ناۋرىز جىرى

ناۋرىز جايلى جىرلار لەگى ەرتە كەزدەن-اق قازاق ىشىندە قاراڭداپ، بوي كورسەتكەن. تاتۋلىق پەن بىرلىك، ماحاببات پەن مەيىرىم ايىن جىرعا ارقاۋ ەتپەگەن اقىن كەمدە-كەم. ءماشھۇر ءجۇ­سىپ كوپەي ۇلى «ناۋرىز تىلەگى» اتتى ولەڭىن­دە كەلىستى ايدىڭ كوركەم سۋرەتىن سالادى.

بىرەۋىم ەكەۋ بولىپ، مال قوسىلدى،

قوراما ءجۇز-ءجۇز لاق، قوزى تولدى.

ىزعارلى، قىس-زىمىستان، سۋىق كەتىپ،

اسپاننان كۇن ك ۇلىمدەپ، شىراي ەندى.

ۇزاماي قار دا كەتەر، جاز دا بولار،

ساي-سالا كۇرىلدەسىپ، سۋعا تولار!

بولەنىپ جەر جەمىسكە، مىڭ قۇلپىرىپ،

شالعىنعا كوكورايلى اۋىل قونار.

مىنە، بىرەۋى ەكەۋ بولىپ، اسپانعا شىرايى ەنگەن قازاق دالاسىنىڭ سۋرەتى، تىنىسى. اقىن جانى ەل تىنىسىن سەزىنىپ، ەمىرەنە جىرعا قوسادى. ال شاكارىم قۇدايبەردى ۇلى مەرەكە قارساڭىنداعى ۇلتتىڭ ۇلاعاتىن، ۇلىستىڭ ۇلى كۇنىنە دەگەن ەل سۇيىسپەنشىلىگىن پاش ەتەدى.

ۇلىستىڭ ۇلى كۇنىندە،

باي شىعادى بالبىراپ.

قاسىندا جاس جەتكىنشەك،

ت ۇلىمشاعى سالبىراپ.

كەلىنشەك شىعار كەرىلىپ،

ساۋكەلەسى ساۋدىراپ.

قىز شىعادى قىلميىپ،

ەكى كوزى جاۋدىراپ.

بوزبالا شىعار بۇرقىراپ،

اقبوكەندەي سىرقىراپ.

قۇل قۇتىلار قۇرىقتان،

كۇڭ قۇتىلار سىرىقتان.

كەتىك ىدىس، ءشومىشتىڭ،

ءتۇتىنى شىعار بۇرقىراپ.

جاڭا جىلدىڭ باسى سانالىپ، حا­لىق قاستەر تۇتقان ناۋرىز جايلى شى­عىس اقىند­ارى كول-كوسىر جىر تيەگىن اعىت­قان. ءبىر عانا ومار حايامنىڭ «ناۋ­رىز­نا­ماسى» تەرەڭنەن سىر تارتقان ىرگەلى ەڭبەك. ال تۇركىمەن جىرىنىڭ ءدۇل­د ۇلى ماقتىمق ۇلى ءاز ناۋرىزدىڭ «جوق نار­سەنى بار قىلار» قاسيەتكە يە ەكەنىن ايعاق­تايدى.

جەتكەن كەزدە ناۋرىزىمىز

جاپان بىتكەن جاڭعىرار،

تۇمان ورناپ، تاۋ باسىن اسپان

ءۇرپى سالبىرار.

جانسىزدارعا جان ءبىتىپ،

اۋەن بيلەپ ماڭدى بار،

جەر كوگەرىپ، ءشوپ قاۋلاپ،

مەرەيىن ءبىر قاندىرار.

كۇنگە توسىپ ارقاسىن

جان-جانۋار البىرار،

اۋناپ-قۋناپ بارلىعى

 جەرگە تۇگىن قالدىرار.

كەلە سالا ناۋرىزىم

جوق نارسەنى بار قىلار!

سامارقاننىڭ كوك تاسى ەرىپ، سايىن دالانى قۋانىشتى اۋەزگە وراعان ۇلىس كۇنى قاي جۇرەككە شوق تاستاماسىن، قاي سەزىم پەرنەسىن ءدوپ باسپاسىن؟ كۇن مەن ءتۇن، جارلى مەن كەدەي، بيىك پەن الاسا تەڭەلەر ايبىندى مەرزىمنىڭ قاسيەتى بيىك، قۇدىرەتى وراسان.

ناۋرىز مەرەكەسى «يسلام ءدىنىنىڭ قالدىعى» سانالىپ، تويلانۋعا تىيىم سالىنعان ساتتەر دە ءوتتى. قازاق حالقى ەل بىرلىگىنىڭ تاڭباسىنداي كورگەن ءتول مەيرامسىز 62 جىلداي ۋاقىتتى باستان كەشىردى. الايدا ايدى الاقانمەن جابۋ مۇمكىن ەمەس ەدى. قۇرساۋدا قالعان ءاز ناۋ­رىز قۇتتى تۇعىرىنا قونىپ، قازاق رۋحى سىلكىندى، جانىنا قان جۇگىردى. وسى تۇستا اقىن مۇحتار شاحانوۆتىڭ اقتارىلا جىرلاعان جىر شۋماقتارى جارىق كورگەن بولاتىن.

قانشا عاسىر ءسان بەرگەن دالامىزعا

وزگەشە ءبىر ءانى ەدىڭ بايتاق ەلدىڭ،

سالەم، ناۋرىز!

سەن ءبىزدىڭ ارامىزعا

الپىس ەكى جىلدان سوڭ قايتا كەلدىڭ.

سەن ەڭ كونە جىرىسىڭ سانامىزدىڭ،

رۋحي شاتتىعىمسىڭ تاسىپ تولعان.

سەنى تويلاپ، باباسى بابامىزدىڭ

اجەمنىڭ اجەسىنە عاشىق بولعان.

ءيا، بابامىزدىڭ باباسىنان ميراس بولىپ قالعان ۇلىس كۇنى الاش جۇرتىمەن بىرگە العا ادىمداي بەرمەك. ناۋرىز – تاتۋلىق نىشانى، ۇلت بەدەرى جاڭارعان كۇن، جانىمىز تۇلەپ، ەلدىك قۋاتىمىز ارتقان كۇن. بويىنا ىزگىلىك پەن سالتاناتتىڭ مونشاعىن تاققان الىپ مەرەكە اقىندار جىرىنا ارقاۋ بولىپ اۋەلەي بەرەرى تالاسسىز اقيقات.