قازىر ورتالىقتا 331 قارت تۇرادى ەكەن. ولاردىڭ اراسىندا I, II توپتاعى مۇگەدەك جاندار, ياكي زەينەتكەرلەر بار. مەكەمە قىزمەتكەرلەرى قارتتارعا مەديتسينالىق, پسيحولوگيالىق, ەڭبەك تەراپياسى, قۇقىقتىق, ەكونوميكالىق جانە باسقا دا بىرنەشە الەۋمەتتىك قىزمەت ءتۇرىن ۇسىنادى. قاريالار جىل سايىن اتاۋلى مەرەكەلەردەن قۇر قالماي, مادەني ءىس-شارالارعا قاتىسادى.
وسى جولى اقساقال اتالار مەن اق جاۋلىقتى انالاردىڭ قۇرمەتىنە مەملەكەتتىك كۇزەت قىزمەتى وركەسترىنىڭ ونەرپازدارى كونتسەرت قويدى. وركەستر قۇرامىندا ايزات قارابەكوۆا, اسىلحان شالقاروۆ, ەركەبۇلان سəرسەنبەكوۆ, گۇلسىم مىرزابەكوۆا, باۋىرجان نۇرمۇحانوۆ سىندى حالىقارالىق جانە رەسپۋبليكالىق ونەر بايقاۋلارىندا توبە كورسەتىپ, توپ جارعان مادەنيەت سالاسىنىڭ مايتالماندارى بولدى. جەزتاڭداي انشىلەر وركەستردىڭ سۇيەمەلدەۋىمەن قازاق جانە ورىستىڭ ءداستۇرلى اندەرىن بىرىنەن سوڭ ءبىرىن قۇيقىلجىتا شىرقادى. ىزىنشە جيىلعان كوپشىلىك شەبەر كۇيشىلەردىڭ كۇي تارتىسىنا ءتانتى بولدى. قوناقتاردىڭ تالابى مەن تالانتىنا كۋا بولعان قارتتار ونەرپازدارعا العىس ايتىپ, قوشەمەت كورسەتتى. ال پرەزيدەنت ءىس باسقارماسى ۇيىمداستىرۋ-باقىلاۋ جانە كادر جۇمىسى ءبولىمى مەڭگەرۋشىسىنىڭ ورىنباسارى شولپان جۇماعۇلوۆا قارتتارعا العىس ايتتى.
– جاڭا جىلدىڭ باستاۋى بولعان ناۋرىز مەرەكەسى قۇتتى بولسىن! قازاق حالقىنىڭ قاشاندا ۇلكەنگە قۇرمەت, كىشىگە ىزەت كورسەتە بىلەتىن قاسيەتىن بىلەسىزدەر. بۇگىن پرەزيدەنت ءىس باسقارماسىنىڭ ۇجىمى مەن وعان قاراستى ۆەدومستۆولار وزدەرىڭىزگە كەلىپ, سىي-سياپات كورسەتۋدى ويلاستىرعان ەدى. سىزدەر ەلدىڭ وركەندەۋىنە, دامۋىنا زور ۇلەس قوستىڭىزدار. سىزدەرگە زور دەنساۋلىق, ۇزاق عۇمىر تىلەيمىن, دەدى ول.
ورايلى ساتتە پرەزيدەنت ءىس باسقارماسىنا قاراستى پرەزيدەنت اكىمشىلىگى مەن ۇكىمەتىنىڭ اكىمشىلىك عيماراتتارى ديرەكتسياسى, مەملەكەتتىك رەزيدەنتسيالار ديرەكتسياسى, مەديتسينالىق ورتالىق اۋرۋحاناسى جانە ماتەريالدىق-تەحنيكالىق قامتاماسىز ەتۋ باسقارماسىنىڭ اكىمشىلىك عيماراتتار ديرەكتسياسىنىڭ قىزمەتكەرلەرى ناۋرىز داستارقانىن جايدى. وسى كۇنى پرەزيدەنت ءىس باسقارماسىنىڭ ماماندارى ءوزىنىڭ جەكە قورىنان اكەلگەن كىتاپتارىن «شاراپات» ورتالىعىنىڭ كىتاپحاناسىنا تاپسىرعانىن دا ايتا كەتكەنىمىز ءلازىم.
«شاراپات» الەۋمەتتىك قىزمەت كورسەتۋ ورتالىعىندا ءبولىم مەڭگەرۋشىسى بولىپ ەڭبەك ەتەتىن ساۋلە قايىروۆانىڭ ايتۋىنشا, پرەزيدەنت ءىس باسقارماسىنىڭ ۇجىمى ورتالىققا جىلىنا كەمىندە ءبىر مارتە قايىرىلىپ, قارتتاردىڭ كوڭىلىن كوتەرۋگە ىقىلاس تانىتادى ەكەن.
– ورتالىقتا ءار مەرەكەنى ءوز دەڭگەيىندە اتاپ وتەمىز. پرەزيدەنت ءىس باسقارماسى جىل سايىن كەلەدى. مەكەمەدە 16 ۇلتتىڭ قارتتارى تۇرادى. بارلىعى ءبىر وتباسىنداي تاتۋ-ءتاتتى ءومىر سۇرەدى. ورتالىقتىڭ جاڭا, كەڭ عيماراتى 2007 جىلى پايدالانۋعا بەرىلدى. مۇندا اكت زالى, مەديتسينالىق ءبولىم, جاتتىعۋ زالى, مۋزەيدەن باسقا دا قىزمەت كورسەتەتىن بولىمدەر بار. قىسقاسى, قارتتارعا جاقسى جاعداي جاسالعان. ۇلى وتان سوعىسىنىڭ ارداگەرى 98 جاسقا قاراعان رايسا سافونچيۆا دا وسىندا تۇرادى. ول سوعىستا پوشتاشى بولعان. قازىر قىزى رەسەيدە, دەيدى ءبولىم مەڭگەرۋشىسى.
پرەزيدەنت ءىس باسقارماسىنىڭ ۇجىمى كونتسەرتتىك باعدارلامادان كەيىن دە قارتتاردىڭ تۇرمىس احۋالىمەن تانىسىپ, ەمەن-جارقىن اڭگىمەلەستى.
