلۋبىنىڭ نامىسىن قورعادى. سول ارالىقتا كاسىمحانوۆ 14 كەزدەسۋ وتكىزىپ, 10 رەت جەڭىسكە جەتتى. بۇل باسەكەلەردىڭ تەڭ جارتىسىن ايقىن باسىمدىقپەن اياقتادى. 2018-2021 جىلدارى چەشەنستاننىڭ اسا پروموۋشەنىندە كۇش سىناستى. اتالعان جارىستا بەس رەت وكتاگونعا شىعىپ, ۇشەۋىندە جەڭىلىستىڭ كەرمەك ءدامىن تاتتى. سوڭعى رەت ماسكەۋدە رەسەيدىڭ مىقتى فايتەرى الەكسەي پولپۋدنيكوۆتان ۇتىلعاننان كەيىن ءبىر جارىم جىل ۋاقىت دەمالدى.
الاتاۋ باۋرايىندا نۇرسۇلتان يران سپورتشىسى رەزايمەن ايانباي ايقاستى. العاشىندا پارسى ەلىنىڭ وكىلى اجەپتاۋىر قارسىلىق كورسەتتى. بىراق ۋاقىت وزعان سايىن قارقىنىن كۇشەيتكەن قانداسىمىز وڭتايلى ءساتتى ۇتىمدى پايدالانىپ, قارسىلاسىن ۇرىپ جىقتى. مورتەزا قۇلاعان بەتتە بىرنەشە اۋىر سوققى جۇمساپ ۇلگەردى. تورەشىنىڭ جەكپە-جەكتى توقتاتۋدان باسقا امالى قالمادى.
اتالعان ءتۋرنيردىڭ باستى باسەكەسىندە جارتىلاي جەڭىل سالماقتاعى ايۆاز ايدينوۆ (5-1) پەن قىرعىزستاندىق ىلىمبەك اقىلبەك ۇلى (6-1) كۇش سىناستى. ءبىرىنشى راۋندتا جەرلەسىمىز قارسىلاسىن نوكداۋنعا جىبەرگەن ەدى. بىراق بۇل جاعداي الاتاۋدىڭ ارعى جاعىنان كەلگەن جىگىتتىڭ ساعىن سىندىرا العان جوق. ايقاس الاڭىندا بارىن سالعان ول ءۇشىنشى راۋندتا ايدىندى «قىلقىندىرۋ» ادىسىمەن ۇتتى. وسىلايشا, اسىلبەك ۇلى اتالعان پروموۋشەننىڭ التىن بەلبەۋىمەن قاتار, 10 مىڭ اقش دوللارى كولەمىندە سىياقىنى قالتاسىنا باستى.
