قاڭتار ايىنىڭ باسىندا ەگىندىكول اۋىلىندا تۇراتىن ماحامبەت اۋىل ىرگەسىندەگى بۇلاق باسىندا جالعىز اققۋ جۇرگەنىن, قاتتى ايازدا قۇستىڭ قاناتىنا مۇز قاتىپ, جاعدايى قيىنداي باستاعانىن كورىپ, ۇيىنە اكەلگەنىن, تاماق-سۋىن بەرىپ اسىراپ وتىرعانىن حابارلاپ ەدىك.
ەكى ايدان اسا جابايى قۇستى ءوز ۇيىندە باعىپ شىققان ورمانشى كوكتەم كەلىسىمەن اققۋدىڭ مىنەزى وزگەرىپ, ەلەڭدەي باستاعانىن, تاماققا بۇرىنعىداي تابەتى تارتپاي قالعانىن بايقاعان. جىل قۇستارى كەلىپ, اۋىل ماڭىنداعى كولگە قاز-ۇيرەك قونا باستاعان ەكەن. «قۇستى ەركىندىككە جىبەرەتىن ۋاقىت جەتكەن ەكەن» دەيدى ماحامبەت.
- اققۋدى جىبەرەر الدىندا نۇرعيسا اتامىزدىڭ ايگىلى «اققۋ» كۇيىن, عاريفوللا قۇرمانعاليەۆتىڭ ورىنداۋىنداعى «الۋاش» ءانىن تەلەفوننان ويناتىپ كوردىم. بىراق ەكى ايدان اسا تار قاپاستا ەرىكسىز تۇرعان, ەركىندىكتى اڭساعان اققۋدىڭ ليريكاعا اسا زاۋقى بولماعان سياقتى. ماحامبەت اعا سۋ جاعاسىنا اپارىپ قويا بەرگەن كەزدە قاناتىن سابالاپ سۋ بەتىمەن ۇشىپ بارىپ, اشىق ايدىنعا جەتكەن سوڭ وتىرا سالا جۋىنا باستادى. باسىن سۋعا قايتا-قايتا تىعىپ, قاناتىن تارانىپ, كوپ جۋىندى. شاماسى ابدەن كىرلەسە كەرەك. اققۋدىڭ شومىلعانىن ءبىر ساعاتقا جۋىق باقىلاعان سوڭ بويىمىز توڭازىپ, كەتىپ قالدىق, - دەيدى وسى ساتكە كۋا بولعان قاراتوبە اۋداندىق ىشكى ساياسات ءبولىمىنىڭ باسشىسى نۇرتاس سافۋللين.
«اققۋ شىنىمەن وتە تازا قۇس ەكەن. قىس بويى قورادا تۇرعاندا ءار جەرگە ساڭعىمايتىنىن, تەك ءبىر جەرگە وتىراتىنىن بايقادىم», دەيدى ماحامبەت قۇسايىنوۆ.
ايتا كەتەيىك, باتىس قازاقستان وبلىسىندا ەكولوگيالىق ماسەلەلەرمەن شۇعىلدانىپ, كوپتەگەن يگى ءىستىڭ باسىندا جۇرگەن «تەلەگەي» قوعامدىق بىرلەستىگىنىڭ مۇشەلەرى, وزگە دە قوعام بەلسەندىلەرى ەگىندىكولگە جەم-ءدان جىبەرىپ, كومەكتەسىپ تۇردى.
ماحامبەت راحمادەن ۇلى قاراعاش ورمان شارۋاشىلىعىندا 13 جىلدان بەرى قىزمەت ەتەدى. «تۋعان جەردىڭ تابيعاتىن, ونىڭ اڭ-قۇسىن كوزىنىڭ قاراشىعىنداي قورعاپ جۇرگەن ورمانشىنىڭ ەڭبەگى لايىق باعالانسا ەكەن» دەيدى اۋىلداستارى.
باتىس قازاقستان وبلىسى
