«مەنىڭ ويىمشا, ۋنيۆەرسيتەت ارقاشان قوعامعا قىزمەت ەتۋى قاجەت. سايكەسىنشە ونىڭ ىشىندەگى ماتەريالدىق قۇندىلىقتار دا سول ميسسياعا ساي بولۋى ءتيىستى. مىسالى, قازىرگى گادجەتتەر مەن ينتەرنەت بەلسەندىلىگىنىڭ زامانىندا كەيبىر تۇسىنىكتەر بويىنشا كىتاپ وقۋ دەگەنىڭىز ول سونداي قيىن جۇمىس رەتىندە كورسەتىلەدى. ال شىن مانىندە, ءبىز كىتاپ وقۋدى سانگە اينالدىرا ءبىلۋىمىز كەرەك. كىتاپ وقۋدىڭ ناسيحاتىمەن اينالىسۋعا بار كۇش جىگەرىمىزدى سالۋىمىز قاجەت. ياعني كىتاپحانا ماقساتى قوعامداعى كىتاپ وقۋعا دەگەن قۇشتارلىقتى وياتىپ, كىتاپقا دەگەن قۇرمەتتى ارتتىرۋعا ارنالعان ورتا بولعانى دۇرىس. بۇل ايماق يننوۆاتسيالىق يدەيالاردى تالقىلاۋعا, بىلىمگە شابىتتاندىراتىن تاپتىرماس مۇمكىندىك بولادى دەگەن ۇمىتتەمىز», – دەدى Maqsyt Narikbayev University باسقارما توراعاسى تالعات نارىكباەۆ.
جالپى, جوعارى وقۋ ورنىنداعى قوعامدىق كىتاپحانا دەگەن جاڭا ۇعىم ەمەس. مىسالى, New York University, Harvard, Stanford سياقتى الەمنىڭ جەتەكشى ۋنيۆەرسيتەتتەرىندە قوعامنىڭ قولدانۋىنا ۇسىنىلعان كىتاپحانالار بار.
Public Library قورىنىڭ سىيىمدىلىعى 13 مىڭ كىتاپقا دەيىن جەتەدى. ءبىرىنشى زالدا قازاق تىلىندەگى ادەبيەتتەر, قازاق اۆتورلارى, الەمدىك بەستسەللەرلەردىڭ قازاق تىلىندەگى اۋدارمالارى, سونداي-اق قازاقستان تۋرالى شەت تىلدەرىندەگى ادەبيەتتەر ورنالاسقان. كەيىنگى زالداردا بيزنەس, كوشباسشىلىق, ستراتەگيا, مەنەدجمەنت, كوماندا قۇرىلىمى, ادام رەسۋرستارىن باسقارۋ, كوۋچينگ, قارجى, قارجىلىق ساۋاتتىلىق جانە ينۆەستيتسيا تۋرالى تۋىندىلار بار. سونداي-اق بيزنەس-يدەيالاردى قالاي تەكسەرۋ كەرەك, ستارتاپتاردى قالاي باستاۋ كەرەك دەگەن سياقتى, ياعني بارلىعى بولاشاق جانە قازىرگى كاسىپكەرلەر مەن مەنەدجەرلەرگە ارنالعان كىتاپتاردى تابا الاسىز. تاريح, الەۋمەتتانۋ, مادەنيەت, ونەر بويىنشا دا تانىمدىق ادەبيەتتەر بار.
«فيلوسوفيا» بولىمىندە انتيكالىق فيلوسوفيادان, كلاسسيكالىق نەمىس تىلىنەن انارحيزم ىلىمىنە دەيىن كەڭ اۋقىمدى فيلوسوفتاردىڭ كىتاپتارى ۇسىنىلعان. سونىمەن قاتار كلاسسيكالىق كوركەم ادەبيەت تۋىندىلارى, پۋبليتسيستيكا, عالام, عارىش, جاراتىلىستانۋ تۋرالى عىلىمي-كوپشىلىك باسىلىمدار جانە سەريالىق باسىلىمدار. دەنساۋلىق, دۇرىس تاماقتانۋ جانە دەنە تۋرالى ادەبيەتتەر, پسيحولوگيا بويىنشا ادەبيەتتەرمەن قاتار, مۇندا جاستارعا ارنالعان ءوزىن ءوزى تانۋ, پسيحيكالىق دەنساۋلىق جانە رۋحاني دامۋ تۋرالى كوپتەگەن تانىمال كىتاپ بار.
«جالپى, كىتاپ ادامنىڭ ىشكى دۇنيەسىن بايىتىپ, وي-ءورىسىن كەڭەيتىپ, مۇقتاجىن قاناعاتتاندىراتىن رۋحاني ازىعى بولىپ قالا بەرمەك. ال قوعامنىڭ ءال-اۋقاتى, دامۋ دەڭگەيى بىلىمگە تىكەلەي بايلانىستى. قازىرگى ساياسي-ەكونوميكالىق جارىستا كوش باستاپ, الەمدىك ارەنادا جەتەكشى ورىن الۋ ءۇشىن قوعامعا رۋحاني جاڭعىرتاتىن, ءبىلىم مەن عىلىمعا قولايلى ورتا ۇسىنۋ كەرەك», – دەيدى تالعات نارىكباەۆ.
قوعامدىق كىتاپحانانىڭ اشىلۋ سالتاناتى «استانا» حالىقارالىق قارجى ورتالىعىنىڭ سوت وكىلدەرى مەن حالىقارالىق تورەلىك ورتالىعىنىڭ قازىرگى توراعاسى توماس كريۋممەل مىرزانىڭ جانە بۇرىنعى توراعاسى باربارا دومانن حانىمنىڭ رەسمي ساپارى اياسىندا وتكىزىلدى.
جيىن سوڭىندا قازاقستانعا العاش رەت رەسمي ساپارمەن كەلگەن توماس كريۋممەل IAC-تاعى كوممەرتسيالىق داۋلاردى شەشۋ ءۇشىن اربيتراجدىڭ ارتىقشىلىقتارى تۋرالى ايتىپ بەردى. ال دومانن حانىم 2022 جىلعى حالىقارالىق تورەلىك ورتالىعىنىڭ تورەلىك جانە مەدياتسيا ەرەجەلەرىنىڭ نوۆەللالارى تۋرالى تىڭداۋشىلارىمەن ءبولىستى.
Public Library كىتاپحاناسى Maqsyt Narikbayev University-ءدىڭ نەگىزگى كىرەبەرىسىندەگى حولدا ورنالاسقان. وعان كەز كەلگەن استانا قالاسىنىڭ تۇرعىندارى مەن قوناقتارى كەلىپ, رۋحاني كوكجيەگىن كەڭەيتىپ, تانىمىن بايىتا الادى.
