مۇندا ناۋرىزدىڭ كەلۋىنە بايلانىستى تەاترلاندىرىلعان كورىنىستەر, جەرگىلىكتى ونەرپازدار مەن شاقىرىلعان مەيمانداردىڭ كوڭىلدى كونتسەرتتەرى ءوتىپ جاتتى. اسىرەسە, رەسپۋبليكاعا بەلگىلى ءانشى ءبىرجان ەسجاننىڭ دومبىرامەن اۋەلەتە سالعان اندەرى قالانىڭ الىس جەرلەرىنە دەيىن ەستىلىپ تۇردى. «وردا» توبى دا وزدەرىنىڭ ونەرىن پاش ەتتى.
ءبىرازدان سوڭ باس ساحناعا وبلىس اكىمى ايداربەك ساپاروۆ شىعىپ, تۇرعىنداردى مەرەكەمەن قۇتتىقتادى. «حالقىمىز ۇلى كۇنگە بالاپ, جىل باسى ساناعان جاسامپاز ناۋرىز – بىرلىك پەن بەرەكە مەيرامى. بۇل كۇن داستارحانعا اق تولاتىن, ەلىمىزگە باق قوناتىن ارايلى شاتتىق كۇنى. حالىقتى ءدىن مەن دىلگە, ءتىل مەن تۇرگە بولمەيتىن ناۋرىز مەيرامى تاۋەلسىزدىك جىلدارى ۇلىسىمىزدى ۇيىستىرا ءتۇستى. قازىر ناۋرىز ءۇش كۇن بويى اتالىپ وتىلەتىن ەلىمىزدەگى ەڭ ۇلكەن, ەڭ ۇلىق مەرەكەگە اينالدى», دەگەن اكىم ەل پرەزيدەنتىنىڭ «اۋىل – ەل بەسىگى» باعدارلاماسىنىڭ حالىقتىڭ ءال-قۋاتىن جاقسارتۋعا ارنالعانىن ەسكە سالدى جانە وبلىستىڭ ەكونوميكا مەن الەۋمەتتىك سالاداعى جەتىستىكتەرىنە توقتالىپ ءوتتى.
الداعى ۋاقىتتا اتالىپ وتىلەتىن مادەني شارالار قاتارىندا بيىل قوجابەرگەن جىراۋدىڭ 360, شال اقىننىڭ 275, اقان سەرىنىڭ 180, ماعجان جۇماباەۆتىڭ 130 جىلدىعى بار ەكەنى ايتىلدى. سونىڭ ىشىندە م.جۇماباەۆتىڭ 130 جىلدىعىنا ارنالعان شارالاردىڭ باستالىپ كەتكەنىن جەتكىزدى. «جۋىردا عانا ماعجاننىڭ 30 ولەڭىن جاتقا ايتۋ كونكۋرسىنا پەتروپاۆل قالاسى مەن اۋداندارىمىزدان ءتۇرلى ەتنوس وكىلدەرى اراسىنان 300-گە جۋىق وقۋشى قاتىستى. ونىڭ 70-ءى كونكۋرستىڭ فينالدىق بولىگىنە جولداما الىپ, جۇلدە الدى. ەندى حالىقارالىق ايتىسقا دايىندىق ءجۇرىپ جاتىر», دەدى ول. سونىمەن بىرگە اكىم كەشەگى وتكەن سايلاۋدىڭ ەلدى دەموكراتيالىق وزگەرىستەرگە باستايتىن ماڭىزدى شارا بولعانىنا سەنىم ءبىلدىردى.
وسى جەردە وبلىستىق ارداگەرلەر كەڭەسىنىڭ توراعاسى, كەشە عانا استانا قالاسىندا تمد ۇيلەستىرۋ كەڭەسىنىڭ توراعاسى م.ۆولكوۆتىڭ قولىنان تمد ارداگەرلەرى كەڭەسىنىڭ «قۇرمەت» بەلگىسىن العان ەسكەندىر ەلەۋسىزوۆ اعامىزدى اڭگىمەگە تارتتىق. «حالقىمىزدىڭ كوڭىلى ارقاشان جايلى بولىپ, ەلىمىزدەگى ىنتىماق پەن بىرلىك بەرىك بولسىن! سوندا ىرىسىمىز دا مول بولادى», دەگەن تىلەگىن جەتكىزدى اقساقال.
بۇل كۇنى اسىق اتۋ, كۇرەس سياقتى ۇلتتىق ويىنداردان جارىستار, ال القاقوتان جاپسارلاسا قونعان كيىز ۇيلەردە قولونەر شەبەرلەرىنىڭ تۋىندىلارىنىڭ كورمەسى ءوتتى. ناۋرىز كوجە ساپىرىلىپ, ۇلتتىق تاعامداردىڭ بۋى بۇرقىراپ جاتتى.
سولتۇستىك قازاقستان وبلىسى
