- ەڭ اۋەلى ىقىلاس پەن نيەتتى دۇرىستاۋ كەرەك. ويتكەنى ىقىلاس جۇرەكتىڭ كىرشىكسىز ادالدىعى مەن نيەتتىڭ تازالىعىن ايقىندايدى. اللا تاعالا ءسىز بەن ءبىزدىڭ شىنايى ىقىلاسىمىزعا, نيەتىمىزگە قاراي ساۋاپ جازادى. دارەت الماي, ناماز قابىل بولمايتىنى سەكىلدى, نيەت دۇرىس بولماي, قۇلشىلىق قابىل بولماۋى مۇمكىن. ءجالالۋددين رۋمي ءبىر سوزىندە بىلاي دەگەن ەكەن: «سەنىڭ بارلىق ءىس-ارەكەتىڭە ىقىلاس قاجەت. سوندا عانا اللا تاعالا جاساعان ساۋاپتى ىستەرىڭدى قابىل ەتەدى. ويتكەنى ىقىلاس – قۇلشىلىق قۇسىنىڭ قاناتى. سەن قاناتسىز باقىت مەكەنىنە قالاي ۇشپاقسىڭ؟, - دەدى باس ءمۇفتي.
باس ءمۇفتيدىڭ ايتۋىنشا, ساۋابى مول رامازان ايىندا از امال جاساساق تا, شىنايى نيەتپەن ورىنداساق ءسوزسىز ونىڭ ناتيجەسى مەن جەمىسىن كورەمىز.
«وسى رەتتە مىنا ءحاديستى ەرەكشە ايتىپ وتەر ەدىم: «شىن مانىندە اللا سەندەردىڭ تۇرلەرىڭ مەن سىرت كورىنىستەرىڭە قارامايدى, الايدا جۇرەكتەرىڭ مەن ءىس-امالدارىڭا قارايدى». سوندىقتان عالىمدارىمىز ايتقانداي, از امالدى نيەت كوبەيتەدى, كوپ امالدى نيەت ازايتادى. ساۋابى مول رامازان ايىندا از امال جاساساق تا, شىنايى نيەتپەن ورىنداساق ءسوزسىز ونىڭ ناتيجەسى مەن جەمىسىن كورەمىز. اللا تاعالا رامازان ايىنداعى ورازامىزدى, قادىر تۇنىندەگى دۇعا-تىلەكتەرىمىزدى قابىل ەتكەي! ەلىمىز امان, جۇرتىمىز تىنىش بولعاي! كەلەسى رامازان ايىنا امان-ەسەن جەتۋىمىزدى اللا ءناسىپ ەتسىن! ءامين!», دەدى ناۋرىزباي قاجى تاعان ۇلى.
