اتىراۋدا بىرنەشە مەكتەپتىڭ وقۋشىلارى ونلاين وقيدى

اتىراۋ قالالىق ءبىلىم ءبولىمى باسشىسىنىڭ ورىنباسارى ەرلان بالمۇحانوۆتىڭ مالىمەتىنشە، №13، 31، 19، 22 جانە 27-مەكتەپتە كۇردەلى جوندەۋ جۇمىستارىن باستاۋ ءۇشىن وسىنداي شەشىم قابىلدانعان.

«اتالعان مەكتەپتەردىڭ وقۋشىلارى ءتورتىنشى توقساندا ساباقتى قاشىقتان وقۋعا اۋىستىرىلدى. سەبەبى ناۋرىزدىڭ سوڭىندا بەس مەكتەپتە كۇردەلى جوندەۋ جۇمىستارىن باستاۋ جوسپارلانىپ وتىر. قازىر مەردىگەر مەكەمەلەرمەن شارتتار جاسالىپ، دايىندىق جۇمىستارى جۇرگىزىلىپ جاتىر. جوندەۋ جۇمىستارىن جۇرگىزۋ مەرزىمى 3،5 ايدان 6،5 ايعا دەيىن سوزىلادى»، دەپ حابارلادى ەرلان بالمۇحانوۆ.

ونىڭ ايتۋىنشا، كەيبىر مەكتەپتەردىڭ عيماراتى پايدالانۋعا بەرىلگەنىنە 50 جىلدان اسقان. ماسەلەن، 1330 وقۋشى ءبىلىم الاتىن ق.ساتپاەۆ اتىنداعى №19 مەكتەپ-گيمنازياسىنىڭ عيماراتى 1972 جىلى ىسكە قوسىلعان.

وبلىس اكىمىنىڭ ورىنباسارى جاسۇلان بيسەمبيەۆتىڭ مالىمەتىنشە، №30 مەكتەپ-گيمنازياسىنىڭ توبەسىنەن سۋ اعىپ، 40 كابينەت جارامسىز بولىپ قالعان. سودان بەرى ءبىلىم ورداسىنىڭ شاتىرى، جىلۋ جۇيەسى، تەرەزەسى عانا اۋىستىرىلعان. عيماراتقا جەڭىل جوندەۋ جۇرگىزىلگەن. ال ەلەكتر جەلىسى بۇرىنعى كۇيىندە تۇر.

«كۇردەلى جوندەۋ جۇمىستارى اۆتورلىق جانە تەحنيكالىق قاداعالاۋ مەكەمەلەرىنىڭ قاتىسۋىمەن بەكىتىلگەن جوبالىق-سمەتالىق قۇجاتتار نەگىزىندە اتقارىلادى. ەگەر جوندەۋ جۇمىستارى كانيكۋل كەزىندە باستالسا، جاڭا وقۋ جىلىنا دەيىن تولىق اياقتالماۋى مۇمكىن. وسىنداي سەبەپ ەسكەرىلىپ، اتالعان مەكتەپتەردەگى وقۋشىلاردى ونلاين فورماتتا وقىتۋعا شەشىم قابىلداندى»، دەپ ءمالىم ەتتى ە. بايمۇحانوۆ.